ھەردەما دەولەتێن کوردستان داگیرکری لاواز بوون و راستی گڤاشتنێن ناڤخۆیی و دەرڤە یێن بھێز بوون، دێ داخوازا دان و ستاندن و چارەسەریێ کەن ، و دەما بھێز بوون دێ ھەوێن ژناڤبرنێ ژ ئوپەڕاسیونێن سەربازی و دەستەسەرکرنا سیاسەتمەدار و تیرۆرکرنێ ل دژی گەلێ مە دەست پێکەن, خوینا مە رێژن!.
بۆ میناک، رێکەفتن و بەیانناما ١١ێ ئادارێ ١٩٧٠ێ، ئەوا حکومەتا عیراقآ ل گەل رێبەرێ کوردستانێ بارزانیێ نەمر مۆرکری، چونکە ل وی دەمی حکومەت یا لاواز بوو، پاشان ل ٦ێ ئادارێ ١٩٧٥ێ ئەو رێککەفتن ھاتە سڕکرن و ب رێککەفتننامە یا جەزائیرێ ل ناڤبەرا عیراق و ئیران ل جەزائیرێ ھاتە ئیمزاکرن، و شەڕ ل دژی گەلێ کوردستانێ ھاتە بەرپاکرن.
دستورێ عیراقێ یێ ٢٠٠٥ێ، کوردستانێ ب ھەموو ھێزا خۆ دوبارە عیراق ئاڤاکرەڤە، لێ ئەوێن بەرێ ل ناڤ چیایێن مە و ب خوارن و ئاڤا وەڵاتێ مە د ژیانێ دا ماین، دەما بووینە حوکمڕان، ھەموو ئەو مادێن پەیوەندی ب مافێن رامیاری و ئابووری و دارایی و ئازادی یێن گەلێ کوردستانێ ھەی سڕکرن، و پشتی ١٦ی ئوکتۆبەرێ سەرباز و ملیشیایێن حەشدا شەعبی بەربوونە گیانێ کوردستانێ، لێ دیسان یێن سەرکەفتی نەبوون!
ڤێ گاڤێ ژی لگەل ھێز و لایەنێن کوردان ل رۆژھەلات و رۆژئاڤا و باکور و باشورێ کوردستانێ و دویر ل چاڤێن راگەھاندنێ ل ناڤ وەڵاتی و ل وەڵاتێن بیانی، ھەوڵێن دانوستاندنێ دھێنە دان، لێ ھەرکو ئەو فشارێن ڤێ گاڤێ لسەر وان دەولەتان ھەی، نەمان، تە دیت حکومەتێن داگیرکار ھەوێن ژناڤبرن و قڕکرن و ئوپەراسیۆنێن لەشکەری لسەر ئاخ و ئاسمانێ وەڵاتێ مە و گەلێ مە ل ھەموو پارچێن کوردستانێ دەستپێکرن، و جڤینێن دوئالی، سێ ئالی و چارئالی دھێنە پێکئینان و رێکەفتن دناڤبەرا واندا دھێنە ئیمزاکرن، ژبۆ نەھێلانا گەلێ مە و ژناڤبرنا ھەر تشتەکێ بێھنا کوردان لێبھێت یان تاما کوردستانێ بدەت، و دەربڕینێ ژ ھەبوونا مللەتێ کورد بکەت.
ڤێجا ھەر تشتەکێ کوردان دھێتە قەدەغەکرن و دێ زیندانان تژی کورد کەن و گۆڕێن ب کوم و ئەنفالان بەرپادکەن، و تانک و فڕۆکە و سەربازان رەوانەی سەر گوند و باژێڕێن مە کوردان کەن، لدەمەکی ئەو چار دەولەت د چ تشتەکیدا ھەڤ دیتن و ئامانج و ئێکگرتی نینە، ژبلی لسەر دژایەتی و ژناڤبرنا ھەبوونا کورد و کوردستانێ، لەوا ژی دژایەتی کوردستانێ دڤان سەد ساڵان دا دروشمێ ھەڤبەشێ داگیرکەران بوویە و ھەردەم داگیرکەر کومکرینە و ھەتا ڤێ گاڤێ ژی رەوشەکە ب ڤی ئاوایی یە، ھەموو رێککەفتنێن وان لسەر نەھێلانا کوردان ھاتینە ئیمزاکرن و خوینا مە کوردان ب بەردەوامی دھێتە رێتن، بەھرا پێترێ ژ خوینا ل ھەر چوار وەلاتان دھێتە رێتن خوینا کوردانە، و ل ھەر پارچەکێ ب بەھانە و سوچەکێ کورد دھێنە بدارڤەکرن و زیندانیکرن، ل پارچەیەکێ ژ بەر کو ئێزدی یە و ریفراندوم چییە و ژ ئێکا دی ژبەر ئاخفتنا ب زمانێ کوردی، و ھەتا دوماھیێ ژ سۆچ و بەھانەیان، لێ ھەر کوردە دھێتە کوشتن و دەربەدەرکرن و دبیتە خوارنا ماسی یێن دەریا ئیجە.
لێ راستی ھەرمان یا کوردانە.. و ھەر دێ بمینن، و ئەو دەولەت و سەرۆک و سیاسەت و رێکەفتن و پیلانێن دژبەری کوردان دڤان سەد ساڵێن بووریدا، دوچاری شکەستنێ بووینە، ڤان دەولەتان ژی ژ نە ئارامی و وێرانکاریێ و زیانێن مرۆڤی و ئابووری و دارایی بۆ دەولەت و مللەتێ خۆ و نەتەوە یێن ھەر چوار وەڵاتان و ھەموو رۆژھەلاتا ناڤێن چ تشتەکێ دی ب دەستڤە نەئینایە.
ئەرێ مللەتێ کورد دێ ھەیا کەنگی لژێر گەفێن تۆپ و بومبەیان دا بیت؟ ما ھەکە ئەو پارەیێ ب بومب و تۆپ و تانکداین، ل ئاڤاکرنا وەڵاتی و ئاشتیێ دا خەرجکربان برایەتی و ئاشتی بەرپا نەدبوو؟ ما ھون ھێش ژ کوشتن و وێرانکرن و قڕکرنێ تێر نەبوون!، ئەوا ب کوردان ڤە گرێدایە، کورد ژ خەبات و بەرخودان و جانگوریکرنێ بۆ ژیانەکا ئازاد و ب رومەت و وەکھەڤ بەردەوامە، و چ جار ماندی و بێزار نابیت، داکو وەڵاتەکێ مرۆڤانە و دادپەروەر و دیموکراس ئاڤا بکەت و گەلێن دەڤەرێ د ئاشتیێ دا بژین و بەختەوەری بۆ ھەموویان بەرپاببیت، چونکە بەختەوەرییا کوردان دێ بیتە سەدەما بەختەوەرییا فارس و تورک و عەرەبان و ھەموو پێکھاتێن رەسەنێن دەڤەرێ.