گومان تێدا نینە ئارمانجا مە ژ ئەڤى بابەتى نە ئەوە ئەم برین و ناکوکیێن (هەرێمێ و بەغدا) سەرهلدەینە ڤە بەلکو یێ شارەزایى د زانستێن لەشکەرى دا هەبیت دێ زانیت کو نەیا ب ساناهى یە هێزەکا نەهەڤسەنگ بەرەڤانیێ بکەت و خوراگر بیت بەرامبەرى هێزەکا لەشکەرى کو هەمى پێدڤى ل بەر دەستان هەین، بەلێ د زانستێن لەشکەرى دا خالەکا گەلەک گرنگ هەیە ئەوژى بابەتێ عەقیدا لەشکەرى یە کو هێزا پێشمەرگەیى لسەر پەروەردا پاراستنا خاک و نشتیمان و بەرەڤانى کرن ژ مافێن رەوا یێن خەلکێ کوردستانێ هاتیە پەروەردەکرن، لەورا ئیرادا مەزن یا پێشمەرگەی گەلەک رێکێن دی بەرامبەر گەلێ کوردستانێ ڤەکرن.
پشتى بویەرێن (16 ئوکتوبەر)ـێ بەرامبەرەکێ دوژمنکارى ژلایێ بەشەک ژ وەلاتێن هەرێمى و هێزێن شوفینی یێن عێراقێ هاتبوو دارێشتن بو نەهێلانا پێگەهێ دەستورى وسیاسى یێ هەرێما کوردستانێ، دبیت شەرێن (پردێ و سحێلا) دوو ئارمانجێن تەکتیکى بن یێن لەشکەرێ عێراقێ بەلام ئارمانجێن وان یێن ستراتیژى گەلەک مەزنتر بوینە ئەوژى نەهێلانا قەوارەیێ هەرێما کوردستانێ بویە.
خالا من دڤێت ئاماژێ پێ بدەم ئەوە کو بەرەڤانیا ل پردێ و سحێلا هاتیە کرن بویە هوکارێ هندێ بو بەغدا و گەلەک وەلاتێن دى دیار بیت دەمێ پێویست بکەت کورد ب چەک دێ بەرەڤانیێ ژ خو و دوسیا خو یا رەوا کەن و دەمێ پێویست ژى بیت رێکێن دبلوماسیێ باشترین زمان حالێ کوردایە لەورا چوونا (بەرێز نێچیرڤان بارزانى) بو (بەغدا) ب وێ سەنگا دبلوماسى بو ئەگەرێ گوهارتنا گەلەک ژ هاوکێشەیێن سیاسى دگەل بەغدا و رێکا پردێ رێکا بەغدا گەلەک ئاسانتر لێ کر کو نوکە ل ئێک تێگەهشتن دناڤبەرا هەردوو لایەنان دا هەیە..
گەلەک ژ چاڤدێرێن کو چاڤدێریا رەوشا عێراقێ دکەن وەسا دیار دکەن کو ئەڤ سەرەدانە دێ گەلەک گورانکاریان د پەیوەندیێن هەرێمێ و بەغدا دورست کەن نەخاسمە ژلایێ (سیاسى و لەشکەرى) ڤە و ئەڤ سەرەدانە بێ ئەنجام نابن و هەردەما لایەنەک خو ژ چارەسەریا ئەڤان ناکوکیان ڤەدزیت گومان تێدا نینە رەوشا عێراقێ سەقامگیر نابیت و دویر نینە گروپێن بەرژەوەند خواز ئەوێن ل ناف حزبێن سیاسى هەین ل عێراقێ هەمى هەولا بدەن کو رەوش چارەسەر نەبیت بەلکو کەش و هەاویەکێ تێکدەرانە دناڤبەرا بەغدا و هەرێمێ هەبیت تاکو ئەو بشێن ئەجندایێن خو یێن تایبەت و دیسان ئەجندایێن وەلاتێن هەرێمى جێبەجێ بکەن و ل گور وان خاندنێن بو رەوشا دەڤەرێ دهێنە کرن ئەمریکا دڤێت رەوشا عێراقێ باشتر و بهێزتر بێخیت چونکە دەڤەر ل بەرامبەرى کومەکا گهورینا یە و ئەڤ گهورینە دێ کاریگەریا خو ل سەر عێراقێ ژى کەن نەخاسمە بابەتێ وەلاتێن (سوریا و ئیرانێ) و چارەسەرکرنا کێشەیا کوردى ل دەڤەرێ.
ژ ئەنجامێ ئەڤان گهورینێن د هەلویستێ (بەغدا) دا دروست بوین ترافیکا دبلوماسى ل عێراقێ و هەرێما کوردستانێ ژى گهورین ب سەر دا هاتن و ئاماژێن باشتر دهێنە پێشبینى کرن ژ ئەوێ رەوشا نوکە هەیى نەخاسمە ئەگەر ئەو نیازپاکیا نوکە بەردەوام بیت دناڤبەرا هەردوو لایەنان دا و جاددەیا عێراقێ ب گشتى ل ئەڤێ قوناغێ تەحەمولا زیاتر ئاریشان ناکەت لەورا رایا گشتى ل عێراقێ ب زوربەیی دگەل دروست بوونا سەقامگێریا سیاسى و لەشکەرى هەیە ل هەمى دەڤەران و باشترین نمونە ژى ئەو هەرێما کوردستانێ پێش چاڤ دبینن لەورا ئەڤ قوناغە پێوستى ب هندێ یە کورد ژى نافالا خو رێک بێخن و ب پروژەکێ نەتەوەیى هەمى کێشەیێن خو دگەل بەغدا چارەسەربکەن.