گەلەک وەلات ب هونەر یان وەرزشا خوە یان بەلاڤکرنا کەلتورێ خوە دناڤا مللەتێن جیهانێ دا بەرنیاسن و بووینە پیشەنگ ل سەرانسەری جیهانێ و گرنگیەکا تایبەت ب خەلک و سەرکردەیێن وان دهێتە دان و دبیتە ئەگەر کو خەلک ل سەرانسەری جیهانێ سەرەدانا وان وەلاتان بکەن.
گەر سەحکەینە هەرێما کوردستانێ ب درێژاهیا دیروکێ زولم و نەخوشی و جینوساید دیتینە ئەو زەمینە بو خوشنەبوویە بشێت د وارێ هونەری دا جهێ خوە بکەت، پشتی سەرهلدانا سالا ١٩٩١ ژی ژ بەر نەبوونا پارەیەکێ تایبەت و شارەزایی د وارێ سینەمایێ دا چ پێشڤەچوون د وارێن هونەری دا نەهاتینە کرن، پشتی وەرگرتنا کابینەیێن حکومەتێ ژ لایێ نێچیرڤان بارزانی ڤە گرنگی ب وارێ هونەری هاتە دان، ئەڤ پێنگاڤە بو ئەگەر کو سینەماکار و دەرهێنەر پرودیوسەرێن باش د وارێن سینەمایێ دا بهێنە مەیدانێ و جهێ خوە بکەن. نموونەیێن هەری دیار و گرنگیدانا حکومەتێ ب ڤی واریدا پشتەڤانیکرن ل فلمەفەستیڤالا دهۆکێ یا نێڤدەولەتی و تەرخانکرنا بودجەیا ڤێ ڤەستیڤالێ، ئەڤ فەستیڤالا ل هەر چار پارچەیێن کوردستانێ ئێکەم بوو و شیا هەموو فلمسازێن کورد ل هەر چار پارچەیان و دیسان ل گەلەک جهێن دونیایێ کۆمبکەت و شەش گەرێن ڤێ فەستیڤالی ب باشترین شێوە بهێنە برێڤەبرن و بەردەوام بیت، ئەڤ فەستیڤالا بو ئەگەر کو گەلەک فلم بهێنە چێکرن و پتریا فلمان ژی شیاینە خەلاتان ل سەرانسەری فەستیڤالێن جیهانێ وەربگرن و هندەک ژ دەرهێنەرێن کورد ژی ل فەستیڤالێن جیهانی ببنە دادوەر د ژوریان دا، ئەڤە هەمی بۆ گرنگیدانا ححکومەتا هەرێمێ ب ڤی واری دا ڤەدگەریت.
ڤەکرنا پیشانگەها پەرتووکان ل هەولێرێ کو بوویە نەریتەکا سالانە بوویە ئەگەر کو خواندەڤان ژ هەموو تەخان ب تایبەت یا گەنجان زێدەببیت و بزاڤا وەرگێرانێ و رەخنەیا ئەدەبی ب شیوەیەکێ بەرفرەه پێشبکەڤیت و باشترین گەنجێن رومانڤیس و نڤیسەر و هوزانڤان پەیدا بکەت.
پێشوازیکرن و هاریاریکرنا هونەرمەندان ژ لایێ سەرۆکێ حکومەتێ یێ کابینەیێن بوری ببوو ئەگەرەک کو هونەرمەند پتر گرنگیێ ب هونەرا خوە بدەت. زێدەبوونا کەرنەڤال و ڤەستیڤالێن کەلتوری و جورا و جور وپیشانگەهێن هونەری بووینە ئەگەرەک کو پتر کەلتورا مە بهێتە ناساندن بو وەلاتێن جیران و ببیتە ئەگەرەک بۆ راکێشانا گەشتیاران.