پشتی ئەنجامدانا ریفراندوما سەربەخویا ھەرێما کوردستانێ ل ٢٥ ی ئەیلولا سالا ٢٠١٧ کو گەلێ کورد ب زورینەیا دەنگێن بەلێ بو سەربەخویا کوردستانێ داخازا جودابونێ ژ عیراقا فیدرال خاست ، پشتی ئەڤ دەستکەفتێ مەزن د دیروکا ملەتێ کورد دا ھاتیە پێش ، ئێدی چەندین رویدان و پێشھاتێن چاڤەرێکری ژ حکومەتا عیراقا فیدرال ھاتنە پێش ب سزادانا گەلێ کورد وەک سەپەندنا ئابلوقەیێن ئابووری و سیاسی و ڤەگوھاستنێ و داخازا گرتنا سنورێن وەلاتێن دەوروبەری ھەرێما کوردستانێ ، زێدەباری راگرتنا مووچەیێن فەرمانبەرێن ھەرێما کوردستانێ و کێمکرنا بودجەیا ھەرێما کوردستانێ تا گەھشتیە رادەیێ لڤاندنا ھێزا سەربازی ل دژی ھەرێما کوردستانێ ، ئەڤ چەندا ھەنێ ھاتە رویدان ژبەرکو ھاولاتیێن کوردستانی بتنێ داخازا ئێک ژ مافێن خو یێن رەوا کر ، پەیوەندیێن ھەرێما کوردستانێ و عیراقا فیدرال گەھشتنە خرابترین ئاست ، سەرەرای ئەوان ھەمی ئابلوقەیێن جورا و جورێن حکومەتا عیراقێ لسەر ھەرێما کوردستانێ سەپاندین گەلێ کوردستانێ د بلندترین ئاستێ خوراگریێ دابون ، پاشان ژ ئەگەرێ نە پەیدابوونا چ ھزرێن خوین رشتنێ دناڤبەرا ھەولێر و بەغدا و خیانەتا روی رەشێن ١٦ ی ئکتوبەرا سالا ٢٠١٧ بریارا سرکرنا ئەنجامێن ریفراندوما سەربەخویا ھەرێما کوردستانێ ھاتەدان ل ٢٥ ئکتوبەرا سالا ٢٠١٧ ، پاشان ھەولێر و بەغدا ژ قوناغا ھەلگرتنا چەکی بەرەڤ قوناغا دان و ستاندنێ ڤە دەرباز بوون ، ب تایبەتی رولێ سەروک وەزیرێن ھەرێما کوردستانێ ل وی دەمی (نێچیرڤان بارزانی) کو شیا ب ھێزا خوە یا دبلوماسی چەندین پێشڤەچونێن نوی دناڤبەرا ھەولێر و بەغدا پەیدا بکەت ، پشتی کو ل ٢٥ گولانا سالا ٢٠١٩ (نێچیرڤان بارزانی) ھاتیە ھەلبژارتن وەک سەروکێ نوی یێ ھەرێما کوردستانێ ، گەلێ عیراقێ ب گشتی و ھەرێما کوردستانێ ب تایبەتی گەشبینن ب رولێ وی یێ کاریگەر د پێشڤەبرنا پەیوەندیێن ھەرێما کوردستانێ و عیراقا فیدرال دا ، ئێکەم سەرەدانا سەروکێ ھەرێما کوردستانێ (نێچیرڤان بارزانی) بو بەغدا ل ٢٠ خزیرانا سالا ٢٠١٩ و کومبونا سەروکێ ھەرێما کوردستانێ دگەل سەروک کومارێ عیراقێ و سەروک وەزیرێن عیراقێ و سەروک پەرلەمانێ عیراقێ ، کو ئارمانج ژێ پێکولا چارەسەرکرنا ئەوان بابەتانە یێن کو تا نوکە ماینە ھلاویستی و نەھاتینە چارەکرن ژ لایێ حکومەتێن دەرباز بوی یێن عیراقێ ڤە ، لەورا کاروانێ سەروکێ نوی یێ ھەرێما کوردستانێ ژبو بھێزکرنا پێگەھێ ھەرێما کوردستانێ ژ بەغدا یا پایتەختێ عیراقێ دەست پێکر، قوناغا نوی یا دناڤبەرا حکومەتا عیراقێ و ھەرێما کوردستانێ دا گەشبینی دیارە د چارەسەرکرنا پرسگرێکێن ھەلاویستی دا .