داوى گۆتنا په‌یڤدارێ حكومه‌تێ كووان پرۆژه‌یێن هاتینه راوه‌ستاندن جاردن دێ كه‌ڤنه‌ڤه كارى، مه‌ره‌م ژ ڤێ گۆتنێ ئه‌وه كو پشتى سالا 2014 و ل ده‌مێ برینا به‌شه بۆدجه‌یا هه‌رێما كوردستانێ، هژماره‌كا زۆر یا پرۆژه‌یێن خزمه‌تگۆزاریێن هه‌رێما كوردستانێ كو كار تێدا دهاتنه كرن، راوه‌ستیان و ب ڤێ یه‌كێ ژى زیانه‌كا ئابۆریا مه‌زن ب به‌ر به‌لێنده‌ران كه‌فت، هه‌روه‌سا ب راوه‌ستیانا وان پرۆژه‌یان ژى سستى و خاڤیه‌ك كه‌فته بازارێ كه‌ل و په‌لێن ئاڤاكرێ كو ئێك ژ بازارێن هه‌ره گرنگ و پر كرێكاره ل هه‌رێما كوردستانێ، چونكى زۆرترین رێژه‌یا كاسب و كرێكاران ل كه‌رتێ وه‌به‌رهێنان و ئاڤاكرنێ كاردكه‌ن، له‌ورا ب راوه‌ستیانا كارێ ئاڤاكرنا وان پرۆژه‌یان ئیدى رێژه‌یا بێكارى ژى بلند بوو، لێ كو نها ده‌ما په‌یڤه‌دارێ حكومه‌تێ دبێژیت، ئه‌و پرۆژه‌یێن هاتینه راوه‌ستاندن جاردن كاركرن دناڤدا دێ ده‌ست پێكه‌نه‌ڤه، بخوه ئاماژه‌یه‌كێ گرنگ و دلخوه‌شكه‌ره، نه‌ب تنێ ژبۆ وان پرۆژه‌یان كو دێ كه‌ڤنه خزمه‌تا خه‌لكى دا، به‌لكو ژ لایه‌كێ دى دێ لڤینه‌‌ك كه‌ڤیته بازارێ هه‌رێما كوردستانێ و ب گشتى و رێژه‌یا بێكارى دێ كێمتر بیت، لێ گرنگه ئه‌م بزانین ئه‌ڤ گهۆرینین كو د ئابۆرێ هه‌رێما كوردستانێ چێبووین و هییڤیه‌ك ل ده‌ف خه‌لكێ هه‌رێمێ په‌یدا كرى چه‌وا هات؟ هه‌موو ئه‌و سه‌ره‌دانێن دناڤبه‌را به‌رپرسێن بلندێن هه‌رێما كوردستانێ و به‌غدایێ هاتینه كرن، رێكخوشكه‌ر بوون بۆ هندێ كو خه‌لك هیڤیه‌ك ب رێكه‌فتن و ژ ئێك نزیكبوونا هه‌ولێر و به‌غدایێ هه‌یه، چونكى فه‌رمانبه‌رێن هه‌رێما كوردستاێ، وێ رۆژێ دخوازن كو ببینن موچه‌‌یێ خوه ب ته‌مامى وه‌دگرن و ئه‌ڤه ژى ژ لایێ په‌یڤدارێ حكومه‌تا هه‌رێمێ ڤه هاتیه پشت راستكرن كو د كابینا نوو دا مووچه هه‌موو مه‌ها بێ گیرۆبوون و ب ته‌مامێ دێ هێنه دان، كه‌واته ئه‌و گه‌نگه‌شه‌یێن دناڤبه‌را هه‌ولێر و به‌غدایێ هاتیه كرن شیا وێ به‌سته‌له‌كێ بشكێنیت یا كو دناڤبه‌را هه‌ردوو ئالییان دروست ببوو، سه‌رۆكێ هه‌ردوو حكومه‌تێن هه‌ولێر و به‌غدایێ نێچیرڤان بارزانى و عادل عه‌بدولمه‌هدى د ڤى وارى ب فریادره‌سێ ئیراقێ و هه‌رێما كوردستانێ دهێنه دانان، چونكى قه‌یرانه‌كا سیاسى و ئابورى و ئێمناهى ئیراقێ و كوردستانێ ڤه‌گرتبوو و خه‌لك د وێ په‌یرانێ دا دنالى، لێ هه‌موو ئاماژه بۆ هندێ دچن ل ده‌مه‌كێ نزیك ل سه‌ر ده‌مێ ڤان هه‌ردوو سه‌رۆكوه‌زیران هه‌موو كرێز چاره ببن و جاردن ره‌وشا ژیان و ژیارا خه‌لكێ كوردستانێ وه‌كو جاران ڤه‌گه‌ریت، بۆ ڤێ یه‌كێ ژى هیچ گومان دوو دلیه‌ك پێ نه‌ڤێت چونكى چاره‌كرنا وان ئاریشه‌یان د د پرۆژه بۆدجه‌یا ئیراقێ هاتیه جهگیر كرن و هه‌ردوو ئالیى مولزه‌من ب جهئینانا وێ رێكه‌فتنا كو د پرۆژه بۆدجه‌یا ئیراقێ دا یه، كه‌واته هه‌بوونا حكومه‌ته‌كا ب هێز ل كوردستانێ دێ ده‌ر ئه‌نجامێن ب ڤى ره‌نگى هه‌بن كو ب پله ئێك خه‌لكێ هه‌رێمێ ژێ مفادار بیت
کارزان فەقێ
