دەما ناڤێ شازدێ تەباخێ رۆژا دامەزراندنا پارتی دیموکراتی کوردستان دھێتە ئینان ئێکسەر ناڤ و رێبازا پیرۆزا بارزانی نەمر رێبەرێ کنیاتی و نەتەوی یێ گەلێ کورد و دامەزرێنەرێ پارتی دیموکراتی کوردستان دھێتە بیرا مرۆڤی ، ئەو رێبەرێ دامەزرێنەرێ قوتابخانا ھزرا نەتەوی و شۆرەشگێریا سەردەمانەیا کوردستانی دامەزراندی و ئەڤ قۆتابخانە بوویە رێبازەکا تایبەتا داخازیێن ماف و ئارمانجێن خەلکێ کوردستانێ ،
رێبازەکا پڕی سەروەری و دەسکەفت ، پڕی دادوەری و ڕەوشت بلندی ، پڕی خۆڕاگری و بەرگری ، رێبازا ئاشتیێ و دیموکراسیەتێ و وەک ھەڤیێ و لێبوورینێ .
رێبازەکا ب درێژاھیا ژیێ خۆ بوویە زانینگەھەکا پێگەھاندنا کەسانێن سەرکردە و کاریزما ، بۆ بەرەڤانیکرنێ ل گەلێ کورد و کوردستانێ ، رێبەر و سەرکردێن ھەمی رەوش و کاودانانا ، سەرکردێن سیاسی و ئیداری و دبلۆماسی و ئاڤەدانیێ و ئابووریێ و جڤاک ناسیێ .
نێچیرڤان بارزانی سەرۆکێ ھەرێما کوردستانێ ئێکە ل وان سەرکردێن بێ وێنە یێ ھەلگرێ ھەمی سالوخەتێن رێبەرایەتیێ و سەرکردەیی یێ ئێکە ل وان سەرکردێن ، دناڤ رێبازا پیرۆزا بارزانی نەمر پێگەھشتی و فێری بنەمایێن کوردایەتیێ و خاندنا رەوشا جڤاکێ کوردستانێ و خزمەتکرنێ بووی .
ئەگەر سیاسەت و سەرەدەریا رێزدار نێچیرڤان بارزانی سەرۆکێ ھەرێما کوردستانێ بخوونین بێ کۆ بزانین جێگرێ سەرۆکێ پارتی دیموکراتی کوردستانە ، دێ زانین کۆ سەرکردەکە ل قوتابخانا بارزانی نەمر فێری ڕەوشت بلندیێ و سیاسەتێ و دبلۆماسیەتێ بوویە ، سەرکردەیەکە کلیلێن ڤەکرنا چەندین دەرگەھان ددەستی دایە و ب ساناھی ڤەدکەت .
دزانیت سەرەدەریێ دگەل ھەمی رەوش و کاودانا بکەت ، دشێت درێکا ئاشتیێ و دبلۆماسیەتێ بەرژەوەندێن مللەتێ خۆ و وەلاتێ خۆ ب پارێزیت .
چەوا بارزانی نەمر بۆ وێ رەوش و سەردەمی پێتڤیەکا دیرۆکی بوویە ، لدەمێ بەرێ سەر سالا ئاشتیا جڤاکی پاراستی و درۆشمێ و کۆدەنگی دناڤ تەخ و چین و دەڤەرێن کوردستانێ درۆست کری بۆ بەرپاکرنا شۆرەشەکا نەتەوی و نشتیمانی و دژی زوڵم و زۆرداریێ و نە دادوەریێ راوەستا و جڤاکێ کوردستانێ فێری وەکھەڤیێ و دادوەریێ کری و ژلایێ سیاسی ژی د کاودانێ، دژوار دا شیا مۆرکا نەتەوی بپارێزیت و ب ھزرەکا دووبینانە سەرەدەریێ دگەل بەرامبەر بکەت و ھەردەم خاندنەکا راست و درۆست بۆ دۆست و دوژمنا دکر .
سەرۆک نێچیرڤان بارزانی ژی چ لدەمێ سەرۆکاتیا حکومەتا ھەرێما کوردستانێ ، یان ژی لدەمێ سەرۆکاتیا ھەرێما کوردستانێ ، ب ھەما شێوان ، لێ برەنگەکێ سەردەمانە و لدیف کاودانێن رۆژەڤێ سەرەدەری لگەل رەوشا سیاسی و ئابووری و جڤاکی و کارگێریا کوردستانێ کر و سەرکەفتنەکا بێ وێنە بدەستڤە ئینا .
