خویا کو ئێک ژ خالێن بھێز بۆ پێشکەفتن و گھۆرینا ھەر مللەتەکێ دئەڤرۆدا ب خواندن و زانستیڤە یا گرێدایە، ئەڤجا ب ھەر شێواز و میکانزمەکێ یان دھەر قوناغ و سەردەمەکێدا بیت. ھەلبەتە رەوشا خواندنێ ل ھەرێما کوردستانێ بگشتی بەریا دامەزراندنا پارتی دیموکراتی کوردستان وەکو حزبا سەرکێش ل باشورێ کوردستانێ دئاستێ پێتڤی دا نەبوو، بەلکو دگەل ژ دایکبوونا پارتی، شورەشێن مەزن دوارێ سیاسی و خەباتا چەکداری و گھورینێن جڤاکی و ئابوری و زانستی و مەعریفی پەیدابوون و کاریگەریەکا راستەوخۆ ل سەر ھوشمەندیا جڤاکێ کوردی پەیداکر. ئەڤە سەرەرایی رێگریکرنا بەردەواما دوژمنێ مللەتێ کورد ل سەر کونترولکرن یان نەچارکرنا مللەتێ کورد ل باشورێ کوردستانێ ب ھەمی رێکێن ھوڤانە ئەوێن دژی ھەمی خواست و حەزێن مرۆڤی. بەلێ پارتی و ئالیگرێن ئایدولوژیا رێبازا بارزانیێ گورەپان بۆ دۆژمنی بجە نەھێلا. بەلکو بەردەوامیی دا ئەڤێ رێبازا پیرۆز ھەتا سەرھەلدانا پیرۆز. ئێدی قوناغەکا نوی ل ھەرێما کوردستانێ دەسپێکر. بتایبەت پشتی دامەزراندنا حکومەتا ھەرێما کوردستانێ. گرنگیەکا زێدەتر ب کەرتێ خواندنێ بگشتی ھات دایین. نەمازە خواندنا بتایبەت ژی پشتی لێکدانا ھەردوو ئیداران و دروستبونا کابینا ئێکگرتیا حکومەتا ھەرێما کوردستانێ ل سالا ٢٠٠٥ێ کەرتێ خواندنا بلند چۆ دقوناغەکا نویدا، دامەزراندنا وەزارەتەکا تایبەت بنافئ وەزارەتا خواندنا بلند و فەکولینین زانستی...
، ئەوژی ب پالپشتیا حکومەتا ھەرێمی و ھەبوونا کەسانێن میناکێن وەکە نێچیرڤان بارزانی کو ل وی دەمی سەرۆکێ حکومەتا ھەرێما کوردستانێ بوو. ئەڤ کەرتە ھاتە ڤەژاندن ب ئەزمونداری و رولگێریا جەنابێ وێ ئێدی رەوشا خواندنا بلند بەر ب بلندبوونێ ڤە چوو. ژبەرکو ئەوی گرنگیەکا تایبەت دا ئەڤی کەرتی و بنیاتەکێ بھێز بۆ ئاڤاکر، ھەر لسەر ئەوی بنیاتی ئەڤ کەرتە رۆژ بۆ رۆژی و سال بۆ سالێ بەر ب قوناغێن باشتر وئاسویێن گەشتر برێڤەدچیت. ھەتا گەھشتیە سەردەمێ زێرینێ خۆ. کو دکارم بێژم ھەتا ئەڤرۆکەژی ھەمی ئەو گھۆرین و بەرەڤ پێشچوونێن کو کەرتێ خواندنا بلند بخوڤە دیتی دوارێ ھەبوونا ژمارەیەکا زۆرا زانکۆیێن حکومی کو نھا زێدەتری ١٩ زانکویێن حکومی و ٣ زانکۆیێن پولی تەکنیکی و ١٩ زانکۆیێن تایبەت و ناحکومی و زیدەتری ١٤ پەیمانگەھێن تایبەت ل باشورێ کوردستانێ ھەنە. ئەڤە د دەمەکێدا کو بەریا سەرھەلدانێ تنێ ٢ زانکۆیێن حکومی ل باشورێ کوردستانێ ھەبوون. ھەردیسان ھەر دھەمان بیاڤدا نێچیرڤان بارزانی گرنگیدا ب کەرتێ خواندنێ بگشتی و خواندنا بلند بتایبەت دھەمی کابینەیێن خودا ب بربرەیا پێشکەفتنا جڤاکێ دانابوو. ژبەرکو چڤاکێ خواندنا تاکەکێ ھوشیار و بەرھەمدار بەرھەم دئینیت. لەوڕا ھەر ل سایێ ئەڤێ دیدگەھێ ب ھەولو گاڤێن خۆ یێن دلسۆزانە جەنابێ وی بەردەوام بزاڤکریە خزمەت و خزمەتگوزاریا پێشکەشی ئەڤی بیاڤی بکەت. دوارێ دروستکرنا ئاڤاھیان و دابینکرنا پێتڤیێن ئەڤان زانکویان و ڤەکرنا تاقیگەھێن زانستیێن پێشکەفتی و دانان و پەیرەوکرنا سیستەم و رێکێن خواندنا پێشکەفتی ب ماف وەرگرتن ژ تەکنولوژیا سەردەم و ڤەکرنا خواندنا بلند ل ھەمی پشکێن ئەڤان زانکویان و بلند کرنا ئاستێ ئەڤان زانکویان دوارێ زانستی دا ب بەراورد دگەل ئاستێ زانکویێن عێراقێ، ھەروسا رەونەکرنا قوتابیان بۆ خواندنا بلند (ماستەر و دکتورا) ل وەلاتیێن پێشکەفتی و کو ھەتا نھاژی ئەڤ چەندە یا بەردەوامە. دیسان جھێ ئاماژەپێکرنێ یە کو بەرھەمێ ئەڤان زانکویا تا رادەیەکێ زۆر جڤاکەکێ ساخلەم و ھوشیار و خواندی بەرھەم ئینایە، کو سالانە ل ئەڤان زانکویا ب ھزاران فێرخواز دبیاڤێن جودا جودایێن زانستی دا دھێنە دناڤ جڤاکی دا خزمەتێ دبیاڤێ خودا دکەن. ئەڤەژی نیشانا وێ چەندێ یە کو کەرتێ خواندنا بلند ل باشورێ کوردستانێ دسەردەمێ زێرینێ خودا گوزەردکەت.