پشتى هه‌لبژارتنا نێچیرڤان بارزانى وه‌كو سه‌رۆكێ هه‌رێما كوردستانێ، ب دەیان پیروزباهی لسەر ئاستێ هەرێمی و نێڤ دەولەتی چ ژ لایێ سەروکێن حکومەتا وە چ ژ لایێ وەزیرێن دەرڤە و کونسولێن گشتی یێن وان وەڵاتا ل عیراقێ و کار ب دەستێن نەتەوێن هەڤگرتی یێت لێ هاتیە کرن و خوشحالیا خو دەردبڕن بو هەڤکاری کرن و کار کرنا هەڤبەش دگەل ویدا. ئەڤەش ڕامانا وێ چەندێ دگەهینیت کو نێچیرڤان بارزانی کەسەکێ مەقبوولە ل دەڤ حکومەتێن وەڵاتێن بیانی و د پەیام و پیروزباهیێن خودا ب کەسەکێ هەژی و گونجایی دبینن ژ بۆی وەرگرتنا پوستێ سەروکاتیا هەرێما کوردستانێ. ئەڤ چەندەش دێ بیتە پالنەرەکێ باش بۆ خوشتر کرنا پەیوەندیێن دیپلوماسی دناڤبەر هەرێم و وەڵاتێن دیدا و بێگومان خوشبوون و موکم بوونا پەیوەەندیێن سیاسی و دیپلوماسی ل داویێدا دێ بنە ئەگەر و کاریگەریەکا باش لسەر پەیوەندیێن ئابوری هێنە دانان کو ئەڤرۆکە کوردستانێ پتر ژ هەمی تشتەکێ پێتڤیا وێ یا پێ هەی.
ئەڤ ڕازی بوون و خوشحالیا کومەلگەها نێڤ دەولەتی ب دەستنیشان کرنا نێچیرڤان بارزانی وەک سەروک د ڤاڵەهیێدا نەهاتیە، بەلکو خوشحالیا وان ڤەدگەریتەڤە بۆ ڕوڵێ کاک نێچیرڤانی د کابینێن حکومەتێن هەرێمێدا و کار و بزاڤ و خەمخوریا وی ژبۆ پێش ئێخستنا کوردستانێ و پێشکەش کرنا زورترین خزمەتگوزاریێن دشیاندا هەی بۆ هەڤوەلاتیێن کوردستانێ و یا ژ هەمیا گرنگتر ڕوڵ و بزاڤێن وی یێن بەرچاڤ پشتی ڕوداوا 16 ێ ئوکتوبەرێ و دورپێچن سەربازی و دیپلوماسی و تا ڕادەکێش یێن ئابوری کو شیا دماوەکێ کێمدا ئەڤان هەمی دورپێچا بشکێنیت و جارەکا دی کوردستانێ ژ وان هەمی لایاڤە بگەهینیتە ئاستێ وانێ بەرێ و د هندەک پیاڤاندا بەلکو پێشڤەتریش ببەت. دلخوشی و ڕازی بوونا دەرەکی ژ لایەکێ و باوەریا خەلێ کوردستانێ ب ڕێزدار نێچیرڤان بارزانی ئاماژێن گرنگن و وێ هیڤیە ددەنە مروڤی کو بەلێ دێ دڤی ئەرکیدا یێ سەرکەفتی بیت و پەیاما کوردستانەکا ب هێز دێ بیتە واقع و سەرەدەری کرنا کومەلگەها نێڤ دەولەتی دگەل کوردستانێ دێ چیتە دئاستەکێ بلندتر دا.