به‌رژه‌وه‌ندیێن گشتى به‌رى هه‌ر تشته‌كى نه‌ و نابیت بۆ خاترا چاڤێن هنده‌ك كه‌سان وه‌لاتێ خوه‌ بێخینه‌ د مه‌ترسیه‌كا مه‌زن دا، ئه‌ڤه‌ بۆچوونا پترییا وه‌لاتێن پێشكه‌فتى یه‌ ئانكو ئه‌و چ جاران پشت به‌ستنێ ب شیانێن كه‌سه‌كى ب تنێ ناكه‌ن، به‌لكو پشت و په‌نایا وان هه‌موو وه‌لاتیێن وانه‌ و وه‌كو تیمه‌كا ئێكگرتى كار دكه‌ن و چ جاران رێكێ ناده‌نه‌ هنده‌ك كه‌سێن به‌رژوه‌ندی خواز وه‌لاتێ وان تێك بده‌ن كو هه‌موو خه‌ما وان بتنێ به‌ریكا وان بیت و ئه‌ڤ چه‌نده‌ ل وه‌لاتێن پێشكه‌فتى هێلا سۆره‌.
لڤێره‌ من دڤێت باس ل هه‌رێما كوردستانێ بكهی‌ن كا تا چ راده‌ به‌رژه‌وه‌ندیێن گشتى هاتینه‌ پاراستن وه‌كو یا دیار و ئاشكرا ئه‌م نه‌شێین بێژین به‌رژه‌وه‌ندیێن گشتى ناهێنه‌ پاراستن یان دهێنه‌ پاراستن ئه‌ڤه‌ تشته‌كێ رێژه‌ییه‌ و چه‌ندین هوكار هه‌نه‌ ل دیڤ بسپۆرێن جڤاكى كا بۆچى ل هنده‌ك وه‌لاتان به‌رژوه‌ندیێن گشتى ناهێنه‌ پاراستن هوكارێ هه‌رى سه‌ره‌كى واسته‌كارى یه‌ و واسته‌كارى ژى ل وان جڤاكان یا به‌ربه‌لاڤه‌ یێن سیسته‌مێ وان خێله‌كى ئانكو گه‌له‌ك جارا رێڤه‌به‌ره‌ك نه‌شێت ئاخفتنا ئاغایه‌كى یان كه‌س و كارێن ئاغایى یان مرۆڤێن خوه‌ نه‌كه‌ت و ده‌مێ ئه‌و رێڤه‌به‌ر وى كارى دكه‌ت بێ گومان كاره‌كێ نه‌قانوونى یه‌، به‌لێ بو هندێ دلێ وان ژ خوه‌ نه‌هێلیت دێ وى كارى كه‌ت و ئه‌گه‌ر به‌رێ خوه‌ بده‌ینه‌ ئه‌نجامێن وى كارى بێ گومان دژى به‌رژوه‌ندیێن گشتى و ب تنێ چه‌ند كه‌سه‌ك دێ مفایى ژ كرنا وى كارى بینن و ئه‌ڤ چه‌نده‌ ژى دچیته‌ د قالبێ به‌رژه‌وه‌ندیین تاكه‌كه‌سى دا.
حكومه‌ت و پاراستنا به‌رژوه‌ندیێن گشتى، بێ گومان ئه‌ركێ حكومه‌تا هه‌رێما كوردستانێ یه‌ كو ب چه‌ندین رێكان كار ل سه‌ر پاراستنا به‌رژوه‌ندیێن گشتى بكه‌ت و نه‌هێلیت چه‌ند كه‌سه‌ك به‌رده‌وام به‌رژوه‌ندیین گشتى تێكبده‌ن و یا گرنگه‌ ئه‌ڤ كه‌سێن ب كارێن واسته‌كاریێ رادبن و دبنه‌ مه‌ترسى ل سه‌ر ژیانا وه‌لاتیان ب توندى بهێنه‌ سزادان و چ جاران لێبۆرین بۆ وان كه‌سان نه‌بیت.
هه‌روه‌سا ئاخفتنه‌كا كورده‌وارى یا هه‌ى ده‌مێ دبێژن حكومه‌ت كێڤریشكێ ب عه‌ره‌بانێ دگریت، هه‌ر ژ به‌رهندێ حكومه‌تا هه‌رێما كوردستانێ ب چه‌ندین رێكان دشێت شه‌رى دگه‌ل به‌رژه‌وه‌ند خوازان بكه‌ت و رێگریێ لێ بكه‌ت و ئه‌گه‌ر ئه‌م به‌رێ خوه‌ بده‌ینه‌ وه‌لاتێ سۆیدێ كو وه‌لاتیێن وێ دبێژن ده‌مێ كه‌سه‌ك مافێن خه‌لكێ سۆیدێ دخوت هه‌ر وه‌كو وى وه‌لاتێ مه‌ هزار جارا وێرانكرى و خه‌لكێ وى وه‌لاتى بخوه‌ژى یێ هشیاره‌ و ناهێلیت كه‌سه‌ك مافێن وان بخوه‌ت و به‌رده‌وام پشته‌ڤانێن حكومه‌تا خوه‌ نه‌ بۆهندێ سۆید هه‌ر بمنیت وه‌لاته‌كێ مه‌زن.
ل دوماهیكێ یا گرنگه‌ حكومه‌ت و وه‌لاتى پێكڤه‌ میكانیزمه‌كێ گونجایى بۆ پاراستنا به‌رژه‌وه‌ندیێن گشتى بدانن و دژى وان كار بكه‌ن یێن دبنه‌ ئه‌گه‌رێ په‌یدابوونا جوداهیێ د ناڤبه‌را وه‌لاتیان دا.