حزبەکان وەجووڵەکەوتن
دڵشاد مسته‌فا وه‌سانی
ئەم جووڵەیە، دوای چەقبەستنێكی دوور و درێژ دێت، چەقبەستنێك كە زادەی ناكۆكی و ململانێی حزبەكان بوو، بەتایبەتیش كێشەی كۆتایی هێنانی سازان لە 23ی حوزەیران و 19ی ئابی2015 كە بووە هۆی ئەوەی كۆبوونەوەی پێنج قۆڵی رابوەستێ، بەمەش خۆپیشاندانی گەورە لە سنووری پارێزگای سلێمانی و هەڵەبجە و راپەڕین و گەرمیان كرا و بارەگاكانی پارتی سوتێندران، هۆی سەرەكی ئەو ئاڵۆزییانەش، گەلەكۆمەیەك بوو لە رێی نەهێشتنی سازان و پەنابردن بۆ دروستكردنی زۆرینەی سیاسی، دژی پارتی دیموكراتی كوردستان، ئەو گەلەكۆمەیە و خەونی دێرینی نەهێشتنی پارتی، جارێكی دی سەریهەڵدایەوە و لە سایەی ئەو بەرەیە، وردە وردە گەلەكۆمەكەی گەمارۆدان فراوانتر بوو، لەگەڵ مەیلی دژە كورد بەغدا و پایتەختەكانی ناوچەكە، یەكی گرتەوە و 16ی ئۆكتۆبەری لێ پەیدا بوو.
بەهۆی ئەو بارودۆخەی دوای 16ی ئۆكتۆبەر دروست بوو، پەیوەندی حزبەكان هێندەی دی خراپ بوو، چونكە حزب هەبوو رۆڵی لە دروستكردنی بارودۆخەكەدا هەبوو، حزبیش هەبوو پێی وابوو بەهۆی نەهێشتنی قەوارەی هەرێمی كوردستان، پارتیش لەناو دەچێت، بۆیە ئەو جۆرە حزبانە لە بارودۆخی دوای 16ی ئۆكتۆبەر، خۆیان دوور دەگرت و ناوە ناوەش بابەتی حكوومەتی رزگاری نیشتمانییان دەوروژاند، هەموو ئەو كەشەی دروستكرا بوو، پەیوەندیی نێوان حزبەكانی سارد كردەوە و تا ڕاددەیەك نەیهێشت.
لەگەڵ یەكەم هەنگاوهەڵێنانی شاندی پارتی بۆ لای لایەنەكان، بە مەبەستی پێكهێنانی كابینەی نۆیەم، جووڵەیەكی دیكەش سەریهەڵدا، ئەویش سەردان و هامشۆی لایەنەكان بوو بۆ لای
یەكدی، وەجووڵەكەوتنی حزبەكان لەم دوو سێ مانگەدا بۆ ئەم هۆیانە دەگەڕێتەوە:
1- حیساب نەكردن بۆ هەڵبژاردن، بەتایبەتیش كە یەكێتی داوای دووبارە زیندووكردنەوەی نیوە بە نیوەی كرد، لەو رێیەشدا هەوڵ دەدات دۆخی حزبەكان بە ئاقارێكدا بڕوات، هیچ حزبێك بەشداری لە حكومەت نەكات، بۆ ئەوەی دەرفەتەكە تەنیا لەبەردەم یەكێتیدا بمێنێتەوە.
2- بەهۆی ئەوەی جارێكی دی نیوە بەنیوە دووبارە نەبێتەوە، پارتی سەردانی هەموو لایەنەكانی كرد، ئەمەش لەو روانگەوەیە، ئەگەر زەمینە بۆ حوكمڕانی بەپێی ئەنجامی هەڵبژاردن خۆش نەكرێت، نابێ زەمینەش بۆ حوكمڕانیی نیوە بەنیوە خۆش بكرێت، بۆ ئەوەی پەیوەندی نێوان حزبەكان بە ئاراستەیەكی باشتردا بڕوات.
پەیوەندیی حزبەكان دوای 16ی ئۆكتۆبەر، هەڵكشان و داكشانی بەخۆوە بینیوە، بۆیە ئەگەر هەر حزبێك بەشداری حكوومەتیش نەكات، وەك حزبی بەشدار لە حكوومەت، لە دیمەنی سیاسیدا سەنگی خۆی دەدۆزێتەوە، لە بازنەی پەیوەندیی نێوان حزبەكاندا دەبیندرێ، لەوانەیە ئاڵوگۆڕی لە شوێن و بەرە و هاوپەیمانی حزبەكاندا رووبدات، بەڵام گرنگ ئەوەیە هەموو جووڵەیەكی حزبەكان، هەر بەرژەوەندیی حزبی لەبەرچاو نەبێت.
