بیرا من دهێت ل سالا 1991 پشتی كو له‌شكرێ‌ عیراقێ‌ كۆێت داگیركری و پشتی هینگی هه‌ڤپه‌یمانان عیراقی شكاندیه‌ڤه‌ و كۆێت زڤراندیه‌ڤه‌ و پشتی سه‌رهلدان ل سه‌رانسه‌ری عیراقێ‌ ب سه‌ر داهاتین ل ده‌سپێكێ‌ ژی ل باكۆرێ‌ كو دبیته‌ هه‌رێما كوردستانێ‌ یا مه‌ یا نها، و مینا دبێژن "سه‌د سه‌ر چوونه‌ كولاڤه‌كی"!.
پشتی هینگی تشتێ‌ ڤه‌شارتی یێ‌ رژێما به‌عس هه‌موو دیاربووی، چونكو به‌ری هینگی سانسۆره‌كا ئێكجارا یا میدیای ل سه‌ر هه‌بوو، به‌ره‌ به‌ره‌ تاوانێن وان دیاربوون، ئێدی جۆره‌كی وه‌كهه‌ڤیا سته‌ملێكرنێ‌ و زۆریێ‌ دیاربوو د ناڤبه‌را گه‌لێ‌ كۆێتێ‌ و یێ‌ كوردستانێ‌ دا، ئه‌ڤ وه‌كهه‌ڤیه‌ ل سه‌رانسه‌ری جیهانێ‌ دیاربوو، مینا دبێژن دوژمنێ‌ من دۆستێ‌ منه‌، سه‌ره‌رای هندێ‌ كو كۆێتێ‌ به‌ری هینگی نێزیكبوونه‌كا دۆستاتی هه‌بوو ل گه‌ل عیراقێ‌ و بۆ گه‌لێ‌ كورد ل عیراقێ‌ چو نه‌كربوو و ئه‌وێ‌ ژی مینا هه‌موو عه‌ره‌بان و جڤاكێ‌ ده‌ولی خووه‌ بێده‌نگ كربوو ل سه‌ر تاوانێن رژێما سه‌دام ل سه‌ر گه‌لێ‌ مه‌یێ‌ سته‌ملێكری، به‌لێ‌ چونكو كۆێت هه‌ڤسویا عیراقێ‌ و ئیرانێ‌ بوو فه‌رتربوو ژ هه‌میان پتر، هه‌ما هه‌ر چونه‌با كربه‌ هه‌واله‌كێ‌ نۆرمال ژی د ناڤ به‌لاڤۆكێن میدیایا خوه‌ دا، ئێدی كوردان ژی ئه‌ڤ ره‌فتاره‌ ژبیرنه‌كربوو، به‌لێ‌ هه‌ر ل چو لایه‌نان ناگرین و مینا دبێژن سیاسه‌ت هه‌ر سیاسه‌ته‌، ئه‌م ل سه‌ر وێ‌ سته‌ما ل مه‌ هاتیه‌ كرن رانابین ژنوو بۆ خوه‌ دوژمنان زێده‌بكه‌ین، ئه‌ڤجا ب سه‌ره‌دانا كونسلێ‌ كۆێتێ‌ د. عومه‌ر ئه‌لكنده‌ری ڵ هه‌رێما كوردستانێ‌ ب یاوه‌ریا شانده‌كی بیرا من ل ڤان بیرهاتنان ئینا، به‌لێ‌ ناڤه‌شێرم وی سه‌رده‌می جۆره‌كێ‌ نێزیكبوونه‌كا عاتیفی هه‌بوو د ناڤبه‌را مه‌ و خه‌لكێ‌ كۆێتێ‌ دا، گه‌له‌ك جاران د نووچه‌یان دا په‌سنا گه‌لێ‌ كورد دكرن ل سه‌ر شاشێن تلفزیۆنان و به‌حسێ‌ وێ‌ سته‌مێ‌ دكرن ی ل مه‌ هاتیه‌ كرن، حه‌تا نها ژی ئه‌و هه‌ڤپشكی یا به‌رده‌وامه‌، ئه‌ڤه‌ ژ بلی وه‌كهه‌ڤیا قه‌بارێ‌ نه‌خشه‌ێ جوگرافی ژی هه‌تا