کەسایەتیا سەرۆک نێچیرڤان بارزانی زۆر نێزیکە ل کەسایەتیا بارزانی نەمر ژلایێ تەوازعێ و نێزیک بوون ل تەخ و جڤاکێ کوردستانێ ، ژلایێ خزمەتکرنێ و ئاڤەدانیێ دیسان ئەم خزمەتێن لسەر دەستێ وی بۆ خەلکێ کوردستانێ ھاتینە ئاڤاکرن ناھێنە ھژمارتن چ ژلایێ چارسەرکرنا ئاریشێن خەلکی وەکی تاک بۆ نمۆنە چارەسەرکرنا نەساخا و ھاریکاریێن ماددی بۆ کەسێن پێتڤی ، یان گەھاندنا پرۆژێن ئاڤەدانیێ بۆ ھەمی دەڤەرێن کوردستانێ بێ جوداھی .
ژلایێ سیاسی ژی سەرۆک نێچیرڤان بارزانی ، زۆر ب دووربینی رەوشا کوردستانێ خاندی یە و شیایە سەرەدەریەکا زانستی و ساخلەم دگەل رەوشێ بکەت ، ھەر وەکی شیای پشتی روودانێن پشتی شازدێ ئکتۆبەرا سالا ٢٠١٧ ھەرێما کوردستانێ نە تنێ ل مەزنترین پیلانا ھەرێمی و نافخۆیی پاراست بەلکێ پێگەھێ ھەرێما کوردستانێ لسەر ئاستێ جیھانی بلنتر و بھێزتر کر .
ئەڤ سیاسەتا سەرۆک نێچیرڤان بارزانی بیرا مرۆڤی ل رەوشا کوردستانێ یا پشتی رێکەفتنا خیانەتکارای نیڤ نەتەوی یا ئەلجەزائیرا سالا ١٩٧٥ ێ دئینیت ، دەمێ ل رێنمایی یێن بارزانی نەمر و بسەرۆکاتیا سەرۆک مەسعوود بارزانی و روولێ بەرچاڤێ شەھیدێ ھەردەم ساخ ئیدریس بارزانی دئینیت ، کۆ شیای لدەمەکێ کورت دا بسەر رەوشێ زاڵ ببن و ب رەنگەکێ سەردەمانە شۆرەشا گۆڵانا پێشکەفتنخواز درێژیێ ب شۆرەشا ئیلۆنا مەزن بدەن و کاروانێ بزاڤا رزگاریخوازیا کوردستانی رانەوەستاند و بەەرڤ دەسکەفت و سەروەریێن مەزنتر بر .
سەرۆک نێچیرڤان بارزانی ل بارزانی نەمر فێربوویە کۆ ل سەرکەفتنا مەغروور نەبین و ل شکەستنا بێ ئۆمێد نەبین ، دەمێ ب سەرۆکاتیا نێچیرڤان بارزانی حکومەتا ھەرێما کوردستانێ د کۆپیتکا بھێزبوونا سیاسی و ئابووری دا ، تووشی مەغرووریێ نەبوو و لدەمێ پیلانا ھەرێمی دژی کوردستانێ و کابینا حکومەتا ھەرێمێ یا بسەرۆکاتیا جەنابێ وی ل ئکتۆبەرا سالا ٢٠١٧ و پشتی وێ ، پرانیا خەلک و ئالیێن سیاسی یێن کوردستانێ بێ ئۆمێد بوون ، لێ حیکمەتا سەرۆک نێچیرڤان بارزانی درۆژێن دەسپێکی یا ئۆمێد بۆ خەلکی درۆست کرەڤە و شیا لدەمەکێ ھەری کێم دا بسەر پیلان و وێ رەوشا دژوار دا زاڵ ببیت و ھەرێما کوردستانێ بەەرەڤ قۆناغەکا گەشتر ببەت و وەکی قەوارەیەکێ بھێز بینیتەڤ سەر ئاستێ نەخشتێ سیاسی و کارگێریێ جیھانێ و دەڤەرێ و ئۆمێدەکا گەش و بھێز بۆ خەلکێ کوردستانێ درۆست کریەڤە .
ئەڤ سیاسەت و رەفتار و سەرەدەریێن سەرۆک نێچیرڤان بارزانی دبێژنەمە سەرۆک نێچیرڤان بارزانی قوتابیەکێ سەرکەفتیی و پەیڕەوێ رێباز و زانینگەھا بارزانی نەمرە و پاشەرۆژەکا گەش و پڕ سەروەری و دەسکەفت و ئاڤەدانی و ئێمناھی و بەختەوەری بۆ خەلکێ کوردستانێ لسەر دەستێ وی ل پێشیا خەلکێ کوردستانێ یە .