یا خۆیایە کو قەیرانا ئابووری و دارایی ئەوا لساڵا ٢٠١٤ێ سەرھلدای کارتێکرنێن خۆ یێن نێگەتیڤ و پۆزەتیڤ لسەر ئاستێ ئابووری، دارایی، پەوروەردەیی، چڤاکی، سیاسی، رەوشەنبیری، پیشەسازی، کشتوکالی، لەشکەری، ساخلەمی، ژینگەھی و دەروونی و ...تد ب جە ھێلان, ئانکو رولێ دەولەتا خزمەتگوزار و چاڤدێر و پارێزا جڤاکی د پاشداچوو و چەند دان و دیاردە یێن نوی و نامۆ یێن مەترسیدار ژی دناڤ جڤاکی دا سەرھلدان و پەیدابوون.
بۆ نمونە: قەیرانا دارایی و بریارا پاشەکەفتکرنا مووچەی، فروتنا ئەندامێن لەشێ مرۆڤان، بێکاری، کوچبەری، لەشفرۆشی، خاکفرۆشی، تەلاقدان، قەیرەبوونا کچان، دزیکرن، لاوازبوونا ئاستێ پەوروەردە و فێرکرنێ و ئاڤانەکرنا قوتابخانەیان و کێم چاپکرنا پرۆگرامێن خاندنێ، دویرکەفتن و ڤەقەتیانا بەشەکێ قوتابیان ژ خاندنگەە و پەیمانگەە و زانکۆیان، کێمبوونا خاندن و ڤەخاندنا پەرتووکان ب گشتی، دائێخستنا گەلەک رۆژنامە، کوڤار، رادیۆ و کەناڵێن راگەھاندنێ، لاوازبوونا ئاستێ رەوشەنبیریێ تاکێ جڤاکێ مە، نەمانا بەڵانسێ تەنگژینا رەفتاری ب ئەگەرێ گڤاشێن لسەر دەزگەھێ تورەبونێ، ئەنفالکرنا کوردێن ئێزدی ل شنگالێ، (١٤١٥) شەھید و (٩١٣٤) بریندار ژ پێشمەرگەھێ کوردستانێ، رویدان و خیانەتا ١٦ێ ئوکتوبەرێ و ژدەستدانا ٥١% ژ ئاخا کوردستانێ، دیسان ژلایەکێ دی ژی قەیرانێ بەرێ بەشەکێ ھەڤوەڵاتیان ژی بۆ کارکرنێ و چاندنێ ژی زڤراند، لێ د ئاستەکێ لاواز دابوو، چونکە بەری گاڤێ کەرتێ چاندنێ و پیشەسازیێ ب کەرتەکێ گرنگ نەھاتییە ھژماردن و بوودجەیەکا ھەژی بۆ نەھاتییە دانانان د ھەموو کابینەیێن بوری یێن حوکمەتا ھەرێما کوردستانێدا.
ئەڤجا بریارا نەھێلانا پاشکەفتێ مووچەی ژ لایێ حکومەتا ھەرێما کوردستانێ "ھەر چەند مووچە نە یێت دادپەروەرن" بریارەکا پێدڤی و دروست و راستە، لێ چارەسەرییا ھەموو وان گرفت و دیاردە و دانێن ساڵێن قەیرانێ ناکەت و کاریگەرییا وان ژی رەشڤەناکەتن و ھەموو برینان ژی دەرمان ناکەت، لەوا پێدڤییە حکومەت ھزرێ ل چارەسەرێن بنەڕەتی و زانستی بکەتەڤە و جڤاکێ کوردستانێ ژ جڤاکێ مشەخۆر بۆ جڤاکەکێ بەرھەمئینەر ڤەگوھازیت، ئەو ژی ب رێکا تەرخانکرنا بوودجەیەکا ھەژی بۆ پەروەردە و فێرکرنێ و خاندنا بلند، ڤەژاندنا پرۆژە یێن چاندن و پیشەسازیێ، بلندکرنا ئاستێ خزمەتگوزرای یێن ساخلەمیێ، گوھڕینا کواڵتییا ڤان سێکتەرێن لسەری ئاماژە پێ ھاتییە دان، وەکو ھەوڵەک بۆ بنبڕکرن و نەھێلانا سێیانەیێ نەزانینێ و ھەژاریێ و نەساخیێ، چونکە چ وەڵات بێی نەھێلانا سێیانەیێ لسەری نابنە وەڵات، چ وەڵات ژی ب بێ پلانیێ و نەزانینێ ناھێنە ئاڤاکرن و پێشکەفتنێ ژی بخۆڤە نابینن، ھەر وەکو سوکراتی ژی گووتی: ئێک تشتێ گرانبوھا دڤێ جیھانێدا یێ ھەی ئەو ژی زانینە (معرفە) دیسان ئێک تشتێ خراب و ب کێرنەھاتی ژی ھەیە کو ئەو ژی نەزانینە (جھل)"، لەوا ژی دەما تەماشەی دیرۆکا ھەر بزاڤ و لڤینەکا رەوشەنبیری و رامیاری و جڤاکییا گوھڕینخواز دکەین دێ بینین کو شەنگەستەیێ وان دژایەتییا نەزانینێ یە و گرنگیێ ب زانینێ و زانستی ددەن، و ھەکە بنیاتێ وێ شەڕکرن و دژایەتییا نەزانینێ نەبیت !، دێ د دیرۆکێدا ب ھیچ و نە چ تشت ھێنە ناسین و قەلەمدان.