بێدەنگیا مرۆڤان ھزرکرنە ل دارشتنا بەرنامە و پلانێن مۆکۆم بۆ داھاتی ، دەمێ ل دیوانخانەکێ پسیارێن زەحمەت ل کەسێن دان عەمر و بیرمەند دھێتەکرن ، بێ ھزرکرن و بێدەنگیێ بەرسڤ ناھێتەدان ، داکۆ بەسڤا ھەژی و جھێ خۆ بیت ، بەرسڤ دانا بلەز ژی زۆر جاران مرۆڤی تۆشی پەشێمانیێ دکەت . نەخاسمە بۆ کەسێن سیاسەتمەدار و سەرکردە .
پشتی روودانێن شازدێ ئکتۆبەرا سالا ٢٠١٧ و وان ھەمی پیلانێن دژی گەلێ کورد و دەسکەفتێن مە یێ، نەتەوی و نشتیمانی ھاتینە دارشتن و کارەساتێن بسەرێ مە ئینای ل کەرکووکێ و دەڤەرێن کوردستانی یێن دەرڤەی ئیدارا ھەرێما کوردستانێ ، مەزناھی و رێکخستیا پیلانێ و ھێزا داگیرکەرا پشکەکا خەلکێ کوردستانێ بێ ئۆمێد کربوو ، چونکی پیلانەکا دارشتیا مەزنتر بوو ل شیانێن ھەرێما کوردستانێ نەخاسمە ژلایێ لەشکری و ئابووری ، لەوما دوژمن و دیڤەلانکێن وان د پشت راست بوون ب سەرکەفتنا پیلان و بەرنامێ خۆ یێ ژناڤبرنا قەوارێ ھەرێما کوردستانێ .
لێ بێدەنگیا کورتا چەند رۆژی یا نێچیرڤان بارزانی سەرۆکێ نھو یێ ھەرێما کوردستانێ و سەرۆک وەزیرێن وی دەمی ، پشتی خۆراگری و بەرخۆدانا پێشمەرگەھێن کوردستانێ ب پشتەڤانیا خەلکێ کوردستانێ ، ب پەیوەندیێ، خۆ یێن سیاسی و دبلۆماسی چ ب ئاشکرا یان نھێنە ھەمی پیلان و بەرنامێن دۆژمن و داگیرکەرا ھەڵوەشاند و ھەرێما کوردستانێ وەکی ھێزەکا خۆرت و کاریگەر ئیناف سەر گۆرەپانا سیاسی ل دەڤەرێ و جیھانێ و لوی دەمی ھەتا نھو رۆژ بۆ رۆژ پێگەھێ ھەرێما کوردستانێ ژلایێ سیاسی و ئابووری و کارگێری بھێزتر دکەڤیت .
بێدەنگی و دیار نەبوونا نێچیرڤان بارزانی سەرۆکێ ھەرێما کوردستانێ ل گەناڵێن راگەھاندنێ لڤان رۆژان بیرا مرۆڤی لوان سەرکەفتن و سەروەریێن گەلێ کورد یێن پشتی روودانێن شازدێ ئکتۆبەرا سالا ٢٠١٧ دئینتەڤە .
ئەز باوەرم دڤێ بێدەنگیێ دا نێچیرڤان بارزانی یێ کارەکێ مەزن بۆ گەلێ کورد و بزاڤا رزگاریخوازیا کوردستانێ دکەت ، بتایبەت دوارێ دبلۆماسیەت و پەیوەندیان دا دگەل وەلات و سەرکردێن جیھانی .
سەرۆک نێچیرڤان بارزانی ئەو سەرکردە و کەسایەتی یە ھەمی دەم و ژیانا خۆ تەرخان کری بۆ بدەستڤەئنانا ماف و ئارمانجێن گەلێ کورد و پاراستن و پێشڤەبرنا دەسکەفتێن خەلکێ کوردستانێ و بھێزکرنا پێگەھێ ھەرێمێ لسەر ئاستێ نیڤ دەولەتی .
