قوتابی دەولەمەندترین چینا جڤاک و کۆمەلگەهێ و دەولەتێ یە ، بەرەبابێ پێشکەفتی یێ گەل و وەلاتی یە ، پەرەپێدانا شیان و حەزێن قوتابی ئەرکێ سەرەکیێ هەر سازیەکێ یە چونکی بهێزکرن و بناغە دانانا بنچینە شیانێن قوتابی ئاسۆیەکێ پرشنگدار و گەشە بۆ مسۆگەرکرنا ئایندەیێ قوتابیان ، زانست و بلندکرنا ئاستێ زانینا قوتابی دروستکرنا ناڤەندیێن بلندیێن وەلاتی نە. ئەگەر بەحس ل پرۆسەیا پەروەردێ ب گشتی ل کوردستانێ بکەین نەخاسمە باندۆر و کاریگەریا وێ ل سەر قوتابیان تا رادەیەکێ د ئاستەکێ پێشکەفتی دا بوویە تایبەت ئەڤ سال بەراورد ب سالێن چووی ئاستێ زانستی باشتر بوویە ل هەرێمێ ، پرۆژە و پلانێن سەرکەفتی هاتینە دارێژتن پێخەمەت سەرخستنا ئاستێ زانستی یێ قوتابیان بەلێ کێم و کاسی ژی هەبووینە و وەک پێدڤی هێشتا مایە ، بەلێ ئەڤێ چەندێ ژی سەدەمێن خۆ هەنە نەخاسمە وێ دورپێچا ئابوری لسەر هەرێمێ ژ لایێ بەغدا ، برینا میزانیێ و پشکە بۆدجەیا هەرێمێ تەنانەت ئەو بەشە بۆدجەیا بۆ پرۆژەیان دهات مەزاختن ، هاتنا شەرێ داعش و هەبوونا ڤشارەکا زۆرا ئاوارە و پەنابەران بۆ ئاخا کوردستانێ ، ئەڤە هەمی رێگر بووینە ل بەردەم جێبەجێنەکرنا پرۆژە و پلانێن ستراتیژی و داخوازی و مافێن قوتابیان ژ لایێ حکومەتا هەرێمێ ، لەورا د کابینەیا داهاتی یا حکومەتێ چاڤەرێ پشتبەستن و بەرچاڤ رونیەکا زێدەترین ژ حکومەتێ ل سەر کۆیا پرۆسەیا پەروەردێ و داخوازی و بەشە مافێن قوتابیان. بەلێ جهێ داخێ یە ئەڤرۆ قوتابی بووینە کەرەستەک بۆ مۆزایدەیێن سیاسی و بێ بەرچاڤ وەرگرتنا پاشەرۆژ و خواستێن قوتابی کو دهێتە بکارئینان ژ بۆ هندەک مەرەمێن بەرژەوەندیخواز ، لەورا ب گرنگ و پێدڤی دزانم مافێ هیچ کەسەکێ نینە قوتابی وەکو ئامرازەک ژ بۆ گەهاندنا هندەک تشتان بکاربینیت ، تایبەت درۆژەڤا نهۆ دا و بابەتێ داوی هاتن ب پرۆسەیا ئەزموونێن گشتی یێن ڤێ داوی یێن پۆلا ۱۲ێ ئامادەیێ کو هندەک ئالی دخازن ڤشاریێن سیاسی و دەروونی بێخنە ل سەر قوتابی کو ئەڤە د خزمەتا قوتابی دا نینە بەلکو دڤێت ب هەڤرا کاربکەین بۆ پێگەهشتن و دەستڤەئینانا مافێن قوتابی. هەژی یە بێژین ئێکەتیا قوتابیێن کوردستانێ وەک بلندترین رێکخراوا قوتابیان ل سەر ئاستێ کوردستان و عیراقێ بەرگریکارەکا راستەقینەیا تەڤ ماف و داخوازیێن قوتابیان بوویە و هەولدایە ب رێکێن زانستیانە گشت لێکولین و دیڤچوونێ بکەت بۆ هەر کێم و کاسی و لاوازیەکا هەبیت ل بەردەم ماف و کێشە و ئاریشێن قوتابیان داکو هیچ مافەکێ قوتابی بەرزە نەبیت ، بەلکو دگەل ئالیێن پەیوەندی دار د هەماهەنگی و پێرابوون و دیڤچوونێ دابوویە بۆ هندێ هەموو کێشە بهێن چارەسەرکرن و مافێن رەوا و بنەرەتێن قوتابیان بێ جیاوازی بهێنە مسۆگەرکرن. چونکە ئێکەتیا قوتابیێن کوردستانێ خودان مێژوویەکا پر سەروەریە ل پێناڤ خەباتکرن بۆ دەستڤەئینانا مافێن قوتابی و سەر مەشقا خەباتا رێکخراوەی و پیشەی یە ، رۆلەکێ پر بزاڤ ل خزمەتکرنا خواستێن تۆێژا قوتابیان دا گێرایە هەروەسا بەژداریەکا کارا کریە د گەشەپێدانا سیستەمێ خواندن و پەروەردێ دا ، لەورا تێکوشین و خەباتکرن ل پێناڤ بەرژەوەندیخوازا قوتابیان ئەرکێ سەرەکی یێ ئێکەتیا قوتابیێن کوردستانێ بوویە.