بەریا نهوە ب پێنج سالان و پشتی رێکخراوا تیرۆرستیا داعش پارێزگەها نەینەوا و دەڤەرێن دەوروبەر داگیرکرین ب هێزەکا زۆرا مەزن داعش و هاریکاریا جیرانێن نەدۆست هێرشی قەزا شنگال و ناڤچەیێن بسەرڤە یێن ئێزدیان کر ئەو بوو کو هژمارەکا زۆرا مەزن ژ خەلکێ ئێزدی بووە قوربانی بگرە ژ کوشتنا زەلامان و رەڤاندنا کچ و ژن و زارۆکان و دەستدرێژیێ بۆ سەر وان کچ و ژنان و مەشقدانا زارۆکێن ئێزدی لسەر کارێن تیرۆری و ئاوارەبوونا خەلکێ وێ دەڤەرێ.

پشتی دوو مەهان ژ وێ کۆمکوژیێ و دەردەسەریا خەلکێ ئێزدی ئامارەکا دروست بۆ وان کچ و ژن و زارۆک و زەلامێن یێن کەفتینە دەستێ داعش دا هاتە چێکرن و هەر زوو ب بریارا بەرێز نێچیرڤان بارزانی کو وی دەمی سەرۆک وەزیرێن هەرێما کوردستانێ بوو نڤیسینگەهەک تایبەت بۆ رزگارکرنا رەڤاندیێن ئێزدی ل پارێزگەها دهۆکێ هاتە ڤەکرن.

رۆژ ب رۆژ هەول و بزاڤێن ڤێ نڤیسینگەهێ خورت تر دبوون بۆ رزگارکرنا هژمارەکا زێدەترا رەڤاندیان ب هاریکاری و پشتەڤانیا بەردەواما سەرۆک نێچیرڤان بارزانی ئەو بوو کو ناڤبری هەموو هەموو خەرجێن مادی هاڤێتنا سەر ملێ خوە و سۆز دا هەتا کو یەک کچا ئێزدی ل دەستێ داعش مابیت کارێ وان یێ بەردەوام بیت بۆ رزگارکرنا رەڤاندیان.

ئەڤە پێنج سال دەرباس دبن و هەتا نهوە ژی ب تەوجیهاتێن بەرێز نێچیرڤان بارزانی کار و خەبات و بزاڤا ڤێ نڤیسینگەهێ بۆ رزگارکرنا رەڤاندیێن ئێزدی ل هەر جهەکی بیت یا بەردەوامە و هەموو کادیرێن ڤێ نڤیسینگەهێ ب جدی و خەمخۆری لسەر وێ یەکێ کاردکن کو تەڤایا رەڤاندیێن ئێزدی رزگاربکەن.

ل وێ کۆمکوژیا بسەرێ ئێزدیان دا هاتی داعش 6417 کەسێن ئێزدی یێن بێ گوننەھ رەڤاندن و ل ماوێ پێنج سالێن دەرباس بووی دا ژی و لسەر تەوجیهاتێن بەرێز نێچیرڤان بارزانی و پشتەڤانیا وی یا ماددی و مەعنەوی و چەند هەڤالێن هاریکار ڤێ نڤیسینگەهێ کاری یە هەتا نهوە 3487 کەس ب رێکێن جودا جودا رزگاربکەت ژ وان ژی:
هژمارا زەلامان 337
هژمارا ژنان 1186
هژمارا زارۆکێن نێر 940
هژمارا زارۆکێن مێ 1024
هەروەسا و لدووڤ تەوجیهاتێن بەرێز نێچیرڤان بارزانی ئەڤ نڤیسینگەهە دێ یا بەردەوام بیت لسەر کار و بزاڤا خوە هەتا کو دووماهی کچ و ژنا ئێزدی ل دەستێ رێکخراوا تیرۆرستیا داعش دا بیت.

لەورا ژی ئەڤ یەکە بوویە جهێ دلخوەشیا جڤاکا ئێزدی و رۆلێ بەرێز نێچیرڤان بارزانی ب رۆلەکێ زێرین دزانن ل رزگارکرنا رەڤاندیێن ئێزدی کو هەر جهەکێ لێ هەبن برێیا ڤێ نڤیسینگەهێ بزاڤێن رزگارکرنێ تێنە کرن و هەر جارەکا کو رەڤاندیەکێ ئێزدی بهێنە رزگارکرن ب هیمەتا سەرۆک نێچیرڤان بارزانی گرنژین دکەڤیتە سەر دێمێ کەسوکارێن وان.