ماوەیەکێ درێژە بۆ پێکئینانا کابینەیا نوی یا حکوومەتێ،پارتی دانوستاندنان دگەل لایەنێن سیاسی یێن کوردی بتایبەتی ژی ئێکەتیێ دکەت. پارتی د ناڤخۆیا خۆ دا پارتەکا ئێکگرتی و بێ چەق،باڵ و بەرەیێن جودا جودایە و هیچ پاڕتییەک لژێر بڕیارێن رێبەرێ کوردان "مەسعودبارزانی" و جێگرێ وی"نێچیرڤان بارزانی" دەرناکەڤن. هەر ژ بەر ڤێ ئێکێ پارتی بۆ دابەشکرنا پۆستان د ناڤخۆیا خۆ دا هیچ کێشەیەک نەبوویە و نییە. لێ یا بارێ پارتی گرانکری، پارتێن دی بووینە و ژ پارتان ژی بتایبەتی ئێکەتی بوویە. لەوما پارتی پێدڤی ب دەمەکێ درێژە کو هەمی باڵ و مال ، چەق و تایێن ئێکەتیێ رازی بکەت و تێبگەهینیت، کو بزاڤێ نەکەن ئەو ئاڤێن وان شێلی کرین ب دەستێن پارتی زەڵال بکەن. دیسان ئێکەتی رازی ببیت کو باوەریێ ب دیمۆکراسیێ بینیت و ل دویڤ سەنگا خۆ داخازا پۆستان بکەت!!،
گەلەک بزاڤ بۆ ڤێ مەبەستێ کرن ژی. لێ ئێکەتیێ وەکی ڤێ نموونەیا ل خوارێ سەرەدەری دگەل بابەتی کر...
(د بەرێدا د ناڤبەرا چەند گوندەکێن نێزیکی ئێک خۆلێن تەپاپێی دهاتنە ڤەکرن،بۆ ڤێ مەبەستێ هەر گوندەکی تیمەک دروست دکر و هەر زارۆیەکی ل دویڤ شیانێن وی جهێ یاریێ بۆ دهاتە دەستنیشانکرن، لێ یا تیم ژ بەر ئێک دبر ئەو بوو،جارنا دا کەسەک یێ کو نە شۆتەکا ب هێز هەی و نە پشتەڤانان حەزژێدکر و نە ژی یێ گوڵکەر، بەرەڤاژی بەلکو چەندین گۆڵ ل سەر تیما خۆ کرین و چەندین دەلیڤەیێن زێڕین بەرزەکرین،و بتنێ ب کێر یەدەکیێ دهات، دا بێژیت"یاریێ نەکەم دێ بەرا هاڤێژمە د گوڕەپانێدا،دڤێت یاریێ بکەم و هێرشبەرێ سەرەکی بم، سەرباری ڤێ هەموویێ کابتنێ تیمێ ژی بم!!."هەڤالێن وی و ئەوێن تیم رێکدئێخست "دکەفتنە د ناڤبەرا نال و بزماراندا" یان دڤێت ئێشاندبایە و ژ ناڤ خۆ کربا دەر، یان ژی کربایە هێرشبەر و بەس دەلیڤە پیچکربان و گۆڵ ل سەر تیما خۆ تومارکربان!).
ئێکەتیێ ژی وەکی ڤی یاریزانی سەرەدەری دگەل بابەتی کر و سەرەدەریێ دکەت، ب ئاشکرایی و ب زەڵالی دبێژیتە پارتی:بلا مە نیڤا وە ژی کورسی یێن پەرلەمێنتویێ ب دەست خۆڤە نە ئینا بن، لێ وەکی مە دڤێت وەسا نەبیت دێ بەرا هاڤێژینە د گۆڕەپانێدا.

ئەڤا ئاماژەیێ پێ ددەین، د راگەهاندن و داخۆیانیێن کەسێن بەرپرس د ڤێ پارتێدا یا بەرچاڤە!
باشترین گرۆڤە، چەندین بەڵگەیێن حاشا هەلنەگر یێن ئێکەتیێ دێ دەینە پێش چاڤ(ل دەمێ راگەهاندنا رێککەفتنا پارتی و گوڕانێ، ئێکەتیێ گۆتە "شێخ جەعفەر شێخ مستەفا"ی، دەستێ تە یێ ڤەکرییە بۆ هەر ئەگەرەکێ!، لێ گرنگە ژ ئێکەتیێڕا بهێتە گۆتن: ئەرێ ما ل کەرکووکێ دەستێن وی دگرێدای بوون؟!).