راده‌كی، له‌ورا كابرایی ئه‌ڤرۆ جاره‌كا دن په‌سنا رۆلێ‌ حوكمه‌تا هه‌رێمێ‌ كر و یا كه‌سێ‌ نێچیرڤان بارزانی سه‌رۆكوه‌زیرێن هه‌رێَمێ‌ و تایبه‌ت ژی بۆ تێپه‌راندنا وێ‌ ره‌وشا ئه‌وی ب چاڤێن خوه‌ دیتی ل هه‌رێمێ‌ و ڤه‌حه‌واندنا وی قه‌بارێ‌ زۆرێ‌ ئاواره‌ و په‌نابه‌ران، هه‌لبه‌ت ئه‌ڤه‌ نێزیكبوونه‌ ژی دبیته‌ بلۆكه‌ك ل سه‌ر وێ‌ دیوارێ‌ ب هێز یێ‌ دهێته‌ ئاڤاكرن ژ لایێ‌ نێچیرڤان بارزانی ڤه‌ بۆ ئاڤاكرنا كوردستانه‌كا ب هێز وه‌كو درووشمێ‌ وی ب حزبا پارتی دیمۆكراتی كوردستان ڤه‌، د بیاڤێ‌ په‌یوه‌ندیێن دپلۆماسی دا، بۆ زێده‌كرنا دۆست و هه‌ڤالان نه‌خاسمه‌ یێن هه‌ڤسویی و هه‌ڤسنۆر ل گه‌ل كوردستانێ‌ و عیراقێ‌ و ده‌ڤه‌رێ‌ نه‌مازه‌ كۆێت ژی د بیاڤێ‌ جۆگرافی دا گرنگه‌ وه‌كو ده‌رازینه‌كا ئاڤی دێ‌ سه‌قایه‌كێ‌ ئه‌كتیڤ دروست كه‌ت د بیاڤێ‌ ئابووری ژی دا وه‌كو هناره‌كرن و ئاورده‌كرنا كه‌لوپه‌لێن بازرگانی، كو هه‌ردو لایه‌ن مفادار بن، نه‌خاسمه‌ كۆێت ژی دخوازیت بهێز بكه‌ڤیت د بیاڤێ‌ سه‌ربازی دا پشتی ئه‌و كاره‌ساتا رژێمێ‌ ئینایه‌ سه‌ری و دیاربوونا ڤان رێكخراوێن تیرۆرستی ل ڤان دووماهیان، گه‌فه‌كه‌ بۆ هه‌موو وه‌لاتان تایبه‌ت یێن كه‌نداڤی و كوردستانێ‌ بۆ هه‌میان سه‌لماندی كو ئێكه‌م هێزه‌ داعش شكاندی و پاشڤه‌بری، ئێدی هه‌رێما كوردستانێ‌ به‌ربه‌سته‌كێ‌ ب هێزه‌ ل به‌رامبه‌ری وان، هه‌لبه‌ت ئه‌و ژی دێ‌ خوه‌ ده‌نه‌ به‌ر سیبه‌را كوردستانه‌كا ب هێز، نه‌مازه‌ هه‌رێمێ‌ سه‌لماند كو نه‌تنێ‌ یا زه‌نگینه‌ ب سامانێ‌ خوه‌ به‌لێ‌ سامانێ‌ هه‌ری زه‌نگین پێشمه‌رگێ‌ وێ‌ یێ‌ پیگیر و خۆراگره‌، زێده‌باری سه‌ركردیه‌كێ‌ ب هێز و زانا و خوه‌دی په‌یوه‌ندییێن ب هێز د بیاڤێ‌ دیپلۆماسی دا، له‌ورا ژی به‌ری ده‌مه‌كێ‌ نه‌یێ‌ دوور كۆنگره‌كێ‌ مه‌زن هاتبوو سازكرن ل كۆیتێ‌ ل سه‌ر ئاڤه‌دانكرنێ‌ هه‌رێم ژی شه‌ره‌فا پشكداریكرنێ‌ هه‌بوو، ئه‌ڤه‌ هه‌موو راستینه‌ و تشته‌كێ‌ پێشچاڤه‌ و هه‌موو یێن دبینن، هه‌كه‌ نه‌ سینگێ‌ پێنڤیسێ‌ مه‌ یێ‌ به‌رفره‌هه‌ بۆ هه‌ر ره‌خنه‌كێ‌!!.