د کێمن ئەو مللەتێن ب ئەندازەیا کوردان هاتینە تەپەسەرکرن، د زۆرن ئەو گەلێن چاڤێن خوە ل ڤێ تەپەسەرکرنێ نەقاندین!. گەلێ کورد ل باشورێ وەڵاتێ خوە هیچ جۆرەکێ دژاتیێ نەمەیا کو ل سەر دەستێ سەردەستێن عیراقێ ل هەمبەر نەهاتبیتە ئەنجامدان،ئێک ژ وان دژاتیێن بێ وێنە ژی "ئەنفال"ە.
د دەمەکیدا کو کەملانا بوهارێ بوو، گولان تاڤا رۆژێ ماچیدکر،کەو،شالیل و بلبلان ب دەنگێ خوە دۆل و نهالێن کوردستانێ مینا مێرگێن بەهەشتێ جوان کربوون. خەلکێ کوردستانێ کارێ خوە دکر کو د ناڤ سروشتێ کوردستانێ ب سەیران،کار و خەباتێ ژیانا خوە خۆشتر بکەن.لێ رژێما بەعس بێی هیچ ئەگەرەک و بەرەڤاژی هەمی بەهایێن ئاینی و مرۆڤایەتی دەست دا هێرشکرن و ژ ناڤبرنا خەلکێ کوردستانێ. (ژن ،کچ،زەڵام،گەنج،پیر،نوی پێگەهشتی...هتد) ئەشکەنجەدان،شەهیدکرن،ل گەل خوە برن و بێ سەروشوین کرن. ئاڤاهی بسەرئێکدا ئینان و گوند کاڤلکرن.چەکێن قەدەغەکری ل هەمبەر گەلێ مە بکارئینان. د ئەنجامدا پتر ژ "۱۸۲۰۰۰"کەسان شەهیدکرن،بێی سەروشوین کرن. نێزیکی "٥۰۰۰"گوندێن کوردستانێ سووتن،خرابکرن. یا نازییان ل هەبەر جۆیان نەکری بەعسیان ل هەمبەر خەلکێ خێر ل خوە نەدیتیێ کوردستانێ کر.
لێ چەوان بۆ هێتلەری تا هەتایێ نەچوو سەر،ب هەمان شێوە سەدامێ دکتاتۆر ژی باجا وان بێدادییان دا، ب کرێترین شێوە تەخت و بەختێن وی ب سەر ویدا هاتن خوار. لێ چارێکە سەدەیەک بوری وهێشتا دایکێن جەگەر سووتی،گەنجێن بێی دایک، بابێن زارۆ ژ دەستچووی ...هتد، چاڤێ وان ل رێیەکا تارییە و ل بەندا خۆشتڤیێن خوەنە. هەر چەندە ل ڤەگەڕەکا ب ساخی د بێ هیڤی نە. لێ هیڤیخوازن کو تشتەکی ل بێسەروشوینێن خوە بزانن و هەر چ نەبیت رفاتێن وان بۆ بهێنە ڤەگەڕاندن.و ژ لایەکێ دیڤە ژی چاڤەڕێنە بهێنە قەرەبۆکرن دا کێمەک ژ برینێن وان بهێنەساڕێژکرن.
سەر باری وێ ئێکێ کو حکوومەتا هەرێمێ ب سەرۆکایەتییا"نێچیرڤان بارزانی" ل دووڤ شیانێن خوە کەمتەرخەمی نەکریە د بزاڤکرنێدا بۆ ڤەگەڕاندنا رفاتێن ئەنفالکریان، و ب جینۆسایدناساندنا ڤێ کارەساتا رژێما بەعس بسەر گەلێ مە دا ئینای.دیسان هەر ب بزاڤێن خوە بەشەک ژ رفاتێن ئەنفالکریان ڤەگەڕاندینە. ل (۲۰۰۷/٤/٤)ێ ئەنجوومەنێ وەزیران ژی ب سەرۆکایەتییا "نێچیرڤان بارزانی" پرۆژێ بڕیارا(٤/۱٤) ب رۆژا ئەنفالێ ڤه پەسەندکر. واتە ل هەموو ساڵەکێ ل (٤/۱٤)ئەڤ بیرەوەرییە دهێتە ساخکرن. هەر چەندە ل هەموو دەمان ئەنفال ل بیرا هەر کوردەکی یە، لێ وەکو رێزگرتن جەنابێ سەرۆکێ حکوومەتێ ئەڤ رۆژە بۆساخکرن و بەرز راگڕتنا ڤێ یادا جەرگبڕ پەسەندکریە.
