وەلاتێ مە کوردستان ئێک ژ وان جھێن جوان و دلڤەکەرە دھەرچوار وەرزێن سالێ دا، نەخاسم ژ روویێ ژینگەە و گەشت و گوزارێ ڤە و خەمل و جوانی و دیمەنێن سروشتی ڤە، یا دلڤەکەرە ب چیا و کانی و سیلاڤا و ریبار و ھاڤینگەە و دارێن بەردار و گول و گیا و ھتد..
دڤی واری دا و لڤی وارگەھێ تو خۆ دبینی کو دناڤ تابلویێن ھەمەرەنگ و بێ ھەڤتادا دژی ، بەروڤاژی ھند وەلاتان کو ئەو چوار وەرزێن مە ھەین ل وان وەلاتان نینە و ھند ژوانا ئاڤا وانا تالە یان سیرە و ھندان ژی بیابانە و ھند ژ وەلاتان بتنێ ھاڤینە و ھند ژی بەس زڤستانە و تێنا رۆژێ وان نینە .
لێرەدا و نھا وەرزێ گەشت و سەیران و یاد و ھەلکەڤتایە، نەخاسم نھا وەرزێ سەیرانێن خێزانا و قوتابیێن قوتابخانە و پەیمانگەە و کولیژایە ، دیسان گێرانا شەھیانایە دناڤ ژینگەە و سروشتێ جوان دا ، وەکو پێتڤی و بیرئینانەک گرنگە ئەم ھەر ئێک ژلایێ خوڤە گرنگیێ ب پاکژیا ژینگەھی بدەین و ھشیاربین جوانیا سروشت و ژینگەھێ خۆ تێک نەدەین، و دڤێت پتر ھەولبدەین ژینگەھێ خۆ خەملدارو جوانتربکەین و بپارێزین و پاکژ رابگرین وەکو ئەرکەک ژینگە دوستی و مروڤایەتی و نەتەوەیی و ئاینی ..
دیارە ژی حکومەتا ھەرێما کوردستانێ و رێکخراوێن سڤیل پیتەو گرنگییەکا ھەری باش ب ژینگەھێ کوردستانێ ددەن و کاردکەن ژبۆ ژینگەھەکێ پاقژ و ساخلەم د ئەڤ سالەدا ژی ل رێو رسمێن رۆژا ژینگەھێ کوردستانێ نێچیرڤان بارزانی دیارکر :" رەفتارێن چاک دگەل ژینگەھی ئەرکە و دوپاتکر تا ژینگەە پاقژ بیت مەترسی لسەر ژیانێ کێمترە ."ھەر ژبۆ ڤێ مەرەمێ ژی ھەوەکا ئێک ھەفتی ژبۆ ڤێ مەرەمێ راگەھاند پێخەمەت ھەر ئێک ژبالخوڤە کار ل وارێ پاراستن و پاقژکرن و جوانتر کرنا ژینگەھی رولێ خۆ بگێریت ...
لەوما فەرە ل دەمێ گەشت و سەیرانان ھند خال لبەرچاڤ بھێنە وەرگرتن و ژ گرنگترین خالێن من دڤێت ئاماژێ پێ بدەم ئەڤەنە :-
١- دڤێت دارو نەمام بھێنە پاراستن و نەھێنە شکاندن ژبەرکو لدویڤ ڤەکولینێن زانستی ھەر دارەک ١٢٠ کگم یێن گازا ئوکسجینێ بەرھەم دئینیت ڤێ چەندێ ژی گرنگیا خۆ ھەیە کو مروڤ رۆژانە پێتڤی ب ٦٨٠گم ێن گازا ئوکسجینێ یە لێرەدا دیار دبیت کو ھەر دارەک تێرا خێزانەکا چوار کەسی گازا ئوکسجینێ بەرھەم دئینیت.
٢- دیسان خالەکادیتر ئەوە کو بەرماک و پاشماوێن خۆ کومبکەین ل دەمێ سەیرانان داکو نەبیتە ئەگەرێ تێکداا ژینگەھی و پەیدابوونا نەخوشیان ، لەوما پێتڤییە گەشتیار ھەست ب وێ چەندێ بکەت کو لدویڤ دا دێ ھند کەسێن دی قەستا وی جھی کەن ژبۆ بوراندنا دەمەکێ خۆش.
٣- ھەروەھا خالەکا دیتر یا گرنگ ئەوە کو زۆر جاران ھند خێزان نەفتێ دگەل خۆ دبەنە سەیرانان ژبۆ ھەلکرنا ئاگرەکی کو وێ نەفتێ دکەنە جھێن ئاڤێ دا ئەڤجا ھند کەس ھەست پێناکەن دێ ڤەخون یان دەمێ دڤێت ئاگری ڤەمرینن بڤێ ئێکێ نەفتێ ب ئاگری دادکەن و دبیتە ئەگەرێ پەیدابوونا نەخوشیێ و ئاگربەربوونێ.
ب رەنگەکێ گشتی ئەرکێ مە ھەمیانە بێ جوداھی داکو وەلاتێ مە ھەردەم یێ رند و ئاڤەدان بیت و رووگەھا ھەمی گەشتیاران بیت دڤێت جوانتر و خەملداتربکەین و ب مالا خۆ یا ئێکان ب ھەژمێرین .