ئەرێ كەسێ كو رۆژێ دەمژمێرەكێ، و هەفتیێ هەلەكێ، و هەیڤێ جارەكێ گۆتارەكێ و رۆژنامەكێ و گۆڤارەكێ و ساڵێ پەرتووكەكێ نە خوینیت، دێ رۆشنبیرەكێ چەوا بیت؟
یان فیسەران نڤیسەرە؟ ژبەركو بەری چەند ساڵان گۆتارەك یا بەڵاڤكری!! پشتی سێ كەسان بۆ وی پێداچوونا رێنڤیسێ و زمانی كری و پەیڤێن بیانێ وەرگێڕاین و هندەك رستە لاداین و هندەك بۆ داناین!.
یان چاڵاكڤانێ دەڤەرێ یە، چونكە بەری چەندێ (100) ڵایك یێت بۆ هاتینە كرن لسەر وێنەكێ خۆ بەڵاڤكری دەما مێڤانكرنا فلان و فیسەرانی!.
ئەو مەزنێ دەڤەرێ یە، چونكە وێ رۆژێ (200) كەس مێڤانكربوون، داكو ل هەلبژاردنێ دەنگی پێ بدەن، و پشتی هەلبژاردنێ (2) دەنگ ب تەنێ ئینان، پەهـ چەند مرۆڤەكێ ب جەماوەر و كاریگەرە!.
ئەو ماقویلێ گەڕەكا خارێ یان سەری یە، ژ مالباتەكا ماقویلە، دیارە خەلكێ دی نە ماقویلە!، ئەرێ رامانا ماقویلی چییە؟ دبێژن یا ژ پەیڤا معقول هاتی، ئانكو خەلكەكێ معقول و نە مەعقول یێ هەی؟.

یان فلان ئەڤسەرە و پلا وی پێشەنگ یان سەرهەنگێ لەشكری یە، بێی كو چ كولیژێن لەشكری خواندبن و تمامكربن!.
یان تە دیت فلان و فیسەران پشتی چەندین ساڵان ل پارتا دی بووین، و د چەند هەلبژاردناندا
(15 و 20 و 30) دەنگ د پارتا خۆ یا بەرێ دا نە دئینان، ئەڤرۆ یێن هاتینە پارتا نوی و ئێكسەر بوونە بەرپرسێن هەموو ئەندامێن دێرین و دلسۆز!.

مخابن كو رەوشەكە یا بڤی رەنگی یە، نە باوەرنامە و نە پاكی و نە دلسۆزی و نە نشتیمانپەروەری بۆ هەڵسەنگاندنا کوڕە هەژاران، پیڤەر و مەرج نینە!، و ژ بۆ خۆ كاندیدكرنێ چ بۆ پەرلەمانی یان جڤاتا پارێزگەهان ژی، دڤێت یان شێخ و مەلا یان ئاغا و مەلاك بی، یان دەولەمەند و سەرمایەدار و بازرگانەكێ مەزن بی، ڤێجا دێ تە شانسێ دەستنیشانكرنێ بۆ كاندیدبوونێ هەبیت!.
ڤێجا دێ بێژن خەلكێ ئاكرێ بۆچی باردكەن و دەردكەڤن و دچن و باژێڕێ خۆ دهێلن؟ هەلەبت من مەبەست ب خەلكێ ئاكرێ، هەموو پێكهاتێن ئاكرێ یە، چونكە هەموو برانە و ئەوێن بار ژی دكەن، ژ هەموویانن، هەر چەند ژ پێكهاتەكێ بۆ یا دی، جوداهی د رێژە و هژمارێ دا ژی هەبیتن؟.