(گەلـی کـوردا ببـن رستەک
ببـن ئێک دل ببن دەستەک
دا بمینیــن دا بمینیــن)

ل ڕۆژا ئێکی شوباتا ساڵا (۲۰۰٤)ێ، کو دبیتە ئێکەمین ڕۆژ ژ جەژنا قوبانا پیرۆز، خەلک و جەماوەرێ کوردستانێ مینا وەلاتێن دی یێن مۆسڵمان ب‌ تەخ و چینێن خۆ ڤە مژیلی کەیفخوشیا جەژنێ بوون و پێشوازی ل خەلکی و جیران و دۆست و کەس‌وکاران دکر، باژێرێ هەڤلێرێ وەکی باژێر و باژێرکێن دی یێن کوردستانێ مژیلی ڤێ کەیفخۆشیا جەژنێ بوون .. ئێک ژ داب‌ونەریتێن کوردایەتیێ و مرۆڤایەتیێ و مرۆڤدۆستیێ ئەوە کو بارەگایێن حزب و پارتان د ڤەکری بوون، بەرپرس و کادرێن پارتان د خێرهاتن و پێشوازیا خەلکی و هەڤوەلاتیان دا بوون .. ئێک ژ وان بارەگایان بارەگایێ لقا(۲) یێ پارتی دیمۆکراتی کوردستان ڤەکری بوو، ئەندامێن سەرکردایەتیێ و ئەندام مەکتەب‌سیاسیێن پارتی و کادرێن پارتی د بەرهەڤ بوون ل بارەگایێ لقێ .. دۆژمن و نەحەزا دوو تیروریستا ب چ ڕەنگەکی و ل چ ڕۆژ دەلیڤە دیت گورزێ خوە دەینن و زیانێ ل کورد و کوردستانێ بدەن؟! تیرۆریست و تاوانبارەکێ خۆکوژ ئێخستە ناڤ رێزێن خەلکێ سڤیل و بەرەڤ هولا لقێ(۲)ێ پارتی چوو، خۆ ل نێزیکی رێزا پێشی و ئەندامێن سەرکرادایەتیێ و مەکتەب سیاسیێن پارتی کادرێن پارتی و خەلکێ ل هولێ ڤە کر و خۆ پەقاند، لێبوورین ڤە د ئەنجامدا ب دەهان ژ ئەندامێن سەرکردایەتی و کادرێن پارتی و خەلکێ سڤیلێ هەڤلێرێ شەهید و بریندار دبن.

هەژی ئاماژە پێکرنێ یە دناڤ وان شەهید و قوربانیان دا گەلەک ژ کەسێن پڵە بەرز و سەرکردەیێن قەهرەمان و خەباتکارێن و تێکوشەرێن پارتیێ دناڤ دا بوون، دێ ناڤێن هندەک ژ وان دەنە دیارکرن، بریتینە ژ:
ــ (سامی ئەبدوولرەحمان):سکرتێرێ مەکتەبا سیاسیا پارتی و جێگرێ سەڕۆک وەزێرێن هەرێما کوردستانێ.
ــ (شەوکەتشێخ یەزدین): وەزیرێ کارووبارێ ئەنجوومەنێ وەزیران و ئەندامێ ناڤەندیا کومیتەیا پارتی.
( سەعد عەبدولڵا): وەزیرێ کشتۆکال و ئاڤدێریێ و ئەندامێ مەکتەب سیاسیا پارتی.
ــ (ئەکرەم مەنتک): پارێزگاڕێ هەولێرێ.
ــ( مەحموود هالۆ) بۆسەڵی : برێکارێ وەزارەتا دارایی و ئابووری.
ــ ( مەهدی خۆشناو): جێگرێ پارێزگارێ هەولێرێ و سەرۆکێ لقا هەولێرێ یا ئێکەتیا نڤیسەرێن کورد.
ــ ( ئەحمەد ڕۆژبەیانی): دەڤەردارێ باژێرێ هەولێرێ.
ــ( عەمید نەریمان): ڕێڤەرێ پۆلیسێن هەولێرێ.

د هەمان رۆژ و باژێر و دهەمان دەمدا پەقینەکا دی یا مەزن ل ناڤ مەلبەندێ (۳)ێ یێ ئێکەتی نیشتیمانی کوردستان ڕوویدا، لێبوورین ڤە د وێ پەقینا خوکوژی دا ب دەهان ژ ئەندامێن سەرکردایەتی و بەرپرس و کادرێن ئێکەتی و خەلکێ سڤیل شەهید و بریندار دبن.