سەربۆرێن دەربازبووی ژی ئەڤ راستیە خۆیاکریە ، ڕەنگە بۆ ڕەشا ھەرێما کوردستانێ پێتڤیەکا فەر بیت ھەمی کار و گاڤێن سەرۆکێ ھەرێمێ ئێکسەر ل کەناڵێن راگەھاندنێ نەھێنە بەرچاڤکرن ، چونکی ھێشتا پیلان و بەرنامێن داگیرکار و دیڤەلانکێن وان دژی پێشڤەبرنا ئەزمۆنا ھەرێما کوردستانێ د بەردەوامن ، ژلایەکێ دیتر رەوشا دەڤەرا رۆژھەلاتا ناڤین بەرەڤ گۆرانکاری و ئاڵۆزیێن دژوار دچیت ، دبیتە ئەڤ ڕەوشە ببیتە ئەگەرێ دابەشبوونا ھەردوو وەڵاتێن عیراق و سووریا ، چونکی شەرێ ئەمریکا و ئیرانێ ھاتیە دناڤ ڤان ھەردوو وەلاتان دا و رۆژانە بەرژەوەندێن ئیرانێ دبینە ئارمانجێن فرۆکێن وەلاتێن نەدیار .
بۆ پاراستنا ھەرێما کوردستانێ ژی لڤی شەرێ پێشبینیکری پێتڤی ب دارشتنا پلان و بەرنامەکێ ھەمەلانی و درێژخایەن ھەیە . ئەڤ چەندە ژی ب خۆرتکرنا پەیوەندیێن دبلۆماسی لگەل وەلاتێن زرلھێزێن جیھانێ درۆست دبن ، سەرۆک نێچیرڤان بارزانی ژی ئەو سەرۆک سیاسەتمەدارە ئەوێ شیایی بەرژەوەندێن ھەرێما کوردستانێ لگەل بەرژەوەندێن وەلاتێن مەزن تێکەلی ئێک بکەت و تۆرەکا بەرفرە و ھەمەلایەنی یا پەیوەندیان لگەل پرانیا وەلاتێن گاریگەر لدەڤەرێ درۆست بکەت ، ئەڤەژی نیشانێ خۆ بەرھەڤکرنێ یە بۆ ھەر ئەگەرەکێ و بەرژەوەندێ، خەلکێ کوردستانێ دێ پێ ھێنە پاراستن .
ژلایەکێ پەیوەندیێن مۆکۆم لگەل ئەمریکا و ھەڤپەیمانێن وێ رۆژ بۆ رۆژا پێشڤە دچن ، ژلایەکێ دیتر پەیوەندیێن لگەل رووسیا نەخاسمە ژلایێ کەرتێ ووزێ ئەڤەژی پاڵپشتە بۆ پشتەڤانیا سیاسی ژی .
ھەروەسا پەیوەندیێن ھەرێما کوردستانێ لگەل ئیرانێ ھەڤسەنگی درۆست کریە .
برەنگەکێ گشتی ئەز دڤێ بێدەنگیا نێچیرڤان بارزانی دا یا ڤان رۆژان دەسکەفت و سەروەریێن مەزن بۆ گەلێ کورد دبین نەخاسمە ل وارێ چەسپاندنا بەند و ماددێن دەستوورێ عیراقێ یێن گرێدایی ب ھەرێما کوردستانێ و پرسێن ئابووری و بۆدجێ ھەرێمێ و کەرکووکێ و پشتەڤانیا زێدەتر ھەرێما کوردستانێ ژلایێ نیڤ دەولەتی . ئەڤەژی دێ بنە دەسکەفتەکێ دیتر لسەر وان ھەمی دەسکەفت و سەروەریێن گەلێ کورد لسەر دەستێ نێچیرڤان بارزانی سەرۆکێ ھەرێما کوردستانێ .