د سیاسەتا دەرڤە دا کومەکا پرەنسیپ و بنەمایا هەنە د بازنێ پاراستنا بەرژەوەندێن دەولەتێ دا دهێنە دارێشتن نەخاسمە د ژینگەها دەرەکى یا ئەوێ دەولەتێ دا و ئەف دارێشتنە رولێ دەولەتێ دیسان سیاسەت و پێگەهێ دەولەتێ دەست نیشان دکەت، وەکو دیار رولێ ئیتالیا وەکو وەلاتەکێ هەڤپەیمان دژى تیرورێ د شەرێ دژى تیرورستێن داعش دا رولەکێ کاریگەر و سەرەکى هەبویە ب تایبەت ل عێراق و هەرێما کوردستانێ و نێزیکى پازدە هزار پێشمەرگێ کوردستانێ ب راهێنانێن سەردەم ژلایێ ئیتالیا ڤە هاتینە بەرهەڤکرن دیسان د بنگەهێ تەنسیقا هەولێرێ دا ئەوێ ژبو رزگارکرنا شنگال و دەڤەرێن دى هاتیە دروست کرن ئیتالیا رولەکێ کاریگەر هەبویە هەم ژلایێ ئەسمانى ڤە دیسان ل سەر ئەردى ژى بو پێگەهاندنا هێزێن چەکدار، ئەو وەلاتێ بەرهەڤ بیت پشتەڤانیا لەشکەرى پێشکێشى وەلاتەکێ دى بکەت گومان تێدا نینە ژلایێ سیاسى ڤە ژى دێ پشتەڤانیێ لێ کەت، ئەگەر ئەم تەماشەى رولێ ئیتالیا بکەین چەند بابەتێن گرنگ بومە دیاربن ژوانا:
پشتەڤانی کرنا ئاوارێن ئەوان دەڤەران یێن ژلایێ تیرورستێن داعش ڤە هاتینە داگیرکرن و پێشکێش کرنا هاریکاریان بو کەمپێن ئاوارەیان.
پێگەهاندنا هێزێن نافخو ژبو پاراستنا سەروەریا یاسایێ.
پروژێ نویژەن کرن و چاڤدێری کرنا سکرێ میسل ژلایێ ئیتالیا ڤە کارەکێ زور مروڤایەتى بویە.
د گشت قوناغێن پشتى شەرێ ئازادیا عێراقێ دا هەرێما کوردستانێ پەیوەندیێن زور بهێز دگەل ئەڤى وەلاتى هەبوینە و (سەروک مسعود بارزانى) و (نێچیرڤان بارزانى) د چەندین ویستگەهێن سەرەدانێن خو دا بو ئیتالیا دوپاتى ل دوستایەتیا هەرێمێ و ئیتالیا کرینه و خالا هەرە گرنگ د ئابلوقێن سیاسى و لەشکەرى دا ل سەر هەرێما کوردستانێ ئیتالیا شیایە رولەکێ کاریگەر ببینیت، دیسان سەرەدانا (سەروک وەزیرێن ئیتالیا) بو (هەرێما کوردستانێ) دانپێدانەکا فەرمى یا وى وەلاتى یە ب سیاسەت و پێگەهێ سیاسى و دەستورى یێ هەرێما کوردستانێ و پێش نوکە ژى لسەر ئاستێن بلند بەرپرسێن ئیتالى سەرەدانا کوردستانێ کرینە.
د چەندین داخویانیێن بەرپرسێن ئیتالى دا ئاماژە ب بابەتێن پێکڤە ژیانا ئاینى و لێبورینا ئایینى ل کوردستانێ هاتیە دان و رولێ هەرێما کوردستانێ ژى د سەقامگێریا دەڤەرێ دا بو ئیتالیا یێ گرنگ بویە چ ژلایێ پێشەوازى کرنا پەنابەران یانژى رولێ سەرەکی یێ پێشمەرگەی د شەرێ دژە تیرورێ دا ژبلى دروست بوونا رەوشەکا دیموکراسى ل هەرێما کوردستانێ کو نمونەکا زیندى یە ل روژهەلاتا ناڤەراست دەمێ ئەم باس ل ئەزمونا کورستانێ دکەین مەرەم ئەو نینە مە کێم و کاسى نینن بەلێ سەربورا هەرێمێ ب گشتى جهێ رێزگرتنا وەلاتێن ئەوروپى بویە و پێویستە د بازنێ پەیوەندیێن دەرڤە دا هەرێما کوردستانێ لسەر شەنگستى بەرژەوەندێن پێگهور رولەکێ سەرەکى دگەل وەلاتێن ئەوروپى هەبیت بو هندێ پشتەڤانیێن بەردەوام ل کوردستانێ بهێنە کرن.