مێژوویا گەلێ مە پڕە ژ دەردەسی،رۆژێن رەش و پڕی خەم و نەهامەتی. ژبەرکو هەردەم چاردەورێن مە دوژمنێن ئاخ،ئالا،ئاڤ،ژین و هەبوونا مە بووینە. تاکە ئەگەر ژی ئەوە کو کوردین و گەلێ مە یێ خۆڕاگرە و خۆڕاگربوویە چ جاران حاشاتی ژ کوردبوونا خۆ نەکریە.
دوژمنن گەلێ مە ژ سووتن ،جینوسایدکرن،کوشتن و تالانکرنا گەل و وەڵاتێ مە تێر نەبوون، هەتا چەکێن کومکوژ و یێن قەدەغەکری هەمبەر ب کارئینان.کیمیا بارانکرنا هەڵەبجە،بەڵگەیێ بێ ویژدانی ،دلرەقی و دکتاتۆریەتا دوژمنێن مە و مرۆڤایەتیێ یە. هەڵەبجە ئەو باژێڕێ بوویە ناسناما شەهیدان، کو ژ ئەگەرێ کیمیا بارانکرنا وی باژێڕی،ئەوا ل (۱۹۸۸/۳/۱٦)ژلایێ سەددامێ دکتاتۆرو هەڤالێن ویڤە کریە خالەکا دی یارەش د مێژوویا خوەدا،و بوویە کارەساتەکا جەرگبڕ بۆ گەلێ مە یێ خێر ل خۆ نەدیتی.ئەڤ کریارا هووڤانە یا خوینمێژێن مللەتێ مە ئەڤا بوویە ئەگەرێ شەهیدکرنا پتر ژ (٥۰۰۰)کوردان و برینداربوونا ب سەدان کوردان، و بێی سەروشوینکرنا پتر ژ(۱۷۰)کەسان ژ خەلکێ هەڵەبجە و دەردۆرا وێ. "مەریەم!" ژی ئێک ژ هندابوویێن وێ کارەساتێ بوویە کو ژ ئەنجامێ وێ تاوانا نەمرۆڤانەدا هەر ژ زارۆکینی ژ مال،کەس و وارێن خۆ هاتییە ڤەقەتاندن، بێی ناڤنیشان بێی ناسنامە و بێی ناز و خۆ نیاسین مایە.ب رێکەکێ کو ئەو ژی نزانیت چەوا ئاوارەی وەڵاتێ ئیرانێ بوویە،پشتی گەلەک شەڤ و رۆژێن خۆ، تەمەنەک ژ تەمەنێ خۆ بێی دەیک و باب ،کەس و کار و خۆناسکرن، پڕی رۆندکێن سویر بۆ داهاتییەکێ رەش بوراندی. دووماهیک جار زانییە کو کوردە و وارەک هەیە زێدێ وێ یە پەنا بۆ وەڵاتێ خۆ یێ راستەقینە کو کوردستانە ئینایە. لێ تشتێ خەما مەریەمێ دووجارکی کری و تا ڕادەیەکێ زۆر بێ هیڤی کری ئەوبوویە، ژ ئەگەرێ تاقیکرنەکا نە دروست "مەریەم" ب "هاوناز"هاتییە دانان کو "هاوناز"ژی ئێک ژ هندابوویانە. لێ ب بورینا دەمی نەدروستییا وێ چەندێ خویابوو و ناسنامەیا "هاوناز"ێ ژێ هاتییە ستاندن. پشتی ئەنجامدانا پێنج پشکنینێن(DNA)لێ هیچ ئێک ژ کەس و نێزیکێن وێ دیارنەبوو.و پاشەرۆژ و ژیانا وێ نەدیار و رەش ما و دووبارە "مەریەم!"بێی ناڤنیشان و پەریشان ما.

پشتی بێهیڤیبوونەکا زۆر و ژیانەکا بێی ژین دووماهیک جار "مەریەم" بۆ "ژیان"و دەیکا وێ بۆ کوردستان.هەر وەکی ئەو ب خۆ دبێژیت: جەنابێ سەرۆک وەزیرێن هەرێمێ مینا بابەکی دگەل من هەڤکاربوو، ئومێد ب من بەخشی کو دووبارە ژیانێ بۆ من ڤەگەڕینیت. ژبەرکو ئەز کچم و ژ کچان ژی بێی وەڵاتنامە و رەگەزنامەیا وەڵاتێ خومە ، ژیانەکا دژوار دبورینم. لێ ب پشتەڤانییا سەرۆکێ حکوومەتێ گەلەک نەمایە ببمە خودانا وڵاتنامەیا عیراقی و ل سەر ناسنامەیا من ناڤێ باژێڕێ من(هەڵەبجە)هەبیت.
ب پشتەڤانیا نێچیرڤان بارزانی،ناڤێ سەپاندیێ "مەریەم" هاتەگوهۆڕین بۆ "ژیان" و دەیکا وێ ژی کرە کوردستان، کو دەیکەکە مەزنترین، جوانترین و باشترین دەیکە. "ژیان"ێ د ڤێ ئێکێدا بەختەکێ سپی هەبوویە کو سەرۆکێ حکوومەتێ کریە کچەکا راستەقینەیا هەمی کوردستانێ و ئێدی ژیان بۆ ژیانێ ڤەگەڕاند و دشێت بێژیتە هەمی کوردستانێ دادێ.
هەلبەت ئەڤە نە ئێکەم کارێ بڤی رەنگی یێ جەنابێ سەرۆکێ حکوومەتێ یە،بەلکو هەردەم پاڵپشت و هەڤکارێ دەست کورت و نەداران بوویە. کەیسا ژیانێ و هنارتنا ب دەهان نەخۆشان بۆ دەرڤەی وەڵاتی و ب ستووخوڤەگرتنا تێچوویێن چارەسەریێن ب دەهان نەخۆشێن خوەدی نەخۆشیێن گران و ب هانا چوونا ب هزاران ئاوەرە و دەربەدەران، سەرباری هەمی کێماسیان بەڵگەیێن وێ ئێکێ نە،کو سەرۆکێ حکوومەتێ خودانێ بێی خودانانە.