هەڤالەکێ پسیار ژ من کر وگوت، تو بۆچى نوکە بابەتان نانڤێسى؟.
من گوت: دڤى بارودوخیدا من شیانێن نڤێسنێ نەماینە.
گوت: هەر ل سەر وان نەشیان وبێزاریا بنڤێسە.
من ژى دەست دا خامێ خۆ و ئەو پەیڤ ورستە وبابەتێن دمێشکێ مندا هاتینە دورپێچ کرن وژێک تەروبەرا کوم کرن و وەکو نێچیرڤانەکى من راڤکرن و ئەڤ بابەتە ژێ بەرهەم ئینا:-
ئەڤا ئەز دنڤێسم بارودوخ وکاودانێن رۆژانەیا نوکە وپێشەرۆژا جڤاکێ مەیە ئەگەر دپێشەرۆژێدا ژێ پەشیمان نەبن؟.
هندەک جاران بیرەوەرى وەکو پەرتوکەکا نەنڤێسى نە ودپەرتوکخانەیەکا بێ ناڤ ونیشاندا دهێن دانان.
بارودوخ وکاودانێن وولاتێن دەوروبەرى مە وهەر وەسان نوکەیا مە گەلەک یا نەجێگیرو ومەترسیدارە، یا پرە ژ کێشە و گیروگرفتان وهەتا ژ ئێکێ دەرباز دبین ئێکا دیتر یا کورتر وئاسیێ تر روبروبرى مە دبیت یان ئەم بخۆ خۆدهەلقوتینە دناڤ کێشەکێدا وبخۆ کێشێ دورست دکەین ودگەل ئێک کومدبین ب گوتنێن زیق وقەپە ومەزن گفتوگویان لسەر وان بابەتان دکەین، بەلێ وەسانە هەر وەکو پەرتوکەک دئاخڤیت، ئەم گەلەک دئاخڤین و بێ ئەنجام دوماهیێ ب ئاخفتن ودان وستاندن و کومبونێن خۆ دئینن.
هندەک جاران مرۆڤ ژنیڤا دلێ خۆ بابەتەکى دنڤێسیت یان بەرچاڤ دکەت،بەلێ ئەو گازى ونڤێسین وەکو نڤێسینەکا بێ رەنگ لێ دهێت و نەکەس دبینیت و نەکەس گوه لێ دگریت.
بەردەوام هزر دکەسەکیدا دکەم کو هەمى ژیێ خو دخەباتا چەل وچیا ولناڤ باژێران بریە سەر، بەلێ نوکە دژیێ پیریێدا پەککەفتیە ونەکەس رێز لێ خەبات و بەرخودانا وى دگریت ونەکەسێ ئەو ل بیر مایە، خەبات وماندیبونا وى وەکو پەرتوکەکا نەنڤێسى بەحسێ دکەت ونوکە ژى ل سەر جهى درێژکریە بتنێ ئاخینکا رادهێلیت بو وان رۆژێن ل چەل وچیا ول ناڤ باژێران خەباتەکا راست ودورستا کوردایەتیێ دکر.
هزر ل وان کەسان دکەم، یێن ژگزڤە(فوجئە) زەنگین بوین وەکو دبێژن(ب پلەکێ چوینە سەرێ مللەکێ)،ول مال درونشتینە وبتنێ مژویلى هژمارتنا مال وملک وسەرو سامان وپڕکرنا خزینێن خۆنە.
هزر دوى ماموستاییدا دکەم، یێن ل خواندنگەهێن حکومى دەوامێ دکەن وژ بێ (ئیمکانیەتێن) خواندنگەهێن حکومى، زارۆکێن خۆ بو خواندنێ دنێریتە خواندنگەهێن تایبەت.
هزر دوى هەڤولاتیدا دکەم، یێن زارۆکێن وان گەلەک دزیرەک، بەلێ ژبەر نەبونا شیانان نەشێن زارۆکێن خۆ بنێرنە خواندنگەهێن تایبەت وسفیل.
هزر دوى دەرچویدا دکەم، یێن ب (واستە) دهێنە دامەزراندن و یێن ژ وى زیرەک تر چونکە کورە هەژار وبێ (واستەنە) ل مال دمینن.
هزر دوان نەخۆشاندا دکەم، کو ژبەر هەبونا ژمارەکا زور یا نەخوشخانێن تایبەت، پیتەدان ب نەخۆشخانێن حکومى ناهێتەدان وپشتگوه ئێخستینە، ونەخۆش ژى نەشێت چارەسەریا خۆ بکەن وچاڤەرێ مرنا خۆ دکەن.
هزر ل وان گەنج ولاواندا دکەم، یێن بۆ چەندین سالان دخوینن وخواندنێ بدوماهى دئینن وتانوکە بێ کار ماینە ول مال درونشتینە، چونکە نەبونا کارگەهێن مەزن و نەگرنگى دان ب کەرتێ کشت وکالى وسەکتەرێن دیتر هەمى ئەو گەنج ل هیڤیا دامەزراندنێ نە وەکو فەرمانبەرێن حکومى.
هزر ل وان کەسان دکەم، یێن چ کێشە نەى و هەر دخوشیاندا دژین و بتنێ دزانن پاران خەرج بکەن.
هزر دوان کەسان دکەم، یێن خودان پلە وپایە وخودان هێز وچ گیروگرفت وکێشە نین.
یا ژ هەمیێ گرنگتر هزر دبارودوخێ کوردستانێ یى َنوکەدا دکەم، کو ئەڤە بۆ دەمەکێ درێژە هەلبژاردن هاتینە کرن و هاولاتى ب گەرم وگور چوینە سەر سندوقێن دەنگدانێ و دەنگێ خۆ دایە، بەلێ جهێ تەحەمى (داخێ)یە تا نوکە رێز ل دەنگێ هاولاتى نەهاتیە گرتن ونێزیکە پارتێن سیاسى ژبەر بەرژەوەندا خۆ وب دەستڤەئینانا کورسی و دەستهەلاتێ کومبون لسەر کومبونێ دکەن وهەمى دبێ ئەنجامن وئەو رێکەفتنێ، دهێنەکرن ژى بتنێ وەکو حبرێ ل سەر کاغەزێ یە هەر دەما هشک بوو بێ بها ونرخ دبیت ورێز لێ ناهێتە گرتن.
هزر ل هندێ دکەم، ئەم وەکو کرێکارێن کومرێن رەژیێ دتونێلاندا لێ هاتینە، تەنها هەر ئێکى ژمە گلوپەک ب ناڤ چاڤان ڤە گرێدایە بو هندێ داکو دتونێلێن تاریدا خۆ ب دیوارێن تونێلێ نەدادەین.
هزر ل هندێ دکەم، ئەڤ گێمێ یاریا سیاسى دوماهى پێ نەهێت وکومبونێن پێک نەهاتنێن پارتێن سیاسى ببنە شێرپەنجە بۆ لەشێ ماندى وشکەستى یێ مە وهەمى خەلکێ کوردستانێ.
هزر ل رابورى و نوکە یا مە دکەم، کو مە ب باشى مێژوو نەخواندیە تاکو وانەیەکا باش ژێ وەرگرین وبۆ نوکە پێشەرۆژا مە ببیتە ڕێ نیشاندەر، ئەو پێشەرۆژا هەمى ب تراژیدایێن خیانەت کرن ل ئێک دوو ب دوماهى دهێن.و هەزاران هەزرێن دى ....