زانكۆیا سه‌لاحه‌دین ژێ ده‌ركه‌ڤیت، هه‌موو زانكۆیێن دى یێن هه‌رێما كوردستانێ پشتى سه‌رهلدانێ هاتینه دامه‌زراندن، واته د كه‌رتێ خواندنا بلند و ئاڤاكرنا زانكۆیان دا حكومه‌تا هه‌رێمێ كه‌د و ره‌نجه‌ك مه‌زن دیتیه، چونكى نها ل هه‌رێما كوردستانێ 16 زانكۆیێن حكومى هه‌نه، ل گه‌ل دا 19 زانكۆیێن تایبه‌ت و 14 په‌یمانگه‌هێن تایبه‌ت هه‌نه، هه‌موو ئه‌ڤه زانكۆیه ژى به‌رهه‌مێ چه‌ند سالێن ده‌ستهه‌لاتداریا حكومه‌تا هه‌رێمێنه، كو سالانه ب هزاران قوتابی ل ڤان زانكۆیان ب دووماهى دهێن و به‌ره‌ف بازارێ كاركرنێ دچن، هه‌رچه‌ند دڤى بیاڤى دا كێماسى هه‌یه و ده‌رچوویێن زانكۆیان د ب ده‌ست خستنا كارى زه‌حمه‌تیێ دبینن و نها ژى بێكاریا وان ئێك ژ ئاریشه‌یێن هه‌رێما كوردستانێ یه، لێ چه‌وا حكومه‌ت دێ شێت وێ پرسگرێكێ چاره بكه‌ت؟ به‌رسڤا ڤێ پرسێ بخوه دێ بیته رێكه چاره‌یا وێ ئاریشێ ژى، چونكى ده‌ما ئاستێ خواندنێ ل زانكۆیان به‌ره‌ف پێش ڤه بچیت، هه‌روه‌سا ده‌ما قوتابى ب زانینێن زۆر و ل دووڤ ڤالاتى و پێدڤیا بازار و جڤاكێ كوردستانێ خوه ل سالێن زانكۆێ پێ بگه‌هینیت، بێگومان دێ بیاڤێ كاركرنێ و هه‌بوونا ده‌رفه‌تێن كارى پشتى ده‌رچوونا وانپتر بیت. بۆ پێشخستنا ئاستێ زانستیێ قوتابیان هاندانا وان بۆ سێرچ و خواندنێن زێده‌تر ل زانكۆیێ؛ حكومه‌تا هه‌رێما كوردستانێ جاردن بریارا دامه‌زراندنا قوتابیێن ئێكێ و دووێ و سێ یێ یێن زانكۆیان كارا كره‌ڤه و ل چه‌ند رۆژێن بۆرى نێچیرڤان بارزانى سه‌رۆكێ حكومه‌تا هه‌رێمێ بریار دا بۆ دامه‌رزاندنا پتر ژ 1300 ده‌رچوویێن ئێكێ و دووێ و سێ یێ زانكۆیان، ژبلى كو ڤێ بریارا سه‌رۆكێ حكومه‌تێ د بیاڤێ ڤه‌دیتنا كارى و دانه‌كارا شیان و پسپۆریا وان ده‌رچوویان دێ مفایێ خوه بۆ هه‌رێما كوردستانێ ب گشتى هه‌بیت؛ ژ بۆ پێشخستنا ئاستێ زانستى و زانینێ ژى مفایێن خوه هه‌نه، چونكى ڤێ بریارێ دێ جۆره ركابه‌رى و منافسه‌كێ دناڤبه‌را قوتابیێن زانكۆیێ دروست كه‌ت ئه‌و بشێن ل رێزێن ئێكێ و دووێ و سێ یێ ده‌ربچن و زوو بهێنه دامه‌زراندن، كه‌واته بریارا دامه‌زراندنا وان ده‌رچوویان و پێشخستنا ئاستێ زانستى ل زانكۆیان دوو پرسن و په‌یوه‌ندیه‌كا دیالكتیكى دناڤبه‌را وان دا هه‌یه و كارتێكرنێ ل هه‌ڤدوو دكه‌ن، ژ به‌ر هندێ ئه‌گه‌ر بێژین حكومه‌تێ ب وێ بریارێ دكاریت دوو چیچكان ب هه‌ڤرا بكوژیت، چونكى جاره‌كێ داخوازیا وان ده‌رچوویان ب جهـ ئینا و بوونه خوه‌دان مووچه و دێ د خزمه‌تا سازیێن میرى و خه‌لكێ هه‌رێمێ دا بن، جاره‌ك دى ژى دێ حه‌زا خواندنێ ل ده‌ف وان قوتابیێن زانكۆیێ دروست كه‌ت كو پتر خوه ب وه‌ستین و زێده‌تر بخوینن ژ بۆى كو ب نمره‌یێن باشتر ده‌ربچن و پشتى ده‌رچوونێ ژى زوو بهێنه دامه‌زراندن. هه‌روه‌سا ژلایه‌كێ دى ڤه، بریارا دامه‌زراندنا وان ده‌رچوویان ب خوه مزگینیه‌كه بۆ خه‌لكێ هه‌رێمێ ژى كو پشتى چار سالێن راوه‌ستانا پرۆسه‌یا دامه‌زراندنا فه‌رمانبه‌ران، ئیدى ئه‌و پرۆسه ده‌ست پێكره و دوور نینه ب باشتر بوونا ره‌وشا ئابوریا هه‌رێمێ كو هه‌موو ئاماژه بۆ هندێ دچن، ل سه‌ر سیسته‌مێ جاران ب شێوازێ پركرنا فۆرمان دامه‌رزاندن ده‌ست پێ بكه‌ته.
کارزان فەقێ
