هندی مە ل بیرە و بۆ مە ژ باب و باپیران ژی هاتییە ڤەگێڕان و بەرپەڕێن دیرۆکێ ب دیدەڤانییا گەرۆک،رۆژنامەڤان و ساسەتڤانێن بیانی ژی وێ ئێکێ دووپات دکەن، کو گەلێ کورد گەلەکێ (مرۆڤ دۆست،هەڤکار،ئاشتیخواز،مەرد و دلۆڤان)ە.مافێن چ گەلان نەخوارینە، هیچ جارەکێ نە زۆڵم ل سەر خوە قەبویلکریە و نەزۆڵم ل چ گەلێن دی کریە، گەلەکێ بەرەڤانکەربوویە و دووربوویە ژ هێرشکرنێ...
لێ هەر جارا بۆ دوژمنی هەلکەفت بیت چ رێکێن هۆڤانە هەبووینە ل دژی گەلێ مە بکارئیناینە. هەر ژ (سووتن،کاڤلکرن،کیمیابارانکرن،دەربەردەرکرن،شەهیدکرن ...هتد) هەتا جار ب ئەجنە و جار ژی ب جوی پێناسا مە کوردان کریە.لێ بەرەڤاژی ڤان هەموو بێویژدانییان، هەر دەمێ ل دوژمنێ مە کوردان قەومی بیت و تووشی نەهامەتی و دەردەسەریەکێ بووبن، گەلێ مە کەیف ب زەلیل و زیانڤێکەفتییان نەهاتییە ،بەلکو ب هەموو رێکان هەڤکارییا وان کریە!.
هەردەم مە گۆتییە "کورد،تورک،عەرەب و فارس" برانە، و گەلەک جاران مە ب سەرەدەریەک برایانە دەرگەهێن دل و مالێن خوە ژی بۆ ڤەکرینە. لێ وان ب ئاسن و ئاگران بەرسڤا قەنجیێن مە دایە. ئەگەر باس ل عیراقێ بکەین و ل عیراقێ ژی ب تایبەت باس ل مووسڵ بکەین، بێگۆمان هەر تاکەکێ کورد دزانیت کو هەر ژ کەڤندا مووسڵ باژێڕەک بوویە کو گەلەک ژ خەلکێ وی باژێڕی ب هەموو رەنگان ل دژی کوردان بووینە،د تەنگاڤییان دا پەسنا کوردان کریە و دەمێ کەفتبنە بەرفرەهیێ چ تشتێ کرێت ژ دەستان هاتبیت هەمبەر گەلێ مە کریە. نموونە د زۆرن...
دەمێ حوکمڕانییا "سەدامێ دکتاتۆر"،ژبلی کو عەرەبێن مووسڵ ب چاڤێ پلە دوو تەماشەی کوردان دکر،چ کرێتییا هەبایە ژی هەمبە کوردێن مووسڵ دکر. یان ئەگەر کوردێن دەڤەرەکا دی سەرەدانا مووسڵ کربایە تا ل زاڵگەهێن وی باژێڕی دەربارزببان، پڕانییا جاران تووشی سڤکاتی پێکرن و هات و هۆڤێن سەردەستێن وی دەمی دبوون، گەلەک جارانژی کەل و پەلێن وان ژێ دهاتنە ستاندن و تووشی لێدان و ئەشکەنجەدانێ دبوون. دیسان ل سەردەمێ رژێما بەعس پڕانییا وان کەسان یێن کورد زیندان دکرن،ئەشکەنجەددان ،بێی هیچ ئەگەرەک د کوشتن و ب ساخی بنئاخ دکرن مووسڵاوی بووینە!.