پشتی کومبوونا هەژدەی شواتێ یا پەرلەمانێ کوردستانێ کو ژ بلی ئێکەتیێ هەمی لایەنێن دی بەشداربووین،ئێکەتیێ بەیاننامەیەکا جهێ مەندەهۆشیێ بەڵاڤکر. تشتێ ژ هەموویان نە بەر عەقلتر ئەو بوو دەمێ د بەیاننامەیا خۆ دا گۆتی: (گرێیا ب دەستان ڤەدبیت پارتی کرە گرێیەک کو ددان بۆ ڤەکرنا وێ بهێنە بکارئینان).ل ڤێرە یا سەیر ئەوە ئێکەتی خۆ تێناگەهینیت و دڤێت ل بەر خەلکی ژی بەرزەبکەت، کو ئەو گرێیێن ب دەستان ڤەدبن ئەو وەسان یێن شدینن کو نە ب دەستان و نە ژی ب دەڤی نەهێنە ڤەکرن. بەلکو ڤەکرنا وان بوویە ژ کارێن گەلەک ب زەحمەت. نموونە ژی "کەرکووک".
ئەگەر ب زمانێ هندەک ژ بەرپرسێن ئێکەتیێ بەرسڤا ئێکەتیێ بهێتە دان، دڤێت ژێڕا بهێتە گۆتن:
هەڤالێن ئێکەتی، مادەم پارتی نزانیت یان نەڤێت گرێیان ڤەکەت!! ئەو کەرکووک خەما وە و ل شوونا دەڤی وێ گرێیا وە ب خۆ چێکری هوون ب دەستان ڤەکەن!، بۆچی هوون داخازێ ژ پارتی دکەن بهێت کەرکووکا بەری شازدەی ئۆکتۆبەرێ بۆ وە بزڤڕینیت؟!.
وە ب خۆ ژی دیت ل بەری شازدەی ئۆکتۆبەرێ،ئالایێ کوردستانێ ل سەر هەمی فەرمانگەهـ و جهێن میری یێ بلندبوو،رۆژ بۆ رۆژێ حکوومەتا هەرێمێ ژ لایێ "زمان،ئابوور،ئارامی،خواندنا کوردی،دەلیڤەیێن کاری و خۆشگۆزەڕانی و زڤڕاندنا رەسەناتییا وی باژێڕی"خزمەتا وی باژێری دکر. لێ ب چەند دەمژمێرەکان ژ باژێڕەکێ ئازاد و ئارام و ب هەموو رامانانڤه کوردی، مینا بویکەکا خەملاندی وە پێشکێشی "حەشدا شەعبی" و "پاسدارێن ئیرانێ" کر، و بوو باژێرەکێ داگیر کری. و هەر ب دەڤێ سەرکردەیێن وە دانپێدان ل سەر ڤێ ئێکێ هاتە کرن ،دەما هندەک کەس لژێر ناسناڤێن "کالفام و هەرزەکارێن سیاسی یێن ناڤ ئێکەتیێ" ب ئەگەرێ ڤێ ئێکێ ل قەلەمداین.
لێ هندەکێن دی پشتی خیانەتا وان ب خۆ دانپێدان پێکری گۆت: کەرکووک یا ئارامە!،کەرکووک نە یا داگیرکرییە!،مە گەندەڵ ژ کەرکووکێ دەرئێخستن!!.
وەک مە ئاماژەپێکری ئەگەر ب زمانێ ئێکەتیێ بەرسڤا وێ بهێتە دان، دڤێت بێژنە "ئارازێ شێخ جەنگی و یێن وەکی وی"دێ ناڤێ پارێزگاری ژ بەریک"گیرفان"ا خۆ بیننە دەر!!.و بلا وە منە تا پارتی لێ نەبیت.
لێ سەرباری ڤێ کێشمە کێشم و گۆتن و بڕیار و کریارێن هەڤدژ یێن ئێکەتیێ، هێشتا پارتی ب چاڤێ برا و هەڤپشکێ راستەقینە تەماشەی ئێکەتیێ دکەت، بۆ پاراستنا ئێکڕێزییا نیشتیمانی و دەستکەفتێن کوردستانێ، پارتی چاڤێن خۆ ل گەلەک شاشیێن هەمبەری خۆ گرتینە. بۆ رەوشا ل کەرکوکێ ژی هەی ژ دەستپێکێ تا نوکە پارتی گۆتییە: ئەم بێی ئالایێ کوردستانێ و ب شێوەیەکێ شەرمنانە نازڤڕینەف وی باژێڕی، دێ وەسان زڤڕین کو خۆدان بین نە مێهڤان.
نها ژی وەکی دهێتە پێشبینیکرن، "نێچیرڤان بارزانی"سەرۆکێ حکوومەتێ کو د هەمان دەمدا جێگرێ سەرۆکێ پارتی یە،ب سەرکردایەتییا شاندەکێ بلند دێ سەرەدانا ئێکەتیێ کەت و ئەو گرێین ئێکەتیێ دروست کرین دێ ڤەکەت و دیسان بەختەکێ دی دێ دەتێ و دووبارە دووپاتکەت یا ئێکەتیێ کری و دکەت پارتی وێ ناکەت، بۆ پارتی کوردستانەکا ئێکگرتی و ب هێز ژ هەر پۆستەک و بەرژەوەندییەکا پارتایەتی گرنکترە.