شەڕێ سەرۆكێ هەرێمێ و توركیا
زوهری جەبەلی ئێدلبی
دەما جوگرافییا نەتەوەكێ وەكی كوردێ بێ دەوڵەت بكەڤیتە ژێر مەترسییا ژ ناڤبرنێ و هەڕەشەیێن وڵاتێن دەردۆر، چ هێز نكارن بەراهیكا وانا بگرن، نەخاسمە ئەگەر ئەو نەتەوە یێ بێ چەك و پشتەڤانییەكا دەرەكی بیت، مینا جوگرافییا نەتەوێ كورد كو دەردۆرا وێ وڵاتێن زڵهێز و خوەدی چەكێن گران و سیاسەتەكا بەرژەوەندیخوازن، لێ كورد ب گشتی خوەدی هێزەكا مرۆڤی و كەسێن مێرخاس و فیداكارە و هیچ دەمەكی تووشی شكەستێ ناهێت، ب تایبەت باشوورێ كوردستانێ خوەدی سەركردێن شۆڕەشگێر و چاڤنەترس و سیاسەتەكا راستەقینەیە، لەوما هەتا نها تنێ ل باشوورێ كوردستانێ ئۆمێدەك هەیە بۆ دەوڵەتبوونێ و تەڤی گەلێ كورد ل هەر جهەكێ دونیایێ بیت، دڵێ وی ب باشوورێ كوردستانێ خوەشە، چونكی تنێ ل باشوورێ كوردستانێ شۆڕەشێ سەركەفتن بدەست ئانییە و خوەدی رێبەر و كەسێن خوەدی شیانن. ئەگەر ئەم توركیا ب نموونە بینینەڤە، دێ بۆ مە دەركەڤیت كو كەسانەكێن خوەدی سیاسەتەكا سەركەفتی ل باشوورێ كوردستانێ هەنە.
توركیا وڵاتەك بوو ب هەمی رەنگەكی هەبوونا نەتەوەیەكی ب ناڤێ نەتەوێ كورد رەت دكر، ل گوند و باژاران دەر دكر، جل و بەرگ و زمان و كەلتوور و ناڤێن وان قەدەغە بوون. پشتی چێبوونا هەرێما كوردستانێ ژی بۆ دەمێ چەند ساڵان توركیا گەفێن ژ ناڤ برن و نەهێلانا ڤێ هەرێمێ دكر، گەفێن بەزاندنا سنوور و ئاگر بارانكرنا خاكا كوردان دكر، لێ نها ل جهێ بەزاندنا سنووران، چەند دەرگەهێن سنووری ڤەكرنە بۆ چۆنا وەلاتیێن كوردستانێ بۆ توركیا و ئالووگۆڕا بازرگانی ب رەنگەكێ بەرفرەه، فڕۆكێن جەنگی هەڕەشەیێن ژناڤبرنا كوردان دكر ب پیر و ژن و زاروكڤە، لێ نها ل جهێ فڕۆكێن شەڕی، فڕۆكێن گەشتیاری و دیپلۆماسی و بازرگانی ل عەسمانێ هەرێما كوردستانێ و توركیا تێن دیتن. هەڤوەڵاتیێن هەرێمێ ب ئۆتۆمبێلا خوە ل باژاڕێن توركیا دگەڕێن. توركیا هەڕەشەیێن قڕ كرن و لاوازكرنا ئابووریا هەرێما كوردستانێ دكر، لێ نها جۆرەها خوارنێن توركی و كەڵ و پەلێن پێدڤیێن ژیانێ و جۆرەها ئامیرێن توركی ل هەرێما كوردستانێ هەنە، دەیان كۆمپانی و ئۆتۆمبێلێن بارهەلگر و ئامێرێن مەزن تێن بۆ هەرێما كوردستانێ. توركیا دگوت ئەم دێ جهێ كوردان دگەڵ عەردی راست كەین، لێ نها دەیان كرێكار و كۆمپانی و ئامیرێن وانا جادە و باڵەخانە و ئاڤاهیێن مەزن ل هەرێما كوردستانێ چێ دكەن، بۆڕییا نەفتا هەرێمێ دچیتە توركیا و ل وێرێ دچیتە جیهانێ.ل توركیا كورد ب جلێن كوردی و ب زمانێ كوردی و ب كەلتوورێ كوردی د ژین و سەفەرا خوە دكەن. توركیا وڵاتەك بوو حاشا ل هەبوونا كیانێن سیاسی و پارتی دكر، لێ نها چار كونسۆلخانێن وێ ل هەرێما كوردستانێ هەنە، زۆرترین گەشتێن عەسمانی بۆ توركیانە، پارتێن كوردی بناڤێ كوردستانێ ل توركیا هەنە، ئالایێ كوردستانێ ل ناڤ خاكا توركیا تێ دیتن، مەزنترین دەسەڵاتا توركیا ب رەنگەكێ فەرمی پێشوزایێ ل بەرپرسێن هەرێما كوردستانێ دكەن، سەرۆك كۆمار و سەرۆكوەزیر و وەزیرێ دەرڤە سەردانا كوردستانێ كر و دڵێ وا شاد بوو.ب رسمی هەرێما كوردستانێ ناسی و شەرعییەت دا دەسەڵاتا هەرێما كوردستانێ، مینا وڵاتەكی دگەڵ هەرێمێ رەفتار دكە، ئەڤە دەستكەفت و گۆڕانكاریێن مەزنن كو ل سیاسەتا توركیا هاتی ل دۆر هەرێما كوردستانێ و، ئەڤ دەستكەفتە ژی دەستكەفتێن نێچیرڤان بارزانی سەرۆكێ هەرێما كوردستانێیە.نەك هەر ئەڤ دەستكەفتە، بەلكی پرۆسا ئاشتیێ ل باكوورێ كوردستانێ و سەرەدانا ئۆجەلان و پێداچۆنەڤە ب زیندانی كرنا چەندین پەڕلەمانتار و سیاسەتڤانێن باكوورێ كوردستانێ و ژ ناڤ وانا ژی سەلاحەدین دەمیرتاش، ل ژێر كاریگەرییا سەرۆكێ هەرێما كوردستانێیە.نها دەنگوباسێن دەستپێكرنەڤا پڕۆسا ئاشتیێ ل باكوورێ كوردستانێ گەرمە و، ئەڤ چەندە ژی دەستكەفتا سەرەدانا سەرۆكێ هەرێمێ بوو بۆ ئەنقەرە.
