ماوەیەکە ھەرێما کوردستانێ بویە مەیدانا جەنگی دناڤبەرا پارتا کرێکارێن کوردستانێ و لەشکەرێ تورکیا کو ل گەلەک ناوچەیێن سنوری یێن دناڤبەرا ھەرێما کوردستانێ و وەلاتێ تورکیا دا ب بەردەوامی پێکدادان دروست دبن و بوینە ئەگەرێ نەساقامگیریێ ل ھەرێما کوردستانێ ، زێدەباری زیانێن گیانی و ماددی بەر ھاولاتیێن ھەرێما کوردستانێ ئێخستینە ، ھەر وەکی یا دیار بو دەما چەندین سالانە پارتا کرێکارێن کوردستانێ بارەگایێن خو ل ناوچەیێن جودا جودایێن ھەرێما کوردستانێ داناینە وەکو جھەک بو خو ڤەشارتنێ ژ ھێزێن تورکیا ، ژبەر ئەڤێ بیانویێ پارتا کرێکارێن کوردستانێ ب سەدان گوندێن ھەرێما کوردستانێ دەست ب سەر داگرتیە و ناھێلن خەلکێن ئەڤان گوندان سەرەدانا وارێن خوبکەن ، سنورێ خەباتا پارتا کرێکارێن کوردستانێ وەلاتێ تورکیا یە ، بەلێ د مێژوویا خو دا و ھەتا نوکە پارتا کرێکارێن کوردستانێ نەشیاینە رولەکێ ھوسان بگێرن کو کوردێن باکوور شانازیێ پێ بکەن ، بەلکو بەروڤاژی ب زوریکرنا زاروک و سنێلەیان بەرەڤ چیان ب مەرەما خەباتا چەکداری بو پارێزگاریا بەرژەوەندیێن چەند کەسەکان یان چەند گروپان ئەڤان سنێلەیێن کورد ب کوشتن ددەن ، زێدەباری وەرگرتنا باجێ ژ زوربەیا سەروک خێزانێن کورد ل ناوچەیێن کوردستانا باکور و ھاولاتیێن کوردێن باکوور یێن ل وەلاتێن ئەوروپا نێشتەجێ ب مەرەما ھاریکاری کرنا پارتا کرێکارێن کوردستانێ ، د نوکە دا رێژەیەکا بەرچاڤ ژ کوردێن باکوور نەرازیبون و تورەیی و گازندەیێن مەزن ل ھەمبەر سیاسەتا پارتا کرێکارێن کوردستانێ ھەیە ، باشترین گروڤە کێم بونا دەنگێن پارتێن کوردی ل ناوچەیێن کورد نشین ل وەلاتێ تورکیا ، بەردەوامیا ھێرشێن لەشکەرێ تورکیا بو سەر ئاخا ھەرێما کوردستانێ ھەبونا ھێزێن چەکداری یێن پارتا کرێکارێن کوردستانێ یە کو ژبلی جھێ مەترسیێ نە لسەر ئاسایشا وەلاتێ تورکیا ، د ھەمان دەم دا بوینە گەفەک لسەر ئاسایش و سەقامگیریا سیاسی ل ھەرێما کوردستانێ و ب بەردەوامی گرفتان ژبو ھەرێما کوردستانێ دروست دکەت ، ل شوینا پشتەڤانی کرن و پارێزگاریکرن ل کوردێن باشوور د نوکە دا روژ ب روژ پێکولا تێکدانا دەستکەفتی و ئارامی و سەقامگیریا ھەرێما کوردستانێ دکەن ، و بوینە ئالاڤەک ژبو خزمەتکرنا بەرژەوەندیێن ھندەک وەلاتێن دوژمنێن سەرسەختێن کوردان ، ب دیتنا من دنوکە دا و ل پاشەروژێ پارتا کرێکارێن کوردستانێ مەزنترین گەفە ژ بو تێکدانا رەوشا ھەرێما کوردستانێ ، لەوران باشترین بژاردە پێدڤیە پارتا کرێکارێن کوردستانێ ئاخا ھەرێما کوردستانآ چول بکەن و بەرەڤ وەلات و ئاخا خو بچن و خەباتێ ژبو کوردێن باکوور بکەن ژ پێخەمەت دەستخستنا مافێن کوردان ل باکوورێ کوردستانێ .