سروشتێ پرانیا مروڤان ب وی ئاواییە ھندی ھزر ژ نەخوشیێن چوی دکەت ھندە ھزر ژ خوەشیا رابوری ناکەت , جڤاک ژی ھەر خوەدیێ ھەمان نەرینە . کورد ب درێژاھیا دیروکێ ریبریێ دەھان شێوازێن جینوسایدێ بوینە و ھەتا نھا ژی بەردەوامە و ئەڤ ئەقلیەتا حوکمدار و نەتەوەێن دەڤەرێ وەکی دئێتە بەرچاڤ دێ جینوساید و نەخوشی و بەرخودان و ئالوزی بەردەوام بن. و نابیت ھەر دەم تنێ کارێ کوردان شین و گری و تازی و رەش پوشی بیت ! فەرە بپرسین بوچی ھەر ھەمان سال ب ئێک شێواز بیرئینانا یادێن ئەنفال و جینوسایدا ؟ بوچی ھەتا نھا ئەڤ یادە نەبوینە ریدانەک جیھانی ؟ ئەرێ قوربانی دانا کوردان کێم بویە یان کارکرن بو ناساندنا وێ قوربانی دانێ کێمە و ھەتا نھا جیھان لێ ب خوەدی نەکەفتی یە؟ سالەک دیتر ژی ھەر ھەمان شێواز یادا قوربانیێن دەستێ شوڤینی و نەتەوەپەرست و فاشیەتێ بکەین ؟ کی بەرپرسە ژ پێش نەچون و کاریگەر نەبونا ڤان یادان ؟ دەھان پرسێن دیتر ژی دئێنە کرن .
گەلێ کورد چ روژ و ھەیڤ و سالەک نەھێلایە کو خوە گوری مروڤاتی و کوردایەتی و وەلاتپارێزیێ نەکر بیت ئانکو دیروکا کوردان واتا بەرخودان , نەبونا ھەفسەنگیا ھێزێ و ھەبونا ئەقلیەتا ستەمکار و دوژمنکار و فیرعەونانە ژ بال دوژمنێن کوردان ئانکو کوردو جینوساید ژ ێک دبن جمکەک و د گەل ھەڤدو دگەل دیروکێ دئێن! بیرئینانا ئەنفال کریان نابیت ھەر ب وی شێوازی بیت کو ئەم دبینین , فەرە دونیا ل ڤان کارەساتان ھایدار ببیت وەکی ئەرمنیان و جوھیان چاوا د بیاڤێ سیاسی و ئاینی و نەتەوەی دا کارەساتێن خوە ب دەلیڤە دیتن , نەبونا ڤان ریدانا ب ریدانێن جیھانێ ھەر ھەمی تاکەک کورد ژێ بەرپرسە ! تایبەت حکومەتا ھەرێما کوردستانێ و ھەمی سازیێن شەرعی د ھەرێمێ دا نونەرێن کورد ل بەغدا و دەرڤە و رەڤاندا کورد ل سەرانسەرێ جیھانێ و مەزنە بزنسمان و نڤیسەر و کەساتیێن ئولی و سیاسی و زانستی و پیشەیی و ھونەرمەند و وەرزشکار و پارتێن سیاسی وەک پێتڤی رولێ خوە نەبینی یە ژ دانە نیاسینا ڤێ ریدانا وەحشیگەرانە یا ریبریێ کوردان بوی , ئەم ھەمی کێم تەرخەمین و نابیت ل بازنەکا گرتی دابین و تنێ سالێ بو دەمەکێ کورت گوھێ خوە ژ ھندەک گوتارێن سیاسی و ئەدەبی بگرین جلێن رەش ژ بەر بکەین و روژا کار کرن و خەبات و بەرخودانا و قەرەبوکرن و ھایدار کرنا جیھانێ یە ب ستەمکاریێ نەک روژا جلێن رەش ! کوردان پتری نەتەوەیێن دەڤەرێ قوربانی داینە لێ گرنگ ئەوە تو چاوا ڤێ ریدانێ دکەیە کارتەک بو خزمەتا وەلاتی و ھێزا نەتەوە و پایێن دەولەتداری و دەست ڤەئینانا پشتەڤانیا جیھانێ , وەک ل سەری ھاتی ئەرمینیا و ئیسرائیل بەرھەمێ خەباتا لوبی کرن و دەست ڤەئینانا پشتەڤانیا جیھانێ بوی پشتی ریبریێ جینوسایدا تورک و نازیان بوی ل سەدێ بیستێ , واتا قوربانی دانا کوردان زور زورە لێ یا جھێ گازندێ ئەوە بوچی کوردان وەک نەتەوێن ستەم لێکری نەشیا دوزا خوە بگەھینن ئاستەکێ کو نھا پشتەڤانیی ژێ بێتەکرن . یا ئەڤ سال دیار کو وەک سالا چویی بو دێ سالەک دیتر ژی ھەر ھەمان شێواز بیت ! ژ بەرکو ستراتیجیەت و ئەولەویاتێن حکومەتا ھەرێمێ و گەلێ کورد بگشتی نەبویە کو ل سەر جیھانێ خەباتێ بو دەست ڤەئینانا ھزر و خەباتا ئەنفالکریا بکەن . ھەر ھەمی ئالیەک بەرپرسە ژ ڤێ رەوشا نھا کو کوردستانی تێدا و ل ھەمی پرسەکێ کێماسی ھەنە لێ د پرسا ئەنفال و جینوساید و قوربانیێن دەستێ ستەمکاران فەرە داوی پێ بێتە ئینان و کارەک جدی بێتە کرن .
د یادێن بھێت چ بیتە کرن ؟ پرسا ژ ھەمیان گرنگترە , ئەز دبێژم ئەڤ خالە گرنگەن و حکومەت و پەرلەمان ژی پرن ژ راوێژکاران و فەرە کار بکەن بو ھندێ ئەڤ یادە ببنە بیرئینانێن جیھانێ :
- گرێدانا کونفرانسێن نێڤدەولەتی ل پایتەختێن عەرەبی و ئیسلامی و ئەوروپی و ئەمریکی , بو ناساندنا جینوسایدێ .
- راگەھاندن ب زمانێن بیانی کار ل سەر راستیا جینوسایدا کوردان بکەت و راگەھاندنێن بیانی بێنە ڤەخاندن بو ڤان بیرئینانێن ئەنفالێ .
- ھنارتنا یاداشتان بو ئێکەتیا ئەوروپی و ئێکەتیا جیھانی یا زانایێن ئیسلامێ و نەتەوێن ئێکگرتی و دادگەھا نێڤدەولەتی و روسیا و چین و کومکارا عەرەبی و کونگرێ ئیسلامی و جڤاتا ھاریکاری یا کەنداڤی و ئێکەتیا ئەفریقی ... ھەر ھەمی رێکخراو و وەلاتێن کو کاریگەری ل سەر رایا جیھانی ھەبیت بو ھندی جینوساید ببیتە پرسەک جیھانی و پالپشتیا گەلێ کورد بێتە کرن .
- ھاندنا قوتابیێن کورد ل دەرڤە بو ھندێ ڤەکولینێن خاندنا بلند ل بیاڤێن زانستێن مروڤایەتی و وێژەیی تەرخان بکەن ب جینوسایدا گەلێ کورد ڤە .
- نونەراتیێن کوردستانی ل دەرڤە ب ھەفکاری دگەل حکومەت و سەروکاتیا ھەرێمێ و پەرلەمانی و رەڤاندا کورد سالانە یادێن مەزن بێنە کرن و پێشانگەە و پەرتوک ل سەر جینوسایدێ بێنە دروستکرن و ڤەکرن .
- دیرکرنا دەستێ حزبان ل بیرئینانێن جینوسایدێ کو ھەتا نھا ب روونی پێڤە دیارە .