شک و گومان تێدا نینە د وەرگرتنا کابینەیێن حکومەتێ ژ لایێ نێچێرڤان بارزانی ڤە ببوو رۆناهیەک ژ بۆ رێیا وان ژنێن ب هێجەتا نامیسێ دهاتنە کوشتن و لێدان و قوتان و رەزیلکرن و دیسان وان ژنان ژی یێن دخاستن د مەیدانا سیاسی و رەوشەنبیری، جڤاکی دا رۆلێ خوە ببینیت و ببیتە پیشەنگ.
ئێک ژ وان کارێن د کابینەیێن وی دا هاتینە کرن و ب گرنگی دانا وی بۆ پرسا ئافرەتێ هەموارکرنا یاسایا بارێ کەسی بوو یا ئیراقێ یا سالا ١٩٥٩. د هەموارکرنا ڤێ یاسایێ دا گەلەک ژ مافێن ژنان هاتنە گەرەنتیکرن، ژوان ژی رێگری ل بەرەلایکرنا ئینانا دو ژنان هاتە کرن، دیسان رێک ل هەڤژینیا ب زوری هاتە گرتن، دیسان د کێشەیێن تەلاقێ دا مافێ یەکسانیێ دا هەردو رەگەزان، کوشتنا ب بەهانەیا نامیسێ ژی ب چ رەنگان بکۆژ ناکەڤیتە بەر لێبورینا گشتی و دڤێت مافێ خوە وەرگریت. هەموارکرنا ڤێ یاسایێ بۆ دەستپێکە ژ بۆ ژنان ئێدی بشێن پێنگاڤان دناڤا کۆمەلگەهێ دا بهاڤێژن یێن کو مافێ وێ بۆ ژ مێژە هاڤێتبان. پێنگاڤا دی د کابینەیا پێنجێ یا حکومەتێ هاتە هاڤێتن ئەوژی دامەزراندنا رێڤەبەرێێن توندوتیژیا دژی ژنان ل هەرێمێ ل سالا ٢٠٠٧، ڤەکرنا ڤان رێڤەبەریان بۆ هیڤیەک بۆ هەمی وان ژنێن د زولما خێزانێ و زەلامی و کۆمەلگەهێ دنالن، ئەڤ رێڤەبەریا بوونە ئەگەرەک بۆ خو خودان دیتن ل وان ژنێن ژ ناڤا خێزانێن وان ب هەر بهانەیەکێ دهێنە دەرکرن، یان ژی توندوتیژی ب هەمی رەنگێن وێ ڤە دگەل دا دهێتە کرن.
وەرگرتنا پۆستێ سەرۆکێ هەرێمێ ژ لایێ نێچێرڤان بارزانی ڤە، بوویە هیڤیەکا دی یا گەش ل دەڤ ژنان و چاڤەرێنە پتر یەکسانی دگەل رەگەزێ بەرامبەر بهێتە درستکرن. پتر ژن بەژداری پرۆسەیا سیاسی و رێڤەبرنا دامودەزگەهێن گرنگێن دەولەتێ ببیت و بشێت یەکسانییێ دناڤا هەموو تەخێن جڤاکی دا درست بکەت.