پشتی ژناڤبرنا رژێما بەعس و هاتنا رێکخراوا تیرۆرستی یا داعش بۆ مووسڵ،پڕانییا مووسڵاوییان ب دەستقۆتان و بخێرهاتنەکا گەرم پێشوازی ل رێکخراوا ناڤهاتی کر،دیسان ب پلەئێک کوردێن مووسڵ بوونە قوربانی و ژ مالێن وان هاتنە دەرئێخستن چ نەما ل هەمبەر کوردان نەکری.مووسڵ وەک نموونە بۆ عەقلییەتا عەرەبان هەمبەر کوردان کو هەردەم پڕانییا وان ئەم ب برایێن خوە نەداناینە و ل دژی مە و مافێن مە بووینە. لێ سەرباری وێ کەرب و کینا د دلێن وان و سەردەستێن وان دا ل هەر دەمەکێ کارەساتەک ب سەر وان دا هاتبیت هەوارێن خوە گەهاندینە حکوومەتا هەرێما کوردستانێ. ژبەرکو ئەو ژی ل سەر وێ ئێکێ د پشتراستن کو هیچ جارەکێ نەکورد وەکی وان هزردکەن، نە وەکی وان تۆڤێ کەربێ د دلێ خوەدا چاندییە و نەوەکی وان د دلرەق ژی بووینە یان دلرەق دبن!. بەرەڤاژی بەلکو هەرجارەکا تشتەک ب سەرێ وان هات بیت ل دووڤ شیانێن خوە هەتا هندەجاران زێدەی شیانێن خوە ژی هەم خەلک هەم حکوومەتا هەرێمێ د هەوارا وان چووینە و دەستێ هەڤکاریێ بۆ زیانڤێکەفتییان درێژکریە. بۆ ڤێ ئێکێ ژی نموونە د زۆرن، دێ باس ل هندەکان کەین...
ل دەمێ گەلەک ژ عەرەبێن مووسڵ ئەوێن خوە رادەستی رێکخراوا تیرۆرستییا داعشێ نەکرین و بزاڤ کرین زارۆک و کچ و ژنێن خوە ژ هۆڤینییا وێ رێکخراوێ بپارێزن، بەری هەوارێن خوە بگەهیننە سەردەستێن خوە گازیێن خوە گەهاندنە هەرێما کوردستانێ و هەوارێن خوە ئینانا بەردەرگەهێ جەنابێ سەرۆکێ حکوومەتا هەرێمێ. وەکی هەموو دونیایێ دیتی ژی کو سەرۆکێ حکوومەتێ ب خوە هەر زۆی فەرمانگەهێن هەرێمێ راسپاردن کو جهێن گۆنجای دەستنیشان بکەن ،خیفەتان بۆ ئاوارەیان ڤەدەن،پێشوازیێ لێ بکەن و یا دشیاندابیت بۆ بکەن،کەمپێن حەسەن شام و خازر ...هتد بەڵگەیێن ڤێ ئێکێ نە. دیسان بانگەوازی تەڤایا خەلکێ هەرێمێ کر کو چ ژ دەستی بهێت بۆ ئاوارەیێن مووسڵ بکەن و ب خوەدێ خوەڤە تا رزگارکرنا مووسڵ هەڤکارێ ئاوەرەیێن مووڵ و هەموو ئاوەرەیێن دی بوو یێن خوە هاڤێتییە سەر بەخت و ویژدانا وی. سەرباری وێ ئێکێ کو ل وی دەمی ژبەرکو مەزنترین هێرشێن وێ رێکخراوا تیرۆرستی بۆ سەر هەرێمێ ب خوە ژی بوون و ژلایەکێ دیڤە ژبەر بڕینا بۆدجەیێ هەرێمێ ژ لایێ سەردەستێن بەغدایێ،هەرێماکوردستانێ د قەیرانەکا کویر و دژواردابوو. لێ وەک مە ئاماژەپێکری حکوومەتا هەرێمێ ب هەمی هێز و شیانێن خوە ئاوەرەیێن مووسڵ و گەلەک ناڤچەیێن دی یێن عیراقێ ڤەحەواندن و سەرەدەرییەک برایانە ل گەل کر و
هەمی جۆرێن هەڤکاریێ هەر ژ جهێ ڤەحەویانێ، ئاڤ،کارەب ،پێدڤیێن تەندروستی بۆ دابین کرن،. و ژبلی حکوومەتا هەرێمێ ژی خەلکێ هەرێمێ ب خوەژی خەمساڕی نەکر، هەتا نان و ئاڤێن ل بەر خوە ل بەروان دانانان ،جل و نڤینێن خوە ژی پێشکێشی وان کرن و ب چ رەنگان ژی وەک پەسنەک بۆ خوە ڤەنەگەڕاندییە و وەک موزایدەژی بکار نەئینا. بەلکو بتنێ گۆت ئەم برایێن ئێکین و ئەڤە ئەرکەکێ مرۆڤایەتی و برایەتیێ یە.
