کورد ب درێژاھیا مێژوویا خوە ھەردەم ھەلگرێن ئالاڤێن ئازادیێ بوینە و رێکێن ئاشتیانە بکارئیناینە ، ھەر ژ دەست پێکا خەباتا خوە یا سەد سالی و ھەتا نوکە ھیچ دەمەکی نەخواستیە کو ھەلگرێن ئامرازێن ئاژاوەگێریێ و جەنگی بن ، ھەردەم بتنێ پارێزگاری ژ خوە کریە و قەبویل نەکریە ھیچ کەسەک زورداریێ لسەر کوردان ب چەسپینیت ، ماوەیەکە ل ناوچەداریێن ل ژێر ماددەیا ١٤٠ ژ دەستورێ عیراقا فیدرال کەفتینە ل ھەمبەر پێلەکا گەفان ژ ئالیێ ھندەک گروپ و لایەنێن عەرەبی یێن نەدیار کو دڤێن جارەکا دیتر سیاسەتا شوڤێنیەتی و تەعریب کرنێ ب چەسپینن ل ناوچەیێن لژێر ماددەیا ١٤٠ و زێدەباری تالانکرنا مال و سامانێن خەلکێن سڤیل و ئەردێن جوتیارێن کورد ، یا دیارە ھێشتا عیراق ل قوناغا عەقلێ پاشڤەمای دا خو گەشەدکەت و ب ئالاڤێن ھزرێن نەتەوە پەرستنێ و توندرەویا ئاینی خو رازی دکەت کو خویایە چ گوھورینێن ھزری د کومەلگەھا جیھانی یا نوی ب خوڤە نەدییتنە ، ئەڤ چەندا ھەنێ زەنگەکا مەترسیدارە ژ بو گشت کوردان کو دووبارە بیرئانینامە ل رژێما گوربەگورا بەعس دئینیت ، ئەڤ چەندا روویدای جورەکە ژ سیاسەتا ژناڤبرنا کوردان بەلێ ب شێوازەکێ دیتر و ب تەکنیکەکا دیتر ، ھەروەسان د نوکە دا شوڤینیەتا عەرەبان ل ناوچەیێن لژێر ماددەیا ١٤٠ بھێز بوویە ، ئەگەر زوی چارەسەری نە ھات دیتن شوینوار و کارتێکرنا وێ سیاسەتا شوڤێنیەتی دوور نینە ل زور جھێن دیتر بھێتە چەسپاندن ، فراکسیونێن کوردی ل پەرلەمانێ عیراقێ رولەکێ باش ھەبوویە ل ھەمبەر ئەڤان ئاژاوەگێران لێ پێدڤیە ب پروژە و یاسایان ل ھەمبەر ئەڤێ سیاسەتا شوڤێنیەتی یا عەرەبان راوەستن و دوماھیکێ ب تالانکرنا سامان و زەڤیێن کوردان بینن ، خوشبەختانەیا ھەر زوو سەروک بارزانی ھاتە خەت و داخاز ژ حکومەتا عیراقێ کر کو ھەر زویکا پێدڤیە چارەسەریێ بینن ژبوی ئەڤان زێدەگاڤیێن ل دژی کوردان ، ھەروەسان سەروک وەزیرێن ھەرێما کوردستانێ (نێچیرڤان بارزانی) ل ١٣ ی گولانێ ب نامەکا پێنج خالی پێنج پێشنیاران ژ بوی سکرتێرێ گشتی یێ نەتەوێن ئێکگرتی دیاردکەت ، کو ل خالا ئێکەمین دا پێشنیار دکەت کو (یوئێن) ل وەلاتێ عیراقێ ببیتە دادڤان ژبو جێبەجێکرنا ماددەیا ١٤٠ ژ دەستوورێ عیراقا فیدرال ، ئەڤ نامە بومە دیاردکەت کو کورد ھەردەم ژبو ھەر روی ب روی بونەکا دژی کوردان رێکێن دبلوماسی و ئاشتیانە دگریتە بەر ، ئەڤ چەندا ھەنێ ژی پێدڤیاتی ب کەسێن خودان ئەزموون و دبلوماسیێن سەرکەفتی دھێتە پێش ، بەرسڤا نەتەوەیێن ئێکگرتی یا گەشبین بوویە کو پشتی پێکئینانا حکومەتا نوی دێ کار لسەر جێبەجێ کرنا ماددەیا ١٤٠ ھێتە کرن ژلایێ نەتەوێن ئێکگرتی ڤە ، لەوران ئەڤ ئالاڤێ سەروک وەزیران گرتیە بەر جھێ دەست خوشیێ یە و پێدڤیە ھەر چ زوویە حکومەتا نوی بھێتە پێکئینان ژبەرکو ھاولاتێن کوردستانی چاڤەرێ ھیڤی و خەونێن مەزنن ژبو گەلێ خوە .