ژ ئه‌نجامێ ژ هه‌ڤ نزیكبوون و گوتوبێژین د ناڤبه‌را سه‌ركرده‌یێن كورد ل هه‌رێما كوردستانێ و حكومه‌تا ئیراقێ، په‌سه‌ندكرنا پرۆژه بۆدجه‌یا سالا 2019 یا ئیراقێ هاته رۆژه‌ڤ، ب ڤێ یه‌كێ ژنوو كابینا عه‌بدولمه‌هدى دێ كاریت ده‌ست ب بجهـ ئینانا كارناما خوه‌یێ حكومه‌تا نوو بكه‌ت، لێ ئه‌وێ كو نها ل هه‌رێما كوردستانێ گه‌له‌ك دهێته باسكرن و بوویه رۆژه‌ڤ، پرسا بۆدجه‌ى و جێگیركرنا موچه‌یێن فه‌رمانبه‌ر و پێشمه‌رگه‌یێن هه‌رێما كوردستانێ یه د پرۆژه بودجه‌یا ئیراقێ دا، كو د مادێ ده‌هێ خالا جیم دا باس ل هنارتنا موچه‌یێن فه‌رمانبه‌ران و پێشمه‌رگه‌یێن هه‌رێما كوردستانێ، كو ئه‌ڤه ژى پشكه‌كه ژ 12.67% ژ پشكا هه‌رێما كوردستانێ ژ بۆدجه‌یا ئیراقێ، ئه‌ڤه ل گۆرى په‌سه‌ندكرنێ، چونكى پێشتر ژى گه‌له‌ك جاران ئه‌ڤ سیناریۆیه هاتیه دیتن و گه‌له‌ك بریار هاتیه په‌سه‌ند كرن، لێ نه‌هاتیه بجـ ئنیان،له‌ورا چه‌ند كار بۆ په‌سه‌ندكرنا پرۆژه بۆدجه‌ى هاتیه كرن، دڤێت هند ژى بۆ بجهـئینانا وێ بهێته كرن. هه‌ر ل سه‌ر ڤێ یه‌كێ نها ل هه‌رێما كوردستانێ هه‌ر ئالیه‌ك باس ل هه‌ول و بزاڤێن خوه دكه‌ت ژ بۆ ب ده‌ستڤه ئینانامافێن خه‌لكێ هه‌رێمێ ل به‌غدایێ، لێ ئه‌وێ هه‌ره گرنگ ئه‌وه، داوى سه‌ره‌دانێن جودایێن سه‌رۆك بارزانى بۆ به‌غدایێ كۆمبوونا وى ل گه‌ل هژماره‌كا زۆر یا سه‌ركرده‌یێن ئیراقێ، هه‌روه‌سا سه‌ره‌دان و هه‌ماهه‌نگى یا نێچیرڤان بارزانى سه‌رۆكێ حكومه‌تا هه‌رێما كوردستانێ ل گه‌ل تیما نوو یا كابینه‌یا عادل عه‌بدولمه‌هدى، رۆله‌كێ به‌رچاڤ د پێشڤه‌برنا په‌یوه‌ندیێن هه‌ردوو ئالییان بریه و بوویه ئه‌گه‌ر حكومه‌تا ئیراقێ ل سه‌ر دانا گه‌له‌كه مافێن ده‌ستورى یێن خه‌لكێ كوردستانێ رازى بیت و ژ وان ژى مافێن دارایى، ل ڤێرێ گرنگه باس ل كارنامه‌یا پارتى و حكومه‌تا هه‌رێمێ بكه‌ین هه‌مبه‌ر حكومه‌تا ئیراقێ، پێشتر پارتی دیموكراتى كوردستان ب دروشمێ پارتیه‌كێ ب هێز، واته كوردستانه‌كێ ب هێز، هه‌روه‌سا به‌ره‌ف كوردستانه‌كا بهێزتر پشكدارى هه‌ردوو هه‌لبژارتنێن په‌رله‌مانێ ئیراقێ و په‌رله‌مانێ كوردستانێ بوو، د هه‌ردوو هه‌لبژارتنان ژى ب حزبا ئێكێ سه‌ركه‌فت، بۆ قوناغا نها ژى پارتى تاكه بژارده‌یا كو كریه مه‌رج بۆ هه‌ماهه‌نگیا ل گه‌ل به‌غدایێ؛ پشكداریا راسته‌قینه‌یا كوردانه د حكومه‌تا ئیراقێ دا و وه‌رگرتنا هه‌موو وان مافێن دارایى كو پێشتر ژ ئالیێ عه‌بادى و مالكى نه‌هاتبوونه دان، كه‌واته بجهئینانا ئه‌ڤێ مه‌رجا پارتى كو مه‌زنترین ئالیێ كوردستانێ یه ل له په‌رله‌مانێ ئیراقێ و تاكه حزبێ كوردستانێ یه كو وه‌زاره‌ت د كابینه‌یا عادل عه‌بدولمه‌هدى هه‌ین، دێ بیته ئه‌گه‌ر هه‌م حكومه‌تا عه‌بدولمه‌هدى ب هه‌موو پێكهاته‌یان یا زه‌نگین بیت، هه‌م ژى عه‌بدولمه‌هدى وه‌كو سه‌رۆك وه‌زیره‌كێ سه‌ركه‌فتى پشتى شكه‌ستنێن عه‌بادى و مالكى بهێته نیشاندان ل سه‌ر ئاستێ جڤاكێ ناڤده‌وله‌تى، له‌ورا ده‌رباره‌ى هه‌موو ئه‌و ماف و ئیمتیازاتێن هه‌رێما كوردستانێ كو پێشتر ژ ئالیێ حكومه‌تێن ئێك ل دووڤ ئێكێن به‌غدایێ هاتبوونه برین، عه‌بدولمه‌هدى دێ ڤه‌گه‌رینیت، په‌یوه‌ندیێن وى و سه‌ركرده‌یێن ئیراقێ ژى ئاماژه‌یێ وێ یه‌كێ نیشان دده‌ن كو ئه‌و ده‌مارگیریا كو پێشتر ژ ئالیێ سه‌رۆك وه‌زیرێن بۆرى یێن ئیراقێ ل هه‌مبه‌ر هه‌رێما كوردستانێ هه‌بوو، ئه‌و ده‌مارگیرى ل جه‌م عادلێ عه‌بدولمه‌هدى سه‌رۆك وه‌زیرێ نهایێ ئیراقێ ناهیته دیتن، له‌ورا هه‌ماهه‌نگى و بزاڤێن نێچیرڤان بارزانى د پرسێن ئابورى دا ل گه‌ل حكومه‌تا ئیراقێ ئه‌گه‌رێ سه‌ره‌كى بوویه بۆ جێگێركرنا موچه‌یێن فه‌رمانبه‌ران و پێشمه‌رگه‌ى د بۆدجه‌یا ئیراقێ دا.
کارزان فەقێ