هەلبەت ئەڤە هەمی د دەمەکیدا کو د وان کاودانێن ب زەحمەت و دژواردا، یێن هەرێم تێدا دەربازدبوو،حکوومەتا بەغدایێ هەمی ئاوەرە پشتگوهـهاڤێتبوون و وەسان سەرەدەری دکر کو ئەوێن ل مووسڵ و رمادی و ناڤچەیێن دی ژبەر تیرۆرستان رەڤین و هاتینە هەرێمێ هەروەک نە هەڤوەڵاتیێن وان بن!.
د دووماهیک روودانا بەریا چەند رۆژان ئەڤا ل رویبارێ دیجلەژیدا چێبووی کو مەرگەساتەکا مەزن روودا ب نقۆمبوونا بەلەمەکا گەشتیاری و د ئەنجامدا چەندین ژن و زارۆ ...هتد بوونە قوربانی وێ کارەساتا دلهەژین. د ڤێ کارەساتێژی دا دیسان جەنابێ رێبەرێ کوردان "مەسعودبارزانی"هەڤخەمییا خوە دەربڕی و خوە ب هەلگرێ خەما وان دانا و سەرۆکێ حکوومەتێ ژی د هەمان دەم دا پەیوەندی ب"نەوفل حەمادی" پارێزگارێ وی دەمی یێ مووسڵ کر و بەرهەڤییا خوە بۆ هەمی جۆرێن هەڤکاریێ دەربڕی و هەتا ل کوردستانێ نەخۆشخانە و دەزگەهێن فریاگ
ۆزاری...هتد بۆ هەر ئەگەرەکێ بەرهەڤکرن. دیسان حکوومەتاهەرێمێ وەک هەڤخەمی و رێزگرتن بۆ گیانێ قوربانیان ماتەمینی ل کوردستانێ راگەهاند و ئاهەنگێن جەژنا نەتەوەییا کورد راگرتن. ئەڤە هەمی ژبۆ برایێن مە یێن عەرەب کرن و یا جهێ دلئێشانێ ئەوە کو سوبەهی کورد داخازا بچویکترین مافێن خوە بکەن هەر ئەڤێن ل دوهی خەلکێ هەرێمێ نان و ئاڤ و جلێن خوە پێشکێشی وان دکرن، مینا (وی مارێ سەرمایێ لێدای و رێڤینکەکی کریە د پاخلا خوەدا وئینایە مال و ل بەرسۆپەیێ گەرمکری تا خوینا وی باش گەڕیایی و ئاگەهـ ژ خوەبووی، ل شوونا سوپاسیێ ب رزگارکەرێ خوەڤەدای!)،ئەڤەژی دیسان وەکی هەرجار ل ڤان بەرتەنگییان پەسنا رێبەرێن مە بکەن و پاشی ب گەلێ مە ڤەدەنەڤە،چونکی ل هەمی دەمان مە وەک برا و وان وەکی دوژمن سەرەدەری ل گەل مە کریە و چ جاران ب وێ دیتنا ئەم وان دبینین وان ئەم نەدیتینە.