کەمتەرخەمێن هەمبەر ڤێ کارەساتێ ژ لایەکیڤە حکوومەتێن وەڵاتێن زلهێزێن جیهانێ نە. چونکی دەما رژێما بەعس ب ئاگر،ئاسن و خەردەلان،هێرشی گەلێ مە کری و تاوانێن دژی هەمی بەهایێن مرۆڤایەتیێ ل هەمبەر گەلێ مە ئەنجامداین.کو بێسەروشوینکرنا پتر ژ "۱۸۲۰۰۰"کەسان ژی ئێک ژ وان تاوانان بوو، وان چاڤێن خوە ل هەمبەر ڤێ بێویژدانیێ گرتن.نە مافێ مرۆڤی یێ ئەو بانگەشێ بۆ دکەن ویژدانا وان لڤاند، نە ئەو دلنازکییا وان بۆ "گیانەوەران"هەی وان بۆ گەلێ مە هەبوو!.
سەرباری کەمتەرخەمییا وی دەمی یا حکوومەت و گەلێن جیهانێ.نها ژی هەر ل هەمبەر ڤێ زۆڵمێ بێدەنگی هەلبژارتییە و ب بەهانەیێن جودا جودا بەرهەڤ نینن ڤی کارێ هۆڤانە یێ ل هەمبەر کوردان هاتییە کرن ب جینۆساید ل قەلەم بدەن.
ژ لایەکێ دیڤە ژی کا چەوان رژێما بەعس هیچ جارەکێ بەرهەڤ نەبوویە مافێن گەلێ مە دابین بکەت و ل شوونا دابینکرنا مافێن هەڤوەڵاتیێن ڤی بەشێ کوردستانێ،وەک مە ئاماژە پێکری ب هەمی شێوەیان بزاڤا ژناڤبرنا خەلکێ کوردستانێ کریە و تاکە ئەگەر ژی کوردبوون بوویە. ب هەمان شێوە حکوومەتێن عیراقێ یێن ئێک ل دووڤ ئێکێن پشتی بەعسییان ژی ، بەرهەڤ نەبووینە مافێن خەلکێ هەرێمێ دابین بکەن. راستە کو ئەنفال ب جینۆساید هاتییە ناساندن ژ لایێ عیراقێ ڤە.لێ هەتا نوکە ژی قەرەبویا کەس و کارێن ئەنفالکریان نەهاتییە کرن کو بچویکترین مافێ وایە ل بەرامبەر وێ زۆڵما ل هەمبەر هاتییە کرن.
لەوما گرنگە خەلکێ هەرێمێ ل شوونا جارەکێ رەخنێ ل حکوومەتا هەرێمێ بگرن،دڤێت دەهجارکی وێ تبلا خوە درێژبکەنە سەردەستێن عیراقێ و داخازا بزاڤێن رژد بۆ دیارکرنا چارەنڤیسێ ئەنفالکریان لێ بهێتەکرن و سەرباری وێ ئێکێ کو دڤێت هەم خەلک هەم ئەندام پەرلەمانێن کورد ل بەغدا گڤاشتنێ ل سەر حکوومەتا عیراقێ بکەن کو کەس و کارێن ئەنفالکریان بهێنە قەرەبۆکرن.