روژھەلاتا ناڤین وەک گەرمترین دەڤەر ل سەرانسەری جیھانێ بو کێشمە کێشا سیاسی و کریزێن دەم درێژ و پێکدادانا بەرژەوەندیا و ئالوزیێن ناڤبەرا وەلاتان و شەرێ مەزنە وەلاتێن جیھانێ ل سەر دەڤەرێ , تایبەتی پشتی ئالوز بونا کێشا سوریێ و پشکداریا راستەوخویا ئیران و روسیا و ئەمریکا و تورکیا و چەندین ئالیێن دیتر ل ڤی شەری دا و ھەلوەشاندنا رێککەفتناما ئەتومی ژ ئالیێ سەروک ترامپی ڤە , دووبارە دانانا دورپێچێ ل سەر ئیرانێ پتر دەڤەر ریبریێ کریزان کریە و وەلاتێن دەڤەرێ کەفتینە ناڤ شەرەکێ ئابوری و سیاسی کو نە ژ دوورو نە نیزیک پەیوەندیی پێڤە نینە .
رابونەڤا ھەرێما کوردستانێ پشتی ریفراندوما (٢٠١٧) و ریدانێن شازدێ ئوکتوبەرا ھەمان سالدا , پتر پێگەھێ ھەرێمێ بھێز کەفتیە ل ئیراق و دەڤەرێ دا. سەرەدانا ھەر ئێک ژ مایک پومپیو وەزیرێ دەرڤەیێ ئەمریکا و لودریانێ وەزیرێ دەرڤەیێ فەرەنسا و جواد زەریفێ وەزیرێ دەرڤەیێ ئیرانێ و چەندێن شاندێن ئەمنی و ئابوری و سیاسی و دبلوماسیێن جودا جودا گرنگیا پێگەھێ ھەرێما کوردستانێ دیار دکەت . ئەڤرو یا گرنگ ئەوە کورد چەند گاڤێن گرنگ بەرەف پێش پاڤێژیت و زێدەتر نەبیتە کارەکتەرەک ب دەستێ ئەجینداێین ھەرێمی و نێڤدەولەتی دا . دەستپێکێ یا گرنگ ئەوە کو لەز بێتە کرن ل پێک ئینانا حکومەتا ھەرێما کوردستانێ و کارنامەک بو ڤێ کابینێ بێـتە دانان کو ئارامی و دژاتیا گەندەلی و گرنگی دان ب چاکسازیێ و دەستکرن ب سازیی کرنا ھەمی سێکتەرێن گرنگێن وەلاتی و کاراکرنەڤا سازیا سەروکاتیا ھەرێما کوردستانێ کو بدیتنا من ب ھاتنا نێچیرڤان بارزانی بو ڤی پوستی د ڤێ رەوشێ دا و ئەو پەیوندیێن دبلوماسیێن ھەی ل گەل ھەر ئێک ژ ئیراق و تورکیا و ئیران و جیھانێ ب گشتی دێ ھاریکار بیت بو چارەسەریا ئالوزیێن نافخوی و ھەروەسا دگەل بەغدا ژی دێ چارەسەری ب ساناھی تر کەڤیت ئەگەر نیەتەک سافی ھەبیت ل ھەردوو ئالیان ڤە, سەرەرایێ بھێزکەفتنا کوردستانێ. ئەڤ گرنگی دانا دەڤەرێ و جیھانێ ب کوردستانێ فەرە بێتە وەبەرھێنانێ ل ھەمی ئالیەکێ ڤە , ژ ئالیێ سیاسی و دبلوماسی و ئابوری و پەیوەندیێن زانستی و پێکگوھرینا زانیاریا و ئینانا پێشکەفتنا وان وەلاتان بو کوردستانێ , ژ بەرکو کوردستان ھەردەم پێتڤی یا ب ھەمی وەلاتەکێ جیھانێ ھەی تایبەت دڤێ رەوشێ دا کو روژھەلاتا ناڤین تێدا دەرباز دبیت .ھەروەسا تشتێ زێدەتر گرنگ نھا دا کو بویە پرسیارا گەلەک ژ شروڤەکارێن سیاسی ئەوە ئەرێ ھەرێما کوردستانێ دێ شێت کیڤەیا ھەفکێشا سیاسی و دبلوماسی و ئابوری و سەربازی بیت ل دەڤەرێ تایبەت کو کێشێن ناڤبەرا ئیران و ئەمریکا گەھشتینە گوپیتکێ ؟ ئیران وەک ھەفسیێ ھەرێما کوردستانێ و خودانێ پێگەھەکێ مەزنێ ئابوری و سیاسی و سەربازی ل دەڤەرێ و کاریگەریەکا مەزن ل سەر ئیراقێ ھەیە و بەردەوام ئەڤ کاریگەریە ل زێدەبونێ دایە, یا بو ھەرێما کوردستانێ گرنگ ئەوە کو دنھا دا پەیوەندی گرێدان و بریاردانا ل سەر قوتکرن و بەردەوامی دان ب ڤان پەیوەندیان ل گەل ئیرانێ ب بەغدا ڤە گرێبدەت بو ھندێ نە ئەمریکا لێ دوور بکەڤیت و نە ئیران لێ ببیتە دووژمن . ژ بەرکو زورجاران کورد بوینە سوتەمەنیا شەر و ئالوزیێن ناڤبەرا وەلاتێن ھەرێمی و جیھانی و ئەنجامدا ئەو ب رێککەفتنەکێ لێک زڤرینە و کورد ژی بو دەھان سالان پاشڤە زڤرینە.
زڤرینەڤەیا پێگەھێ ب ھێزێ ھەرێما کوردستانێ فەرە جارەک دن کورد خو ب خو نەبیتە فاکتەرێ ژ نافچونا خو و بزانیت ل گەل کاروانێ سیاسی و دبلوماسی یێ دەڤەرێ بچیت و ئەو کاودانێن نھا روژھەلاتا ناڤین پێدا دەرباز دبیت فەرە باشترین شێواز مفایێ ژێ وەربگرن , ئەو ژی دەستپێکێ ب رێکخستنا ناڤ مالا کوردی و پێکول کرن بو چارەسەریا کێشێن ناڤبەرا بەغدا و ھەولێرێ و ھەروەسا کورد نەبیتە ئالی گرێ چ ئێک ژ میحوەرێن ئەمریکی و ئیرانی بەلکو ب دبلوماسی و سیاسەتەکا سەرکەفتیانە سەرەدەریێ د گەل ھەردوو ئالیان بکەت .