ناکوکی ئەو بارودوخە یێ نە ئارام یان فشارا دەروونی ئەوا دروست دبیت ژ ئەگەرێ نە رێک کەفتنێ دناڤبەرا دوو لایەنان یان ژی زێدەتر ژبەر پێدڤیێن تاکە کەسی و گروپ و پارتان ، ناکوکی دھێـتە ھژمارتن ئێک ژ ئەوان دیاردەیان یێن کو ل دەمێن کەڤنار دا ل دەڤ تاکە کەسان ھەبوویە و یا بەردەوامە لسەر دەستھەلاتێ یان ژی ھەر کارەکێ ئارمانجان وان دناڤ دا ھەبیت ، ناکوکیا سیاسی ھەڤرکیەکا تایبەتە دناڤبەرا مروڤان دا بو ب دەستڤەئینانا دەستھەلاتێ یان وەرگرتنا ھندەک پاداشتان ، ئەو لایەنێن ئەڤێ ھەڤرکیێ دکەن خواندنەکا دوور بو دکەن ، ئەگەر بو وان دیار بوو کو ل پاشەروژێ دێ رویدان ھێنە پێش نەچار دبیت بەرەڤ وەرگرتنا ھەلویستان دچیت ب پێچەوانەی لایەنێ بەرامبەر ، قەبارێ ئەڤێ ھەڤرکیآ یێ گرێدایە ب قەبارێ ئەوێ ئارمانجێ ڤە ، ئارمانج چەند مەزنتربیت ھەڤرکی دێ رژد و دژوارتر بیت ، ھندەک سیستەمێن سیاسی شیان ھەنە خو لبەر ئەڤان ھەڤرکیان بگرن و ھندەک سیستەم نەشێن خو لبەر بگرن لەورا بەرەڤ لاواز بون و نەمانێ ڤە دچن ، پێکڤە گرێدانەکا موکم دناڤبەرا ھەڤرکیێن ئابووری و سیاسی و رەوشەنبیری ھەیە لەورا جڤاک ھەمی ب ئەڤان ھەڤرکیا ڤە یێ گرێدایە ، پشتی کو ھەلبژارتنێن پەرلەمانێ ھەرێما کوردستانێ ھاتینە ئەنجام دان ل ٣٠ ئەیلولا سالا ٢٠١٨ و پاش راگەھاندنا ئەنجامان ، ھندەک لایەنێن سیاسی پێکولا ئەوێ چەندێ دابون کو زێدەتر ژ پێگەە و دەنگێن خو پلە و پوستەیێن زێدەتر ب دەست ڤە بینن ، سەرەرای ھندێ کو ئەو پارت خوە ب دیموکراسی ژی بناڤ ددانن !
لڤێرێ ھەڤرکیا سیاسی دناڤبەرا دوو پارتێن سەرەکی یێن ھەرێما کوردستانێ روویدا کو پارتی دیموکراتی کوردستان و ئێکەتیا نیشتیمانی یا کوردستانی نە ، سەرەرای چەندین دان و ستاندێن ئاشتیانە و دبلوماسی یێن بەردەوامێن پارتی دیموکراتی کوردستان و ئیمزاکرنا رێکەفتنامێن دوو قولی دناڤبەرا پارتێن سیاسی دا ژ پێخەمەت زوی ب دەست ب کارکرنا کابینەی نوی یا حکومەتا ھەرێما کوردستانێ ، لێ دەما پارتەک یان لایەنەک ھەست ب کێم بونا پێگەھێ خو دکەت ئێدی دەست ب وەرگرتنا ھندەک رەفتارێن نە رەوا دکەت و ھەڤرکیا سیاسی لسەر دەستڤەئینانا ھندەک ئارمانجێن پارتایەتی یێن دوور ژ نەتەوەی و نیشتیمانی دکەت ، ئێکەتیا نیشتیمانی یا کوردستانی کار ژ بو گیروکرنا پروسەیا سیاسی یا نوی ل ھەرێما کوردستانێ کر ، سەرەرای پێشێلکرنا وان رێکەفتنامێن دناڤبەرا پارتی دیموکراتی کوردستان و ئێکەتیا نیشتیمانی یا کوردستانی ، پشتی کومبونا پەرلەمانێ کوردستانێ ل رێکەفتی ٢٨ گولانا سالا ٢٠١٩ لدور ھەلبژارتنا سەروکێ نوی یێ ھەرێما کوردستانێ ، سەرەرای ھندێ کو ھندەک لایەنێن سیاسی ھەڤرکیێن سیاسی ب پەکخستنا ھەلبژارتنا سەروکێ نوی یێ ھەرێما کوردستانێ ڤە گرێدان ، زێدەباری لاوازیا رولێ وان ، پەرلەمانێ ھەرێما کوردستانێ شیان ب زوریەنەیا دەنگان دووەمین سەروکێ ھەرێما کوردستانێ (نێچیرڤان بارزانی) ب ھەلبژێرن ، ل رێکەفتی ١١ خزیرانا سالا ٢٠١٩ ل رێورەسمێن سویند خارنا سەروکێ نوی یێ ھەرێما کوردستانێ (نێچیرڤان بارزانی) کو ئەڤ رێورەسمە ژ کومبونەکا ھەرە مەزنا دبلوماسی یا دەڤەرا روژھەلاتا ناڤەراست دھێتە ھژمارتن کو ب ئامادەبوونا ژمارەکا ئێکجارا مەزن ژ نوینەرێن وەلات و پارت و لایەنێن سیاسی یێن ھەمەجور ھاتە برێڤەبرن ، د گوتارا سەروکآ نوی ھەرێما کوردستانێ دا ئاماژە ب خالەکا گەلەک گرنگ دا ئەو ژی دا دیارکرن کو ھەڤرکیێن سیاسی دێ ھەر ھەبن و تشتەکێ ئاسایی یە لێ بلا ھزرکرنا مە ناکوک نەبیت ، دیسان ئاماژە دا کو ل شوینا ئەم کار لسەر بنپێکرنا پێگەھێن ئێک دوو بکەین بلا کار لسەر بنیاتەکێ نوی بکەین بو ڤەدیتنا چارەسەریێن ھەڤپشک بو ئایندەکێ گەش ژ بو ھەرێما کوردستانێ ، لڤێرێ بومە دیار دبیت کو کارێ داھاتیێ سەروکێ ھەرێما کوردستانێ دێ گرنگیەکا مەزن ب کێمکرنا ھەڤرکیێن سیاسی لسەر ئاستێ ھەرێما کوردستانێ کەتن ، و بزاڤا ئێک رێز کرنەکا سەرتاسەری کەت لسەر ئاستێ پارتێن سیاسی یێن ھەرێما کوردستانێ ژ پێخەمەت دەستڤەئینانا ھیڤیێن مەزن یێن نیشیتیمانی و دویر ژ بەرژەوەندیێن بەرتەنگێن پارتایەتی .