کارەسات لەوەدایە ئاکپارتی و ئەردۆغان لە دوو گەورە شاری تورکنشینی وەک ئەنقەرەی پاریتەختی سیاسی و ئەستەنبوڵی پایتەختی ئابوری تورکیا هەڵبژاردن بدۆڕێنێ و لە کوردستان بیباتەوە, کارەساتێکی وەها پێویستی بە هەڵوەستە لەسەر کردن و بەخۆدا چوونەوە هەیە و بە تایبەتیش پەکەکە کە خۆی بە رابەر و پێشەوای کوردان لە باکوور دەزانێ بە سیاسەتی هەڵەی خۆیدا بچێتەوە و لە خۆی بپرسێ: ئاکپارتی و ئەردۆغان بە کوشتنی کوردانی باکوور دڵیان داناسەکنێ و پەلاماری کوردانی رۆژئاواش دەدەن، لە باکووریش ئەردۆغان دەڵێ: کوردستان لە تورکیا نییە و کێ خۆی بە کورد دەزانێ با بچێ بۆ باکووری عێراق کوردستان لەوێیە, ئەوە جگە لەوەی زیاتر لە بیست ساڵە رێبەری پەکەکەی زیندانی کردووە و بەناوی پەکەکە بوونیش هەزاران کوردی راپێچی ناو زیندانەکان کردووە، ئەی خێرە ئاکپارتی و ئەردۆغانی کوردکوژ و نکولیکەر لە بوونی کورد و کوردستان ئەو هەموو دەنگە لە کوردستان دێنێ و هەڵبژاردن لە (هەدەپە) دەباتەوە؟ وەڵامی درووستی ئەو پرسیارە چارەنووسی هەموو کوردی پێوە بەندە و پێویستە کورد لە باکوور و هەموو پارچەکانی تری کوردستان بە دوای وەڵامەکەیدا بگەڕێن.
پەکەکە لە باکوور جگە لە خۆی هیچ کەس و لایەنێکی تر بە کورد نازانێ، لە باشوور و رۆژهەڵات و رۆژئاواش کلک و باڵی تایبەت بۆ خۆی درووست کردوون و بەردەوام کێشە بۆ حزب و لایەنە رەسەنەکانی ئەو بەشانەی کوردستان درووست دەکات, لەگەڵ داگیرکارانی ئەو سێ بەشەی کوردستانیش کێشەی نییە و لە زۆر کات و شوێنیش لەگەڵیان دەبێتە هاوپەیمان.
بە هەر هۆکار و لە ژێر هەر گوشارێکدا بووبێ لە باکووری کوردستان پرۆسەی ئاشتی دەستی پێکرد, ئەوە بۆ کورد لەو قۆناغەدا سەرکەوتن و دەرفەتێکی باش بوو، لەژێر سێبەری ئەو پرۆسەیەدا دەرگای زیندان بە رووی عەبدوڵا ئۆجەلاندا کرایەوە و وەک رابەری کورد گفتوگۆی لەگەڵ دەکرا، پەکەکە بە کوشتنی دوو پۆلیس بیانووی دایە دەست تورکیا تا ئەو پرۆسەیە لە بەین بەرێ.
خاڵێکی تر کە کوردانی باکووری لە پەکەکە نائومێد کرد ئەو ئامانج گۆڕکێیە بوو کە کردی، لە یەکخستنەوەى کوردستان و دامەزراندنی دەوڵەتی گەورەی کوردییەوە ئامانجەکەی بۆ درووشمی خەیاڵی کۆمەڵگەی دیموکراتیک دابەزاند، ئەوەش بە دڵی هەر چوار داگیرکارەکەی کوردستان بوو، چونکە ئەوان لە هزر و بیری کوردایەتی دەترسان و پەکەکەش بەو درووشمە خەیاڵیە کاری لەسەر لاواز کردنی ئەو هزر و بیرە دوژمنکوژە دەکرد، نکولی کردنی لە ئاڵای کوردستان وەک ئاڵای کوردی هەر چوار پارچەی کوردستان باشترین بەڵگەی ئەو راستییەیە کە پەکەکە لە سەنگەری کوردبوون و کوردایەتی دەرچووە و خزاوەتە سەنگەری دوژمنان.
لێرەوە دەگەینە ئەو دەرئەنجامەی کە سیاسەتی هەڵەی پەکەکە چ خزمەتێکی گەورەی بە ئاکپارتی و ئەردۆغان کردووە، ئەگەرنا ناکرێ و ناگونجێ ئاکپارتی و ئەردۆغان لە ئەنقەرە و ئەستەنبوڵ بدۆڕێن و لە کوردستان ببرێنەوە، بۆیە دەبێ پەکەکە ئەوە بزانێ کە کوردانی باکوور تۆڵەی ئەو سیاسەتە هەڵە و ئامانج گۆڕکێیەی لە پەکەکە کردۆتەوە، ئەوەش لە پەکەکە دەخوازێ بە هەڵەکانی خۆیدا بچێتەوە و کوردبوون و کوردایەتی بکاتەوە ئامانجی دوور و نزیکی خۆی و واز لە سەرەڕۆیی سیاسی و دژایەتی کردنی حزب و لایەنە سیاسیەکانی پارچەکانی تری کوردستان بێنێ و لە سەنگەری داگیرکارانیش بێتەوە دەرێ.