جهێ گرنگیدانێ یە هەر دوو پەقینێن وی دەمی د بارودوخەکێ تایبەت و د دەمەکێ دا گەلێ عێراقێ مژوولی و سەروەری و دەستهەلاتا نیشتیمانی بوون و ئاڤاکرنا ڕژێمەکا دیموکراسی بوون، گەلێ کوردستانێ ژی مژوولی سەرکەڤتن و دەستکەڤتێن گرنگ بوو ب دەستڤە بینیت چ ل نافخۆیا کوردستانێ یان ل عێراقێ ب گشتی .. ئەڤە وێ چەندێ دگەهینیت دۆژمن و تیروریستان بێ جێوازیا رەنگان هەڤلێر رەش پوشکر! خەلکێ کوردستانێ ب گشتی خەمگین کر؛ بۆ نموونە ل وێ دەڤەرا ئەز لێ زاخۆیە، ژیێ من د وێ ساڵێ دا (۱۱) ساڵ بوون و هەر چەندە ئەز زاڕۆک بووم و باش بیرا من دهێت ئەز دگەل هەڤالان چووینە جەژنا د ڕۆژا ئێکێ و دوویێ دا و وان مالێن ئەم چووینێ ل زاخۆ و دەر دووران خەلکێ وان ماڵان دلێ وان زۆر زۆرێ نەخۆشبوو تایبەت ژنان و ژ ژنان ژی ژنێن دانعەمر و دکرنە گری و هندەک ژ وان وێنێن شەهیدێن سەرکردە شەوکەت شێخ یەزدین و مەحمود هالوی لبەر سینگێ وان بوون،من ژی د کرە گری! واتە شادی و خوشیا جەژنێ ل گەلێ مە ب گشتی کرە نەخوشی و گریان ..
ب راستی ئێک ژ کارەساتێن هەری مەزن و ناخ و دل هەژین و ڕۆژەکا ڕەش بوو و ژبیر کرنا وێ رۆژێ ب زەحمەت و قورسە، ژ دەستدانا وان مێرخاس و شورەشگێر و ژیرمەندان زیانەکا مەزن و خوسارەتیەکا هەری مەزن بوو .. دبێژم دۆژمن و تیروریست و نەحەزێن مە گرنگیێ تا رادەکێ هەری زۆر ب ئاین و جڤاکا پێکڤە ژیانێ و مرۆڤایەتیێ نادەن، چونکی عەقلیەتەکا شوڤینی و ڕەش و تاری هەیە، دۆژمنێن مە ژی ب درێژاهیا دیرۆکێ خوینمێژ و دیکتاتور و درندە بووینە، گەلە دیر ناچین بەردەوام ئیمپراتوریەتێن عوسمانی و سەفەوی دژایەتیا میر و میرگەهێن کوردی کرییە، نەهێلاینە گەلە دەستهەلاتێن وان بەرفرەهـ بن و دووم بکەن، ل دووماهیێ لاواز کرینە و ژناڤبرینە .. هەروەسا ل سەردەمێ وەلات و دەولەتێن هاتین ئاڤاکرن و سەربەخۆیا خۆ وەرگرتن، کورد نەبووینە خودان کیانەک سەربەخۆ؛ دۆژمن و داگیرکەران لپەی دەستهەلات و رێککەفتنێن هاتین ئیمزا کرن هەر ئێک ژ وان داگیرکەران ژلایێ خۆ باژێر و باژارکێن کوردستانێ ئێخستینە ل ژێر دەستهەلاتا خۆ و کوردستان هاتیە دابەشکرن لسەر داگیرکەران، حکومەتێن ئێک لدیڤ ئێکێن داگیرکەران زۆربەیا هەرە زۆرا بزاڤ و شورەشێن کوردی و کوردستانی ژناڤبرینە، زۆڵم و زۆرداری ل کوردان و کوردستانیان کرینە، بگرە ژ( کومکوژیێن بکوم، شەهیدکرن و سۆتن و ساخی بن ئاخکرن، سێدەردا و ئەنفالکرن، قرکرن ...هتد) هەمی رێکێن نەهێلانا رحا تاکێ کورد کرینە و ب هەمی شێوێن ئەشکەنجە و سزادانان ب سەرێ گەلێ مە ئیناینە، هەمی هەول و بزاڤێن وان ژبۆ نەهێلانا نەتەوێ کورد بووینە ..

ئەڤ کارەساتە ژی ئاماژەیەک بوو، کو تیروریست و نەیار و دۆژمنێن کوردستانێ چەند ب پەیاما ئێکگرتی و ئێکرێزیا ناڤ ماڵا کوردی نیگەرانن، ئەڤە ژی بۆ پەندەک بۆ گەلێ مە و پارتێن مە یێن سیاسی، ئەڤرۆ پێدڤی و فەرە زێدەتر هشیار بین، ژ جاران پێتر مە پێدڤی ب ئێکرێزی و ئێکگرتنێ هەیە؛ هەر دەما گەلێ مە ئێکرێز بوویە سەرکەڤتن و دەستکەڤتێن مەزن ب دەست خستینە، لەورا ڤێ قوناغا نها گەلێ مە و پارتێن مەیێن کوردستانا باشوور زێدەتر پێدڤییا ب ئێکرێزی و لێک نێزیکبوونێ هەیی و ل هەڤ گەهشتنێ، دا ڕوودان و کارەساتێن ڤی ئاوایی روونەدن ڤە .. هەروەسا داخوازێ ژ پارتێن سیاسی و تایبەت پارتی و ئێکەتیێ دکەین ب زووترین دەم لەزێ د پێکینانا کابینا نوو دا بکەن ، خەلک ژی ب پشتەڤانیەکا تمام ڤە پشتگیریێ ل کابینا نوو بکەن ل پێناڤ ئاسایش و ئارامیا کوردستانێ و پاراستنا دەستکەڤتێن کوردستانێ و بنبرکرنا گەندەلیێ و چاکسازیێ .. دا بەرەڤ کوردستانەکا بهێز بچین.

ل دووماهیێ دبێژم هزران سلاڤ ل سەر گیانێ پاکێ شەهیدێن کارەساتا ئێکی شوباتێ و هەمی شەهیدێن کورد و کوردستانێ سەر کاروانێ وان بارزانیێ مەزن و کاک ئدریسێ هەردەم لبیر .. ل پێناڤ پاراستنا دەستکەڤتێن کوردستانێ و ب دەستڤە ئینانا دەستکەڤتێن زێدەتر بۆ کوردستانێ و خەون و هیڤیا شەهیدێن مە دێ بەردەوامی و درێژیێ ب کاروانێ خەبات و تێکوشینێ دەین ل پێناڤ کوردستانەکا بهێز .. ڕووگەشی و سەربڵندی بۆ شەهیدێن ئێکی‌ شوباتێ و تەڤایا شەهیدێن رێ یا ڕزگارکرن و پاراستن و مانا کوردستانێ.