ئەحمەد مەلو ئێک ژ پێشمەرگێن دێرینێن شورشا ئەیلولا مەزن و گولانا پێشکەڤتن خوازە و ئێک ژ دانعەمرێن بەرنیاسێن دەڤەرا ئاکرێ یە، ڤی کەسایەتی ھەمی ژیێ خۆ د قوناغێن خەبات و کوردایەتیێ دا لسەر رێبازا پیروزا کوردینیێ و رێبازا پارتی و بارزانیێ نەمر دەربازکرییە، گەلەک جاران مروڤ ڤی کەسانی دبینیت، دبێژیت :" پارتی و ھەمی دنیا، راستە خالێ ھێژا پارتی و ھەمی دنیا چونکی بەرھەمێ پارتی بۆ کوردستانێ و ھەمی جیھانێ یێ خویا و بەرچاڤە ، سەربلندی یە خۆراگرییە سەرخوبوون و ئازادی یە ئاشتەواییە ژیان و مروڤ پەروەرییە کو رۆژەڤا ئەڤرویا مە دەربرینێ ب زەلالی ژ وێ راستیێ دکەت .
دیارە پێگەھێ سیاسی یێ پارتی دیموکراتی کوردستان دنھادا ل ئاستەکێ ھەری بلند دایە ل ھەرێما کوردستانێ و دگەل ھەموو پێکھاتان و لسەر ئاستێ عیراقێ و کوردستانا مەزن و ل و رۆژھەلاتا ناڤین و ھەمی جیھانێ روولەکێ بەرچاڤ دگێریت و لایەنەکێ گرنگێ ھەڤکێشا سیاسی یە ل دەڤەرێ ب تایبەت ژ ئالیێ وەلاتێن زلھێز .
ئاشکرایە ل ھەلبژارتنێن خولا پێنچێ یا یێن پەرلەمانێ کوردستانێ پارتی سەنگ و پێگەھێ خۆ ھێلا و دگەلدا ژی ھەژمارا کورسیێن خۆ یێن پەرلەمانی ب رێژەیەکا ھەری باش بلندکرن و ھەلبژارتنێن جڤاتا نوێنەرێن عیراقێ ژی کو ل رێکەفتی ١٢ /٥ / ٢٠١٨ برێڤەچوون دیاربۆ پارتی روولەکێ ھەری بەرچاڤ گێرا ژبەرکو سەنگێ پارتی ل ڤان ھەلبژارتنان بەرچاڤ بوو کو ئێکەم پارت بوو لسەر ئاستێ ھەموو پارتێن عیراقێ کو ھەژمارا کورسیێن پەرلەمانێ عیراقێ بدەست خستین.
ژ ئالییەکی دبینین ھەولێن پارتی ئەون کو ل ھەرێمێ ئێک رێزیا ناڤ مالا کوردی رێکبێخیت و بھێزبکەن و حکومەتەکا بھێز بھێتە پێک ئینان کو ئەڤ چەند ژ دروشمێ پارتی بوویە و دانوستاندن و سەرەدانێن پارتی بۆ سەرجەم ئالیێن سیاسی یێن کوردستانێ ڤێ چەندێ خویادکەن و دگەل دا ژی گرنگییەکا باش ب ھەمی ئول و پێکھاتەیێن کەمینە دھێتەدان ل ھەرێما کوردستانێ .
ژ ئالییەکێ دیتر پەیوەندیێن بھێز یێن پارتی دگەل سوننە و شیعەیان ل عیراقێ دنھادا د ئاستەکێ ھەری باش دھێنە دیتن و ب تایبەت دگەل کەسانێن بریاردەرێن عیراقێ، ھەروەھا پەوەندیێن باش و موکم دگەل بەشێن دیتر یێن کوردستانێ ھەنە میناک ژی لڤێ داویێ ل دەمێ شاندا ئوپۆزسیونا سووریێ پەنایا خۆ بۆ سەروک مەسعود بارزانی ئینایی و داخوازا وێ ئێکێ لێ ھاتەکرن کو رۆل د چارەکرنا قەیرانا سووریێ و باشە رۆژا کوردان ل وی وەلاتی دا ھەبیت .
دیارە ژی دڤان دوو ھەیڤاندا ھەژمارەکا زۆرا کەسانێن دیپلوماتکار قەستا ھەرێما کوردستانێ کر ژوان وەزیرێ وزەیا ئەمریکا و وەزیرێ دەرڤەیێ ئیرانێ و وەزیرێ دەرڤەیێ فەرەنسا و راوێژکارێ سەربازیێ وەزارەتا دەرڤەیا ئەمریکا و سەرەدانا سەروک وەزیرێن ئیتالیا کو ژبال نێچیرڤان بارزانی سەروک وەزیرێن ھەرێما کوردستانێ ھاتە پێشوازیکرن و ژبلی ڤان سەرەدانان ب دەھان سەرەدانێن دیپلۆماتکار و بالیۆزێن وەلاتێن جیھانێ ھەبووینە بۆ جەم سێ ناڤەندێن خودان بریارێن پارتی ئەوژی سەروک مسعود بارزانی و نێچیرڤان بارزانی و مەسرور بارزانی کو تێ چاڤەرێکرن ئەڤ سەرەدانە بەرفرەھتر ببن و د نھادا کوردستان تێ دیتن ب سەنتەرێ دیپلۆماسییەتا وەلاتان ، کو ئەڤ سەرەدانە مەرەم ژێ ئەون ژبلی وێ چەندێ کو بریارا سیاسی ل کوردستانێ یە تاکو پەیوەندیێن ھەری باش دگەل ھەرێما کوردستانێ گرێبدەن و کار د وارێن بازرگانی و وەبەرھێنانێ دا بکەن کو ئەڤ چەندە ژی بێ گومان د بەرژەوەندا ھەرێمێ دا یە ، ئەڤ دەستکەفتە ژی ژبۆ سیاسەتا سەرکەڤتی یا کوردستانێ و دەستپێشخەریێن سەروک بارزانی و نێچیرڤان بارزانی دزڤریت ، و گروڤێ وێ ئیکێ یە ژی کو دیپلۆماسییەتا کوردا ل دەڤەرێ یا بھێزە و ولاتێن جیھانێ ژی ب چاڤەکێ گرنگ بەرێ خۆ دایە کوردستانێ کو ڤان سەرەدانان لسەر ئاستێ وەلاتێن جیھانێ دەنگدانەڤا خۆ یا مەزن ھەیە.
لێرە دێ زڤرم بۆ گوتن و ھەڤوکا ( ئەحمەد مەلوی ) کو دبێژیت:" پارتی و ھەموو دنیا . بەلێ زۆر راستە خالێ ھێژا ئەم ژی دگەل وە دبێژین پارتی و ھەموو دنیا چونکی ھەر رێبازا پارتی و بارزانییە پارێزڤانا راستینەیا دوزا رەوایا گەلێ کوردستانێ و قوتابخانا کوردایەتیێ و ژیان و مروڤ پەروەریێ.