پشتی ترامپ-ی بڕیارا ڤەکشاندنێ ل رۆژئاڤا دای، رسیار ئەوە ئەرێ ب راست ئەڤە سیاسەتا ئەمریکایە؟
ئایە رویێ راستێ سیاسەتا ئەمریکا نەپاکی کرنە ل هەڤپەیمانێن خۆ؟ ئایە ڤەکشاندن دێ ل ڤی سینۆری بیت یان دێ بەرفرەهتر بیت؟
ئەوا بەرچاڤ د سیاسەتا دەرڤە یا ئەمریکا دا، كو دۆناڵد ترامپ د پێکئانینا سیاسەتا خوە یا دەرڤە دا، سیاسەتا «گاڤێن نەدیار» د مەشینیت.
ڤێ سیاسەتێ ژی ئاستێ باوەڕییا هەڤپەیمان و دوستێن ئەمریکا داكشاندییە، نەخاسمە پشتی ئەمریکا ل رۆژهەلاتا ناڤین کومەکا شەڕان و ئالۆزیان بەرپاکرین، و کومەکا دوژمنداری و لێکڤەبوونان ل وەڵاتان چێکرین، و گەلەک مللەتان خەبات بۆ رزگاریێ و ئازادیێ ب پشتەڤانییا ئەمریکا کرین، ژ وان ژی کورد، كو سەدان ساڵە وەلاتێ وان هاتییە داگیركرن و سەدان جەرگبڕی و دەردەسەری و هەوێن ژناڤبرنێ ب چەكێن جۆر ب جۆر یێن قەدغەكری دژبەر هاتینە بكارئینان، و زێدەباری وان ساڵێن كوردان ل هەموو لایەكی شەڕێ تیرۆرێ كری و ب خوینا هزاران گەنجێن كورد ئەو سەركەفتنێن مەزن ب سەر داعش و تیرۆریستان دا ب دەستڤەئیناین، مخابن! ئەمریكا وێ قوربانیدانێ ژبیرخۆ دبەت، و مە ب دوژمنێن مە دفرۆشیت، نەخاسمە پشتی ریفراندۆمێ و دەما هەرێما كوردستانێ ل 16ێ ئۆكتۆبەرێ ب تەنێ هێلای بەرسینگێ حەشدا شەعبی و هێزێن عیراقی بگریت و ڤێ گاڤێ ژی ب هەمان شێوە، و ل پارچەكا دی كوردستانێ دەما گەلێ مە یێ رۆژئاڤایێ كوردستانێ لژێر گەفا قركرنێ و رەحما تۆپ و فرۆكە یێن توركیا دهێلیت، پشتی كو داعش ل هەموو سوریا نەهێشتی و تێكبری" کو ب دیتنا کوردان، و جیهانێ ژی، پێشمەرگە و شەرڤانێن كورد ئەڤسانە یا داعشێ ل عیراق و سوریا شكاندن، ڤێ گاڤێ ئەمریکا ب بریارا ڤەكشاندنا هێزێن خوە، یا نەپاکیێ ژ هەموو وان سۆز و بانگەشە یێن گرێدان ب دیموکراسیێ و ئازادیێ وپاراستنا نەتەوەیان ڤە هەی دکەت، پێنگاڤان بەرڤ پاشڤە دهاڤێژیت و هەموو وان دەستکەفتێن دێموکراسیێ جارانی هیچێ دکەت.
ئەمریكا ب ڤەكشاندنا هێزێن خوە ل رۆژئاڤایێ كوردستانێ – سوریایێ ترسەك مەزن بۆ هەڤپەیمانێن خوە ل هەموو رۆژهەلاتا ناڤین دا دروستكریە، زێدەباری نەرازیبوونێن ل هوندرێ ئەمریكایێ ژی گەلەك كارڤەدانێن دەرڤەیی یێن نەرازیبوونێ لسەر بریارا ڤەكشاندنێ هەنە، زێدەباری نەرازیبوونێن هەڤەپەیمانێن نێڤ دەولەتی یا دژی داعشێ یێن وەكو بریتانیا و فەرەنسا و ئەلمانیا، كو ڤێ بریارێ پرسا كو ئایە ئەمریكا دێ ل هەموو رۆژهەلاتا ناڤین خوە ڤەكێشیت یان ژی ئەڤ ڤەكشیانە یا سینۆردارە، نەخاسمە ب لبەرچاڤگرتنا گووتنا دۆنالد ترامپ یا پاش بریارا ڤەكشاندنێ كو گۆت: "مە بەرێ یێ گۆتی و دێ دوبارە كەینەڤە، ئەگەر توركیە هەر كارەكی بكەت، كو ئەز ب دانایی و هشمەندی یا خوە یا مەزن و بێ هەمپا بزانم ژ دەرڤەی سینۆرە، ئەز دێ ب تمامی ئابۆری یا وێ هلوەشینم و ژناڤبەم، و من بەرێ ئەڤ كارە كرییە ل هەمبەر ئەورووپا و یێن دی". ڤێ گۆتنێ ژی توركیە نیگەران كر و بهایێ پارێ وێ شكاند و كورد تەنا كرن، ئانكو د بریارا ڤەكشاندنێ دا كورد نیگەران كرن و تۆركیە كەیفخۆشكر و پاشان و ب گۆتنا دویێ توركیە نیگەران كر و كورد كەیفخۆش و تەناكرن.
دوماهی ژی هێش نە دیارە كا دێ كی دلخۆش بیت و كی دێ ب سەركەڤیت ، لێ یا راست و دیرۆكێ ژی سەلماندی ئەوە، كو گەل هەرتم یێن ب سەركەڤتین و دیكتاتۆر و داگیركار ژی هەرتم شكەستینە ژبلی روی رەشیێ د دیرۆكێ دا چ تشتەكێ دی قازانج نەكریە.