​پشتی کارو خزمەتەکا مەزن د ھەمی سێکەترێن ئابوری، سیاسی، بازرگانی، جڤاکی و ئولی و ئاڤەدانی و خزمەتگوزاریێن جورا و جور ب ئاوایەکێ بەرفرەە پێشکەشی خەلکێ ھەرێما کوردستانێ کرین. بێی ل بەرچاڤ گرتنا جوداھیا ئولی و مەزھەبی و ناوچەداری، ھەروەسا ڕاکرنا ھەمی ئەو بەربەست و دورپێچێن کەتینە سەر ھەرێما کوردستانێ ل سەر ئاستێ ناڤخویی و دەرەکی و زڤراندنا پێگەھێ ھەرێمی بۆ پێش رویدانێن شازدێ ئوکتوبەرێ، و نەھێلا نا قەیرانا دارایی و نەھێلانا بریارا پاشکەفتێ موچە خورێن ھەرێمێ، ئەڤە زێدەباری چاندنا توڤێ پێکڤەژیانێ و بەرقەرارکرنا ئاشتەواییا جڤاکی و کەلتورێ لێبورینێ و لسەر ئاستێ فەرھەنگێ و رەوشەنبیر وچاندێ و کەلتوری...ھتد. ژ سالوخەت و تایبەتمەندو کارێن ھەرە گرنگ و ئەولەوییەتێن رێزدار نێچرڤان بارزانی بوون ب درێژاھییا حکومرانیا خۆ دماوێ بورییێ سەرۆکاتیا حکومەتا ھەرێمێ دا. ئەڤ چەندەژی گروڤەیێن بھێزن بۆ ناڤبری، کو پەرلەمانێ کوردستانێ دێ دەنگی ب ناڤبری و بەربژێرێن دیترێن خۆ بۆ پوستێ سەرۆکاتییا ھەرێما کوردستانێ بەربژێرکری دەت. ب دیدا من ھەر ئەڤ چەندا لسەری مە دیارکری دێ بیتە ئەگەرێ وێ چەندێ کو رێزدار نێچیرڤان بارزانی دێ متمانەیا پەرلەمانی ب زۆرینەیا دەنگان بدەستڤە ئینیت. ئەز دوێ باوەرێدامە کو ئێدی ئەو د ئەڤێ پوستیدا دێ شێت ئەندازیاریا خۆ ب دانانا بەرێ بنیات و ئاسویەکێ باشتر و گەشتر بۆ ھەرێما کوردستانێ ل سەر ئاستێ ناڤخویی و دەرەکی سەلمینیت. ژبەرکو ناڤبرێ ئەزموندارە دوارێ رێداری و رێبرنێدا. ئانکو ب واتایەکا دی ناڤبری بوریەکێ دەولەمەند و زێرین و پر سەروەری ھەیە. بوریەک کو میناکێن وێ د دیرۆکا سیاسەت و دەستھەلاداریێدا، بتایبەت ل رۆژھەلاتا ناڤین و د وەلاتەکێ میناکێ وەکو عێراقێ، ئەوعێراقا کو ب درێژاھییا دیرۆکێ ب نەئارمیا سیاسی و ئابوری و ئولیڤە دنالیت. و دیسان د ھەرێمەکێدا کو ب درێژاھییا دیرۆکێ ھەتا ئەڤرۆکەژی بەردەوام کەتییە بن شەپول و بزاڤێن نەزوکێن دژومنێن خۆ ل سەر ئاستێ ناڤخویی و دەرەکی، ب واتایەکا دی دھەرێمەکێدا کو ھەردەم و ھەرگاڤ بوویە گورەپانا ململانێیا سیاسی و ئابوری و سەربازی بۆ وەلاتێن ھەڤسی و یێن بیانی ژی. ئەڤ زێدەباری نە ئارامی و ناکوکیێن ناڤخویێن خودێ وێ ھەرێمێ دەردو ژانەکا دییا بێ دەرمانە، چارەسەرییا وێ ژی ب دیدا من پێتڤی ب کەسێن میناکێن وەکو رێزدار نێچیرڤان بارزانیە کو ئێدی ئەڤی پوستی بکەتە مینبەرەکا بھێز بۆ چارەسەرکرن و چاڤدێریکرنا ھەر برینەکا د گیانێ ناڤخویی و دەرەکیێ ھەرێما کوردستانێ دا پەیدادبیت. لەورا دەنگدان ب کەسانێن خودان ئەزمون و دبلوماسیەتێن میناکێن وەکو نێچیرڤان بارزانی دێ بیتە ئەگەرێ ئاڤاکرنا کەلواشەکێ بھێزە بۆ پاراستنا کیانێ سیاسیێ ھەرێما کوردستانێ ب ھەمی سێکتەرێن ئابوری، سیاسی، بارزگانی، جڤاکی، ئولی..ھتد ڤە.