د هەموو سەردەمەکیدا دەڤخۆش ئانکو "مەلاق" هەنە کو ئەو کەسن یێن بێ شیان و کێمترین و سەرەتاییترین مەرجێن گەهشتنێ ب پلە و پۆستەکی ژ پلە و پۆستان نینە، ڤێجا دێ خۆ بۆ دەستهەڵاتداری دەڤخۆش کەت و رێزەکا بێ سنۆر ژ بەرپرسەکی ژ بەرپرسان گریت، کو ئەو رێزگرتن نە ژدلە، بتنێ بۆ وێ ئێکێیە، کو بگەهیتە پلە و پایەکی ب رێکا ئاخفتنێن نەرم و قسەیێن خۆش.
ڤێجا د کەڤندا بڤان جورە کەسان گووتییە کەسایەتییا
"باجانڕەشکی" کو ل دەردوورێ دەستهەڵاتێ هەنە، چ سەردەمەک ژی بێی ڤان باجانڕەشکییان نەبوویە.. باجانڕەشکی دێ بۆ تە هەمان تشتی رەش و سپی کەن، دێ تشتەکی و بەروڤاژییا وی ژی بێژن، هەیاکو د بەرژەوەندییا دەستهەڵاداری دا بیت.. بەلێ پا دا بزانێن باجانڕەشکی د بنیاتدا کینە؟
دهێتە ڤەگێڕان کو میر "بشیر شهاب-ی" کو (ئێکە ژ ب ناڤ و بانگترین میرێن د دیرۆکا لوبنانێ و وەڵاتێ شام-ێ دا ب گشتی.. ژ بنەماڵا شهاب-ی یە، یێن حکوومڕانییا دەڤەرێ کری هەر ژ ۱٦۹۷ێ هەیا ۱۸٤۲ێ)، رۆژەکێ گووتە خزمەتکارێ خۆ: دلێ من لسەر خوارنا باجانڕەشکانە.. خزمەتکاری گووت: میر .. خودێ باجانڕەشک پیرۆزکرینە، ژ سەروەرێت خوارنانە، گوشتەکێ بێ بەزە، ماسییەکا بێ داسییە، ب قەلاندی، بژارتی و حەشاندی دهێتە خوارن.. و خزمەتکار یێ بەردەوام بوو لسەر ژماردنا مفایێن باجانڕەشکان، هەیاکو میر حێبەتیبووی ژ "ژێهاتییا سالوخەتان"!
حێبەتیکرنەکە د وێ چەندێ دا بوو کو خزمەتکارێ باجانڕەشکی چ لێکدانەڤەکا دی بۆ نە دانابوو .. میر بەشیر-ی گووتێ: بەلێ پا من بەری چەند رۆژان ژێ خار بوو، گەدە یا من توشی ئێشێ ببوو.. خزمەتکاری گووت: نەفرەتێن خودێ ل باجانڕەشکان بن .. ئەو یا گران، ستویر و بایە و رویڕەشە .. ل ڤێرە میرێ گووتێ: خودێگیر!!! .. تۆ یێ د هەمان دەمدا پەسنا تشتی دکەی و ب خرابی ژی لسەر دبێژی؟.. خزمەتکاری گووت: میرێ من ئەز خزمەتکارێ میری مە، نە خزمەتکارێ باجانڕەشکانم .. هەکە میرێ گووت: بەلێ دێ بێم "بەلێ" .. و هەکە میری گووت: نە.. دێ بێم نە!.
مخابن، ئەڤ کەسێن باجانڕەشکی گەلەک د مشەنە د ژیانا مەدا..
و رەوشێ پێدڤییا ب میرەکێ شهاب-ی هەی.
ئەڤ جورە کەسە یێ دگەل میری دا چ ب بێژیت "ئا" یان "نا"، ئەڤ کەسە وەڵاتی ئاڤا ناکەن، وەکو مشکانن دەما کەشتی نقووم دبیت .. بۆ رەڤینێ یێن ئێکێنە!، ئەڤجا ژوان باوەڕ نەکەی.. هشیاربە میر.