رەوشا نھا یا کوردستان و عیراق و دەڤەر پێدا دەرباز دبیت زور نازەک و دەمکیە و بەردەوام چاڤەرێ گوھرینێن مەزن دئێتەکرن ب تایبەتی پشتی ژنافچونا دەولەتا داعشێ ل سەر ئەردی ھەرچەندە بزاڤ و چالاکیێن وێ وەکی بەری گرتنا موسل لێ ھاتینە ل سالا ٢٠١٤ ل دەڤەرێن سوننە مەزھەبێن عیراقێ, و ھەروەسا پارڤەبونا دەڤەرێ ب سەر تەوەرێن جودا و زێدەبونا رولێ روسیا ل دەڤەرێ و گەف و گڤاشتنێن ئەمریکا ل سەر ئیرانێ و ئالوزیێن ناڤ مالا شیعی و سوننی ل عیراقێ و پێکدادانا بەرژەوەندیێن وەلاتێن دەڤەرێ ل عیراقێ ...تد. ھەمی وێ چەندێ دگەھینن ئەگەر کوردینی مایە ل ناڤ مالا کوردی و ئالیێن کوردستانی فەرە دەست ل ناڤ دەست بن و رێزێ ل دەنگێن وەلاتیان بگرن و ھەر ئێک ب وێ رازیبیت کو خەلکی باوەری پێدای .
پشتی پتر ل سەد و چل روژێن گیروبونا پێکئینانا کابینا نوی یا حکومەتا ھەرێما کوردستانێ ھەتا نھا ئێکەتیا نیشتیمانیا کوردستانێ کریزێن کەرکوک و بەغدا دکەتە ھیجەت بو نەھاتنە پێش بو رێکخستنەڤە و کاراکرنەڤا سازیێن گرنگێن کوردستانێ کو د نھا دا پێتڤیەکا مەزنە بو کوردان حکومەت و سەروکاتیا ھەرێمێ و پەرلەمان بکەڤنەف کارو ئەو رەوشا ئالوزا خەلک پێدا دەرباز دبیت داوی بینن و رەوشا سیاسی و ئابوری چارەسەر بکەن و ئیدی داویێ ب سالێن ھشکاتێ بینن , ئەڤ ئەرکە ژی ل سەر ملێت پارتی و ئێکەتیە و نھا توپ ل گورەپانا ھەردوو ئالیان دایە و فەرە سەروکێ حکومەتێ بەرێز نێچیرڤان بارزانی ب دەسپێشخەریەکێ رابیت و ھەردوو ئالیان نیزیکی ئێک بکەت بو بەرژەوەندیا گشتی و نەھێلانا درزێن کو دوژمنا تێدا دربێن کوژەک ل کوردان دای.کەرکوک بابەتەک جودایە وفەرە رەوشا پارێزگەھێ ب گشتی بێتە ئاسایی کرن و ئەوا پشتی شازدێ ئوکتوبەرێ د ڤی باژێری بەرامبەر کوردان ھاتیە کرن فەرە بێتە لادان و ھەمی پێکھاتە بێ جوداھی رولێ خوە و مافێن خوە ل پارێزگەھێ وەربگرن , وەرگرتنا پوستێ پارێزگاری ل بن پوستەلا حەشدا شەعبی و پولیسێن فیدرال و فەرمانداریا ئوپراسیونان ھیچ واتایەک و بھایەک نینە , لەوما فەرە ئێکەتی بەری پارتی کار بکەت بو ئاسایی کرنا رەوشێ و ب ئێک ستراتیچ ل کەرکوکێ کار بکەن بو دووبارە نەبونا شازدێ ئوکتوبەرێ .سەبارەت ب پوستێن بەغدا و وەزارەتا داد پارتی و ئێکەتی ل پوستەکێ مەزنترن ھەروەسا ئارامیا ھەرێمێ و بەرژەوەندیا گشتی یا وەلاتیان ل پوستەکێ کو خزمەتا عیراقا عەرەبی بکەت گرنگترە, لێ دڤێ ھەفکێشێ دا فەرە ئێکەتی ئەو چەندە ل بیر بیت کو ئەو بو بیە ئەگەرێ تێکچونا ئێک رێزیا ناڤ مالا کوردی ل دانانا سەروک کوماری , ل چارەسەرکرنا رەوشا ھەرێما کوردستانێ ژی دا ھەردوو ئالیێن سەرەکی ل ھەرێمێ پارتی و ئێکەتی وەکی سەرکەفتیێن ئێکێ و دوویێ ل ھەلبژاردنان بەلێ ب جوداھیا (٢٤) کورسیان کو رێژەیەک مەزن و ل ژیواری دا وەکی دانانا دەستەیا سەروکاتیا پەرلەمانی پارتی د شیان دا ھەیە کو حکومەت و پەرلەمانی رێڤەببەت لێ دەرئەنجامێن شەرێ براکوژی و دوو ئیدارەیێ سەنگا ئێکەتیێ جودا کریە و رێز ل مەترسیا رەوشێ و ھەبونا چەکێ حزبی دئێتەگرتن کو ھەردەمێ ئالیەک کەفتبیتە مەترسێی دا بەحس ژ شەر و دوو ئیدارەیێ کریە وەکی کارتا گڤاشتنێ و بژاردەیێن (ئەی و بی ) . چارەسەر ئەوە ھەردوو ئالیی رێزێ ل دیروک و سەنگ و بریارا خەلکی بگرن و کار بکەن بو ب داوی ھاتنا ڤێ رەوشا خراب و مەترسی و دوو دلیا وەلاتیان و داوی ب ھندێ بێتە ئەگەر بو من نەبیت بلا بو کەسێ نەبیت.و سەردەمێ دوو ئیدارەیی و شەرێ براکوژی و ئینانا سوپایێن بیانی و پاوانکرنا پوستان دەرباز بویە و سەردەم سەردەمێ رێککەفتن و کار و خزمەت و کوردینیێ یە .