کونکان ئێکە ژ یاری یێن هەرە بەربەڵاڤ ل ئاکرێ، ئەو هەڤوەڵاتیێ کو حەز ژ یارییا تۆپانێ نەکەت، دێ رۆژانە یان هەفتیێ جارەکێ ل گازینویان ب یاریا کونکانێ دەمێ خۆ بورینت، ئەز بخۆ ئێک ژ وان هەڤوڵاتییانم یێن هەفتیێ جارەکێ ل گەل هەڤاڵان خوارنەکێ پێکڤە دخوین و کونکانێ لسەر دکەین و ودەمەکێ خۆش پێکڤە دبورینین.
هەلبەت گەلەک یاری ب وان (۱۰٦) کاخەزێن پلاستیکی دهێنە کرن، لێ ئەوا من مەبەست پێ، تەنێ یارییا کونکانێ یە لسەر خوارنێ، کو ژ هەموو یاری یێن دی ب جەماوەرتر و بەبەڵاڤترە، ب دیتنا من ئێک ژ ئەگەرێن پەرەسەندنا ڤێ یاریێ ب ڤی ئاستێ بەرچاڤ، کو بوویە دیاردە، سەرباری کو بۆ خۆشی و رابواردنێ یە، ئەگەرەکێ دی یێ سەرەکی هەیە، کو ئەگەرێ دەرونی یە و یێ ڤەشارتی یە دناخێ هەموو یاریکەران دا، ئەو ژی داکو وێ هەستا خۆ یا نەدادییا جڤاکی و نە سەروەرییا یاسایێ و نە رێکوپێکیێ و نەبوونا رێکخستنێ د بیاڤێن جودا دا، کو رۆژانە هەست پێ دکەت و ب چاڤێ خۆ دبینیت، ب دادی و یاسایێن کونکانێ قەرەبو ب کەتەڤە و خەم و فشارێن دەرونی لسەر خۆ کێم کەت❗، ڤێجا دێ د ماوێ نێزیکی دو یان سێ دەمژمێران دا ب یاسایێن بەرکارێن ڤێ یاریێ، وان خەمێن خۆ یێن نە سەروەرییا یاسایێ و نەدادیێ ڤەڕەڤینیت و ناخێ خۆ ب جێبەجێکرنا یاسایێن کونکانێ ئاسودەکەت، لەوا ژی کەس ژ ێ یاریکەران ب پێنجەه و ئێک خالان کێمتر ناهێتە خوارێ، یاسا سەروەرە، و هەکە هاتە خوارێ ژی ب کێماسی دێ هێتە سڕکرن، و لدەمێ یاریێ دا، دادی و سەروەرییا یاسایێ د ناخێ یاریکەری و هەر سێ هەڤالێن دی یێن وی دا بەرجەستە و جێبەجێ دبیت، و ئەو هەستکرنا ب نەدادییا جڤاکی و نە سەروەرییا یاسایان دهێتە تێرکرن، و ئەو فشار و ئێش و دانێن وێ یێن دەرونی بۆ دەمەکی دهێنە پەنجکرن، لەوا ژی کونکان ل وارێن یاسا تێدا نە سەروەر و د دەردێ بێ دادییا جڤاکی دا دنالن، رێیەکە بۆ تێرکرنا خواستێن دەرونی یێن یارکەران ژبۆ دادگەریێ و یاسایێ!.
لڤێرە ژی یارییا کونکانێ ژ یارییەکا ب مەبەستا رابواردنێ و هەوڵەکا دویرکەفتنێ ژ روتینێ کاری و بارگرانییا ژیانێ، دبیتە ئاڵاڤەکێ قەرەبوکرنەڤا دەرونێ مرۆڤی یێ کو ب ئەگەرێ هەستکرن ب نەدادیێ و چەوساندن و نە سەروەرییا یاسایێ، دوچاری فشار و لێپرسینەڤا ویژانێ بووی، کو لدوماهیێ ژ بۆ دەمەکی ویژدانێ دەرمان و ئاسودە دکەت.