پشتى هاتنا عادلى
کارزان فەقێ
داوى گۆتنا عادلى ئه‌بدولمه‌هدى سه‌رۆك وه‌زیرێن ئیراقێ جهێ راوه‌ستیانێ و شرۆڤه‌كرنێ یه، كو وه‌ها راگه‌هاندییه په‌یوه‌نیدیێن وان ل گه‌ل نێچیرڤان بارزانى سه‌رۆكێ حكومه‌تا هه‌رێما كه‌وردستانێ به‌ره‌ڤ پێشڤه دچن، ئه‌ڤه بخوه وێ پرسیارێ دئینیته رێكا كو پشتى هاتنا عادلى چ دناڤبه‌را حكومه‌تا هه‌رێما كوردستانێ و حكومه‌تا ئیراقێ دا چێبوو؟ د پێشكه‌فتنێن په‌یوه‌ندیێن ڤان هه‌ردوو ئالییان دا، هه‌ولێرێ چ ب ده‌ست خست؟ ل هه‌مبه‌ر ب ده‌سختنێ؛ چ تشته‌ك به‌خشیه به‌غدایێ؟ ئاسایى كرنا وێ ره‌وشا ئالۆزا ل سه‌ر ده‌مێ عه‌بادى دروست بووى ب چ راده‌یه‌ك خه‌لكێ هه‌رێما كوردستانێ ژێ مفاداره؟ بێگومان به‌رسڤێن ڤان هه‌موو پرسان ل گه‌ل ئه‌و واقغێ نها ئه‌م دبینین گه‌له‌ك نزیكى هه‌ڤن و خه‌لكێ كوردستانێ ب گه‌ش‌بینیڤه ته‌ماشه‌ى وان پێشڤه چوونان دكه‌ن كو سه‌رۆكێ حكومه‌تا هه‌رێمێ ل گه‌ل به‌غدایێ بزاڤێ بۆ دكه‌ت، هه‌روه‌سا ژ ئالیێ به‌رپرسێن به‌غدایێ ڤه ژى ئه‌ڤ یه‌كه دهێته پشت راستكرن كو ره‌وش ئاسایى بوویه، په‌سه‌ندكرنا بودجه و مووچه‌یێ فه‌رمانبه‌ران و یێن هێزێن پێشمه‌رگه‌ى د بۆدجه‌یا ئیراقێ یا سالا 2019 ژى باشترین ئه‌نجامێ وان سه‌ره‌دان و كۆمبوونێن ناڤبه‌را هه‌ردوو ئالیانه، كه‌واته هه‌رێما كوردستانێ د خوه‌شكرنا په‌یوه‌ندیێن خوه ل گه‌ل به‌غدایێ گه‌له‌ك تشت ب ده‌ست خستنه، ژ هه‌موویان گرنگتر ژى هیڤیه‌ك ل ده‌ف خه‌لكى په‌یداكریه كو ئه‌و ره‌وشا ئالۆزا دارایى یا ل ده‌ستپێكا سالا 2014 چێبووى، دووباره نابیته‌ڤه، هه‌روه‌سا ب كارپێكرنا بۆدجه‌ى ژ ئالیێ سه‌رۆك وه‌زیرێ ئیراقێ ڤه، ئیدى ئه‌و كۆژمێ هاتیه ده‌ستنیشانكرن دێ بۆ هه‌رێمێ هێته هنارتن، ئه‌و ژى دێ بیته پێنگاڤا دووێ بۆ نه‌هێلانا پاشكه‌فتا مووچه‌یێ فه‌رمانبه‌ران، چونكى د پێنگاڤا ئێكێ دا حكومه‌تا هه‌رێمێ شیا رێژه‌یا وێ پاشكه‌فتێ بگهوریت و كێم بكه‌ت، هه‌لبه‌ت پێنگاڤا دووێ هه‌رچه‌نده دێ بۆ نه‌هێلانا پاشكه‌فتێ بیت، لێ دێ ده‌ستپێكه‌ك ژى بیت ژ بۆ ڤه‌گه‌راندنا وێ قه‌را فه‌رمانبه‌رێن هه‌رێما كوردستانێ كو ژ لایێ حكومه‌تێ مایه. كه‌واته حكومه‌تا هه‌رێمێ ب رێكه‌فتنێن خوه ل گه‌ل به‌غدایێ و راده‌ستكرنا 250 هزار به‌رمیلێن په‌ترۆلێ رۆژانه، دێ پتر ژ وێ یا ژ ده‌ست دده‌ت، ب ده‌ستڤه ئینیت، چونكى ب راده‌ستكرنا وى رێژه‌ى هه‌م دێ مووچه‌ى دروست كه‌ته‌ڤه هه‌م ژى دێ بۆدجه‌ى وه‌رگریت و جاردن وه‌به‌رهێنان و ئاڤه‌دانكرن و گه‌شه‌پێدانا پارێزگه‌هان ده‌ست پێكه‌ته‌ڤه، واته ئه‌وا كو حه‌یده‌ر عه‌بادى داخوازدكر، پشتى نه‌مانا وى حكومه‌تا هه‌رێمێ راده‌ستى عادلى ژى نه‌كر، ئه‌و ژى راده‌ستكرنا سنور و ده‌ریێن سنورى و فرۆكخانه‌بوون، لێ بێ راده‌ستكرنا ڤان هه‌موویان ژى، حكمومه‌تا هه‌رێما كوردستانێ ب سه‌رۆكاتیا نێچیرڤان بارزانى شیا رێكه‌فتنه‌كا وه‌ها بكه‌ت كو چ جاران نانێ خه‌لكى و مووچه‌یێ فه‌رمانبه‌ران نه‌بیته كارته‌ك ب ده‌ستێ به‌غدایێ و هه‌رده‌ما ڤیاى دژى حكومه‌تا هه‌رێمێ ب كاربینیت، له‌ورا دبێژین، پشتى هاتنا عادلى و رێكه‌فتن ل گه‌ل حكومه‌تا هه‌رێمێ هه‌موو گهۆرین و رێكه‌فتن دێ ئه‌رینیى بن.
