سەرەدانا نێچیرڤان بارزانی وەک سەروکێ هەرێمێ بۆ بەغدايا پايتةختێ عيراقا فیدرال ب مەرەما چارەکرنا ئاريشەیێن مايی دناڤبەرا هەڤلێر و حکومەتا ناڤەندی ب ڕێکێن نەرم و دان و ستاندن و دیپلوماسی ئێکە ژ وان بنەمایێن کاری ئەوێن کو ب درێژاهیا ژیانا خویا سیاسی کار پێ کری و پێشتریش د چەندین ڕویدان و کێشە و هەڤڕکێین سیاسیدا چ لسەر ئاستێ ناڤخویی و چ ئاستێ هەرێمی ب میکانزمێن نەرم و دیپلوماسی ئەو ئاریشە و بەرتەنگیێن سیاسی د بەرژەوەندیا هەرێما کوردستانێ ئێکلایی کرینە. نموونا هەری بەرچاڤا ڤێ سیاسەت و کار کرنا نیچیرڤان بارزانی دوخێ سیاسی یێ پشتی 16 ێ ئوکتوبەرێیە کا چەوا شیا هەمی وان ئاستەنک و دورپێچان لسەر کوردستانێ بشکێنیت ئەوێن ژلایێ وەڵاتێن جیران و حکومەتا ناڤەندی و میلیشیایێن مەزهەبی دژی کوردستانێ دهاتنە ئەنجام دان هەر ژ ئێرشێن سەربازی و گرتن و دروست کرنا ئاستەنگا ل دەریێن سنوری و دائێخستنا فڕۆکەخانێن هەرێمێ کو دەرگەهەک بوون بۆ گەیاندنا دەنگێ کوردا بۆ جیهانێ، سەرباری ڤان هەمی ئاستەنگا نێچیرڤان بارزانی شیا ب ڕێکا پەیوەندیێن خویێن دیپلوماسی خوە بگەهینیتە دەرڤەی هەرێمێ و دیدار و چاڤ پێکەفتنا دگەل مەزنە کاربدەستێن ئەوروپی ئەنجام بدەت و ئەوژی ژلایێ خوڤە کار بۆ ئاسایی کرنا پەیوەندیا دناڤبەرا هەرێم و بەغدادا بکەن کو زمانێ دیپلوماسی هەڵبژاردنا ئێکێ بیت و جەنگ و زمانێ زڤر داوی ڕێکا ئاسایی کرنەڤا پەیوەندیان بیت، هەلبەت سەرباری ڤی ڕولێ گرنگێ کاک نێچیرڤانی نابیت ڕول و هێزا پێشمەرگێ کوردستانێ بهێتە ژبیر کرن ل ڕویدانێن پشتی شازدێ ئوکتوبەرێ کو بەغدا و وەڵاتێن جیرانژی تێگەهاندن ژبلی ڕوینشتن و مێزێن دان و ستاندنێ هەمی ڕێکێن دی نە دگونجایینە بۆ سەرەدەری کرن و ژیانا سیاسی یا کوردا ل باشورێ کوردستانێ و حکومەتا ناڤەندی و هەڤسویێن وێ.
پشتی پێک ئینانا حكومةتا نوى ياعيراقا فيدرال ب سةروكاتيا بەڕێز عادل عبدالمهدى و هەڵبژارتنا بەڕێز نێچیرڤان بارزانی وەک سەروكێ نوى يێ هەرێما كوردستانێ، وەسا دهێتە پێش بینی کرن کو پێنگاڤێن پتر و ب لەزتر دێ هێنە هاڤێتن بۆ چارەکرنا ئاریشێن مایی یێن دناڤبەرا هەڤلێر و بەغدا ژ بەر شێوازێ کار و ڕولێ سەروکێ نوی یێ هەرێمێ كو یێ بەرنیاسە ب چارەکەرێ وان کێشە و ململانێیا ئەوێن دمیننە هلاویستی و دگەل مایتێکرنا وی ب وان کێشە و ململانێیا ئەگەر ب درستیش نەهێنە چارەکرن پێنگاڤێن مەزن دهێنە هاڤێتن بەرەڤ چارەکرنا وان.
گومان تێدا نینە کو هەرێم و بەغدا چەندین کێشێن جەوهەری دناڤبەرا واندا هەنە و هەتا ئەڤ کێشە نەهێنە چارە کرن و ئێکلایی کرن نەشێین بەحسێ پەیوەندیێن باش دناڤبەرا هەرێم و بەغدادا بکەین، بۆ نموونه ماددێ ١٤٠ێ دستورێ عیراقێ و موچە و نەفت و گاز و پێشمەرگە و چەندین ئاریشێن دی یێن سیاسی کو ب ڕێکا ڤان جورە سەرەدانا و شێوازێ سیاسی یێ کار کرنا نێچیرڤان بارزانی خەلکی هیڤی هەنە بهێنە چارە کرن. ئەڤڕۆ چاڤێن هەر تاکەکێ كورد و حەتا دشێین بێژین جيهانێ و ڕۆژهەلاتا ناڤینژی لسەر سەرەدان و لڤینێن سیاسی یێن سةروكێ هةرێمێنە لسەر ئاستێ ناڤخویی و هەرێمی و نێڤ دەولەتی لێ بۆ هەمیا یا گرنگە کانێ چەوا سەروک دێ شێت پەیوەندیێن موکم دناڤبەرا ئالیێن سیاسی یێن باشورێ کوردستانێدا چێکەت و تا چەند بەغدا و هەڤلێرێ دێ لێک نزیک کەت، چونکە ئەنجامدانا ڤان هەردووکا دێ وێ باوەڕیێ دەتە وەڵاتێن جیران و نیڤ دەولەتی کو هەم هەرێم، هەمژی دامەزراوا سەروکاتیا هەرێمێ دڤێت ب ڕێکێن نەرم و دیپلوماسی سەرەدەریێ دگەل دەوروبەرێ خو بکەن د هەمی بواراندا و مە هیڤی هەنە ب هەبوونا نێچیرڤان بارزانی د ڤێ دامەزراوا گرنگ دا ئەو چەندە دێ هێتە ڕویدان و دوخێ سیاسیژی دێ خوشتر و ئاسانتر بیت ژبوی شێوازێ کارێ نێچیرڤان بارزانی.