دەما چاڤ خشاندنەکێ د رەوشا چەند ساڵێن بووری یێن ھەرێما کوردستانێ دا دکەین ژ لایێ ئابووری، رامیاری، لەشکەری و خزمەتگوزاریڤە، کومەکا گرفت و قەیران و گەفێن مەزن کەتنە پێشبەری ھەبوونا مە وەکو قەوارەیەکێ رامیاری، کو ب خۆشحالیڤە ئەو رەوش و رۆژێن تاڵ ھەر ژ ھاتنا رێکخروا تیرۆریستییا داعش و شکەستنا وێ لسەر دەستێ پێشمەرگەھێن کوردستانێ و ھەڤپەیمانان و لدویڤدا ئەنجامدانا ریفراندۆمێ و دەرکەتنا دەرئەنجامی کو رێژا زێدەتر ٩٢% دەنگ ب سەرخوەبوونێدا و ھەیا ١٦ێ ئوکتوبەرا ٢٠١٧ێ کو حکومەتا عیراقێ و حەشدا شەعبی و کاڵفامێن ناڤخۆیی و ب پشتەڤانی یا ھەرێمایەتی، ب بێ شەر کەرکوک رادەستی حەشدێ کرین و ٥١% ژ ئاخا کوردستانێ کەتی ددەستێ میلیشایێن حەشدێدا، دۆرپێچا دارایی و داخستنا فڕۆکاخانەیان، زێدەباری کو ھەوڵا ژناڤبرنا قەوارەیێ رامیاری و یاسایی یێ ھەرێما کوردستانێ ژی ھاتەدان و نەشیان وسەرنەکەڤتن، پشتی ئەو بەرخۆدان و خوڕاگرییا ھێزا پێشمەرگەی و داستانێن پردێ و سحێلا ھاتین تومارکرن، ئێدی رەوشەکا نوی ھاتە د رۆژەڤێ دا، گەلێ عیراقێ و کوردستانێ بەرەڤ سەبەتەیێن دەنگدانێ چووین، گەلێ عیراقێ ب گشتی و گەلێ کوردستانێ ب تایبەت ل بەندا وان سۆز و ژڤانانە یێن ب دەنگدەران ھاتینە دان.
لدور گەلێ کوردستانێ ب کورتی و کوردی ھەڤوەڵاتییان چەند داخازی و کریار ژ حکومەتا بھێز یا داھاتی یا کوردستانێ ھەنە:
نەھێلانا پاشکەفتێ مووچەی و دانانا سیستەمەکێ دادپەروەر بۆ مووچەیێ فەرمانبەران ل ھەرێما کوردستانێ کو جوداھی یێن نەداد دناڤبەرا مووچەیێن فەرمانبەرێن دام و دەزگەھێن حکومەتێ دا ژ وەزارەتەکێ بۆ ئێکا دی ھەیە، سەرباری کو ھەمان باوەرنامە و سالێن خزمەتێ ھەنە! و پەیرەوکرنا شەنگستەیێ دادپەروەریا دارایی کو ١ لسەر ٦ ـە، ئانکو بلندترین مووچە دڤێت ٦ بەرامبەری کێمترین مووچە بیت، پشتەڤانی یا کەرتێ پەروەردێ و فێرکرنێ ژ لایێ پێدڤی یێن خاندنێ، پرۆگرام و ئاڤاھیان و دامەزراندنا مامۆستایان. چاککرنا سیستەمێ ساخلەمیێ ل ھەرێما کوردستانێ، کو ھەم نەساخ و ھەم نوژدار تێدا د بەرزەنە، و رێکخستنا کلینیک و نەخۆشخانەیێن تایبەت ژ لایێ نرخێن پلێتێن نوژداران و پشکنینێن تاقیگەە و ...تد. دەستپێکرنا ھەوەکا نشتیمانی بۆ ڤەژاندنا کەرتێ پیشەسازی یا چاندنێ و پشتەڤانی یا جوتیارن، دروستکرن و پالپشتیکرنا گەنجان ب رێکا پرۆژەیێن بچووک و ھاندنا سەرمایەداران ب وەبەرھێنانێ د کەرتێ پیشەسازی دا ب گشتی و نەھێلانا مایتێکرنا بەرپرسێن بازرگان د پرۆژەیێن وەبەرھێنانێو بازاریدا، دروستکرنا کارگەھان ل باژێر و باژێرۆکان پێخەمەت دروستکرنا دەلیڤە یێن کاری و کێمکرنا رێژا مەترسیدارا بێکاریێ کو رێژەکا زۆر ژ وان دەرچوو یێن پەیمانگەە و زانکۆیانە و پێشبینی یا پەقینێ ژێ دھێتە کرن، چونکە چەند ساڵن چاڤەڕێی دامەزراندنێ دکەن چ د کەرتێ گشتی یان تایبەتدا، کو وان گەنجان ب تایبەت و فەرمانبەران و ھەڤوەڵاتیان ب گشتی ھیڤییەکا مەزن ب حکومەتا داھاتی یا ھەرێما کوردستانێ ھەیە خۆ ل گرفت و بێ پارەییا وان بکەتە خوەدان و داخازێن وان تێدا بھێنە ب جئینان.