چه‌ندی دیرۆكێ بیره، هه‌رده‌م گوندێن كوردستانێ ڤالابووینه ژلایێ داگیركه‌ر و رژێمێن ل دووڤ ئێك ل هه‌موو پارچێن كوردستانێ، به‌لێ شه‌رێن ناڤخوه ژی ژ پیلانێن وان بووینه ژی و هێزێن كوردی ب خوه هاتینه پالڤه‌دان كو بمیننه ب ئێكودو ڤه، میناكا ئه‌ڤرۆ ژی حزبا برایێن مه یێن كورد یێن په‌كه‌كێ بۆ بكارئینانا ئاخا هه‌رێما كوردستانێ كو پتری 500 گوندێن كوردستانێ ژ به‌ر وان ڤالا بووینه و هاتینه به‌ردان، ب سه‌دان كه‌س ژی بووینه قوربانی فرۆكه‌یێن توركیا ژبه‌ر راهێلانێن وان. بووینه ئه‌گه‌ره‌ك كو توركیا هه‌رده‌م یا به‌رهه‌ڤ بیت، و ته‌روهشك ب هه‌ڤرا بسۆژیت هه‌تا گه‌هشتیه وی راده‌ی خه‌لكێ بێگونه‌ه بوویه قوربانی. پره‌نسیپ وئارمانجا وان یا ئێكێ ئه‌وه كو كوردستان توركیا رزگار بكه‌ن و ل وێرێ ده‌وله‌ت و كۆمار و كیانێ خوه رابگه‌هینن، به‌لێ ل كۆمارا زاب ل ناڤ هه‌رێمه‌كا سه‌ربخوه یا برایێن وان، مانه دێ ئه‌وا هه‌یی ژی ژده‌ستمه‌ده‌ن؟!. یان ل شنگالێ كو ب فه‌رمی سه‌ر ب عیراقێ ڤه‌یه!. ئه‌ڤه هه‌موو ل ره‌خه‌كی به‌لێ گه‌فێن وان ل سه‌ر خه‌لكێ وان گوندان و برنا خه‌لكێ وان كچ و كوران، ب هه‌ر رێیه‌كا هه‌بیت، ئه‌رێ دێ چ مفای گه‌هینته كوردستانێ؟!. چه‌ندین سالن ژ بلی شه‌ر و شه‌ماته و ئینانا ده‌ستێ دوژمنی بۆ ناڤ ئاخا هه‌رێمێ، كی دكاریت بێژیت كو ئه‌ڤ مفایه گه‌هاندیه خه‌لكی؟!!. نها كیانێ هه‌رێما كوردستانێ و سه‌ربخوه‌یا وێ جهێ خۆشحالیا هه‌ر كورده‌كی یه ل سه‌رانسه‌ری جیهانێ، كو هنده ب زه‌حمه‌ت و تێكۆشان و خوین و قوربانی، ب رۆندكێن دایكان هاتیه دی، دێ بۆچی بیته قوربانی و ته‌ڤلی مه‌ترسیان بیت؟، مینا دبێژن چیچكه‌ك د ده‌ستێ دا، باشتره ژ ده‌هێن ل سه‌ر دارێ. هه‌كه ئه‌و دهاریكار بن، بلا ڤێ سه‌ربۆرا زێرین ونازك بپارێزن نه‌ك ته‌ڤلی ژناڤچوونێ بكه‌ن. بۆ میناك چونكو حه‌تا راده‌كی په‌یوه‌ندیێن هه‌رێمێ ل گه‌ل توركیا پیچه‌ك باشبوون، تایبه‌ت ژی كو ده‌رگه‌هێن بارزگانی ڤه‌بوون، پشتی ڤان قه‌یرانێن سه‌حت ل سه‌ر خه‌لكێ هه‌رێمێ، خواست ڤێ ده‌ڤه‌رێ تێكبده‌ت، وه‌كو خه‌ونه‌كا نه‌خۆش پیڤه‌دیت، به‌لێ سه‌ركرده‌یێن هه‌رێما كوردستانێ ژی ب له‌ز هایداری ڤان پیلانان بوون و نێچیرڤان بارزانی سه‌رۆكێ وه‌زیرێن هه‌رێمێ ڤێرا گه‌هشته‌ڤه و ئه‌و شاشیێن وان زیقكرن و نه‌هێلا دۆخ نه‌خۆشتر لێبهێت. چونكو سیاسه‌تا دروست ب دووڤچوونا عاتیفه‌یان تێكدچیت، ئه‌م پێدڤی هندێ نینین دوژمنێن خوه پتر زێده‌كه‌ین، هه‌موو ل مه ب هه‌جه‌ت!. دبیت هه‌سته‌كا نه‌ته‌وه‌ی ب ره‌خنه‌گرتنا ڤێ حزبێ نیگه‌ران ببیت، به‌لێ گومان و نیشانێن زیق هه‌كه بهێنه به‌رچاڤكرن، به‌لانسه‌كا ئاقلانه‌یه، چونكو هه‌ر ژ رۆژا سه‌ركردێ حزبێ عه‌بدولا ئوجه‌لان هاتیه گرتن، ئه‌ڤ حزبه هاتیه گوهارتن و گومانێن لاوازیێ زۆربووینه، نه‌كو ده‌ستێن پلاندارێتنێ گه‌هشتبنێ. واته د چاڤێریكرنه‌كا سیاسی دا دیار و ئاشكرایه كو دوژمن زۆر و حزب و لایه‌نێن ناڤخوه ژی زێده‌بووینه و هه‌ر ژ پیلانێن وانن كو ب هه‌موو رێیان دهێنه كوردان كو كیانێ وان لاواز بكه‌ن، نوكه ژبلێ حزبێن سه‌ره‌كی چه‌ندین بزاڤ و حزب و لایه‌نێن ئوپوزسیۆنێن توند ماینه ب لێڤا حه‌كمه‌تێ ڤه، رۆژ بۆ رۆژ بهانا دگێرن و مه‌زن دكه‌ن، ئه‌ڤه به‌س نینن، كو ئه‌و ژی بهێته سه‌ر و مه د ناڤ بۆیه‌رێن سووریێ و ئیرانێ و توركیا دا بهۆژینیت.؟! ما دێ دانوستاندنان ل گه‌ل چه‌ند لایه‌نان كه‌ین؟!. ئها ئه‌ڤه‌نه مفایێن په‌كه‌كێ بۆ برایێن وان یێن هه‌رێمێ.
شێرزاد نایف
