چەرخێ بیست و ئێکێ ھەتا نھا ب مەزنترین چالاکیێن تیروری دەستپێکریە و بەردەوام ھزرا توندرەو ب ئایدولوژیایێن جودا جودا ل زێدەبونێ دایە و مروڤاتی ریبریێ مەزنترین کارەسات کریە چ ل بورما بیت یان نیوزلەندا و سریلانکا و عیراق و سوریا و ئەفغانستان و ئیران و تورکیا و نیجیریا ...تد, بیت.بەلاڤبونا ھزرا توندرەو ل جیھانێ دا ب چەندین فاکتەرێن سیاسی و ئابوری و جڤاکی و پەروەردەی و ئولی و کارڤەدانێن ھەمە جور ڤە گرێدایە ول دەم و جھێن جودا دا فاکتەر و ریدان و کارەکتەر و ئەنجام دئێنە گوھرین , لێ یا ھەفپشک ل ناڤبەرا تیرورا دەولەتێ و رێکخراوێن تیرورستی و کەسان دا ئەوە مروڤ و ژینگەە و ئێمناھی و خوشگوزەرانی و پێکڤەژیان قوربانیا ڤان ریدانانە.
سەرھلدانا تیرورێ ل عیراقێ نوی دا بو تیرورا دەولەتێ دزڤریت ل سالا ١٩٢١ ھەتا کەفتنا رژێما سەدامێ دکتاتور و دیڤدا ژی ھەمان سیاسەت ل عیراقا بناڤ دیموکراسی دا ھەبویە و ب رێک و شێوازێن جودا . پشتی سەرھلدانا گروپێن تیرورستی ل عیراقێ کو چەندین فاکتەران کاریگەریا خوە ل سەر ھەبو ژبلی یێن ھاتیە گوتن تولڤەکرنا شیعەیان ل سوننەیان و سیاسەتا مەزھەبی عیراق بەرەف ئاقارەکێ تاری ڤە بر و ژینگەھەک باش بو بەلاڤبون و ل خوە گرتنا تیرورێ ل ناڤەراست و دەڤەرێن سوننی ل عیراقێ دروست بو و سوپاس بوخودێ کو کوردستان دەرڤەی ھەفکێشا سەرھلدانا ڤان گروپان بو ئەو ژی بو چەندین فاکتەران دزڤریت و یا جھێ مەترسیێ ئەو گوتارا توندا ھندەک کەسێن حەماسیە و ئەو ھێرشا کەسێن بناڤ سیکولار بو سەر ئولێ ئیسلامێ کو زورجاران مەترسیا کارڤەدانێ ژێ دئێتەکرن.
ل داویێ دەولەتا داعشێ بەرھەم ھات ل سالا ٢٠١٤ و شیان زوترین ئیمکانیاتان ل خوە کومبکەن و ب ھەزاران چەکدارێن بیانی ب ھەفکاریا ھەوالگیریێن بیانی گەھشتنە ناڤ رێزێن داعشێ و مروڤ و ئاڤەدانی و دارو بەرێن دەڤەرێ بونە قوربانی ھزرا داعشێ, ب دەھان ھزار کەس ھاتنە کوشتن و بریندارکرن و ل سەر ئەردی داعش پشتی شەرێ باژەروکێ باغوز نەمای وەکی بەغدادی گوتی (معرکە باغوز انتھت؟!) بەلێ داعش ب داوی نەھات وەکی د ھاتە پێشبینی کرن و ل چەند روژان پشتی باغوز ل سریلانکا مەزنترین تەقین ئەنجامدان و ل مالی و بورکینافاسو بەیعەت بو خیلافەتە روخاوەکە ھاتن ! و ل عیراقێ ژی بەردەوام ھێرشێن داعشێ ل زێدەبونێ دانە و دەست ب شەرەک نوی کریە کو ھەمان سیاسەتا رێکخراوا قاعیدێ یە ئەو ژی شەرێ (استنزافە) و ھەر جھێ بگەھیە دوژمنی دربەکێ لێبدە و زورترین خوسارەتێ بگەھینێ و وەک شەرێ پارتیزانی .پرسیارا فەرە بەرسڤا وێ دەف سەکردێن عیراقی ھەبیت ئەوە , ئەرێ بکارئینانا ھێزێ و سەرئێک دا ئینانە خارا باژێران و سوتن و کوشتن و سێدارەدانا تیرورستان چەند ئەنجام ھەبو؟
زور گرنگە زانکو و سەنتەرێن ڤەکولینا و نڤیسەر و روشنبیر و رێکخراوێن جڤاکێ سڤیل و کەساتیێن ئولی و سیاسی ..پێکڤە دانوستاندنا بکەن ل سەر ئەرێ بوچی دووبارە تیرورێ سەرھلدا پشتی ڤان خوسارەتێن ھاتینە داین و بکارئینانا شەری؟ ئەرێ لوژیک و دانوستان و ئێک دوو قەبیل کرن چارەسەرە؟
ب بوچونا من یا سادە و موتەوازع فەرە حکومەتا عیراقێ و یا کوردستانێ ژی بەردەوام کار بکەن بو ھندێ نەھێلن فاکتەرێن سەرھلدانا تیرورێ دناڤ وەلاتی دا بمینن نەک سەرەدەریێ ل گەل ئەنجامان بکەن و ب زمانێ چەکی و شەری سەرەدەریێ بکەن.
١- ھەولدان بو چارەسەرکرنا پرسێن سیاسی ل وەلاتی دا و دیرکەفتن ل سیاسەتا مەزھەبی و قەومیچی کو چو مفایەک ب وەلاتی نەگەھاندیە .
٢- زورگرنگە کاربێتە کرن بو ھندێ رەوشا ئابوری باش بیت و پروژێن ستراتجی ل وەلاتی بێنە دروستکرن و کار بو گەنجان بێتە دیتن .
٣- ل راگەھاندنێ دا کار بێتە کرن کو ریسالا پێکڤەژیان و خوشەویستی و براتیێ بێتە بەلاڤکرن و رێز ل جوداھیێن وەلاتیان بێتە گرتن.
٤- فەرە پتر رول ب قەلەم و خاندن و زانکو و پەیمانگەە و قوتابخانەیان بێتە دان و پروگرامێن باش و سەردەمیانە و دیر ژ مەزھەبیەت و قەومیەتیا توندرەو بێنە بەرھەڤکرن بو سازیێن خاندن و فێرکرنێ.
٥- ریسالا ئولی مەزنترە ل وێ چەندێ ئەوا زور جاران مروڤی ئاگەە ژێ دبیت و زور یا دجھێ خوە دایە کو ماموستایێن ئولی کار بکەن بو ھندێ ئولێ ئیسلامێ وەکی خوە و دیر ژ ھزرا تیرور و توندرەویێ بێتە شروڤەکرن و ئەوان دەقێن ئولی کو مەتاتینە فەرە بو خەلکێ گشتی شروڤە بکەن و ھزرا توندرەو تیرورستان ژی ب گروڤەیێن ئولی ڤە روون و ئاشکرا بکەن.
٦- رولێ مالباتێ د بەرھەم ئینانا جڤاکەک سەرکەفتی و پێشکەفتی زور گرنگە و بنگەھێ پێشکەفتنا ھەمی وەلاتان تاکێ ساخلەم و گوھدار و شارەزایە کو د مالباتەک باش پەروەردە دبیت ل داویێ جڤاکەک باش و زیرەک و روشنبیر و لێھاتی بەرھەم دئێت ..
ل داویێ دبێژم دەست برن بو ناڤبرنا ھزرا توندرەویێ گرێدایە ب وان چارەسەریێن دئێنە دیار کرن کو شەش ژ وانا مە دیارکرن , و ھێز نابیتە فاکتەرێ ژ ناڤبرنا تیرورێ و باشترین گروڤە ژی دووبارە سەرھەلدانا داعشێ یە ل عیراقێ پشتی ب ھزاران قوربانی دای و ب ملیارا دولارا ژی ھاتینە سەرفکرن و وەلاتەک وێران ژی دیف خوە ھێلای ...شەرێ تیرورێ شەرێ ھزرێ یە و یادیتر ھەمی ل دەست دانا شیانایە.