پشتی ده‌مه‌كێ نه‌یێ دوور دوورپێچا ل سه‌ر هه‌رێما كوردستانێ ملله‌ت ب مه‌زن و بچووك و پیر ڤه بێزار و پووسیده كرین، كه‌سێ باوه‌رنه‌دكر رۆژه‌كێ دێ هێت كو پشتی وه‌لات و لایه‌نێن سیاسی پشتا خوه دایه هه‌رێمێ و قێژیێن مه دهاتنه كانسلكرن، به‌لێ ئه‌ڤرۆ یا بووسه سرا بۆ وه‌زاره‌تێن ده‌رڤه یێن مه‌زنترین وه‌لاتێن جیهانێ ل سه‌ر سه‌ره‌دانكرنا هه‌ولێرا پایته‌خه‌ت، ل ده‌سپێكێ ژی سه‌ره‌دانا وه‌زیرێ ده‌رڤه یێ ئه‌مریكی ماك بۆمبیۆ و جڤین ل گه‌ل هه‌رسێ سه‌ركردێن هه‌رێما كوردستانێ، ئه‌ڤ قه‌نجیه دزڤریت بۆ وێ سیاسه‌تا دورست و بئه‌قلانه‌یه یا كه‌سێ نێچیرڤان بارزانی كو رۆلێ ل سه‌ر رۆلێ سه‌رۆك مسعود بارزانی زێده و ته‌مامكه‌ر بوو، پشتی بجهئینانا پرۆسا خه‌ونا هه‌ر تاكه‌كێ كورد یا گشتپرسێی ل سه‌ر سه‌رخوه‌بوونێ، ئه‌و برینا هه‌ستی گه‌هشتیه هه‌ستی، پێدڤی نۆشداره‌كێ زانا بوو، ب راستی هینگی هه‌كه ئه‌و سه‌ره‌ده‌ریا نه‌رم و رۆهن یا نێچیرڤان بارزانی نه‌با، كی دا مه ژ وی ته‌ڤنی ئینیته ده‌ر؟! ئه‌ڤ تشته وێ رۆژێ من ژ ده‌ڤێ كه‌سه‌كی بیست، زۆری توند و ره‌خنه‌گر و ره‌شبین بوو ل سه‌ر سیاسه‌تا پارتی دیمۆكراتی كوردستان و سه‌رۆكاتیا وه‌زیرێن هه‌رێما كوردستانێ، به‌لی گه‌له‌ك ژ دله‌كێ پر داكۆكی هه‌مان په‌یڤێ گۆت: هه‌كه سیاسه‌تا كاك نێچیرڤان نه‌با، نوكه ئه‌م د چاره‌نڤیسه‌كێ تێكچووی دابووین!!. تشتێ مه‌زنتر كو دبیته مشتترین به‌لانس ئه‌وه كو ئه‌ڤه وه‌زیرێ ده‌رڤه یێ ئیرانێ ژی دێ قه‌ستا قیبله‌گه‌ها كوردستانێ كه‌ت، كو ل هه‌مبه‌ر ئه‌مریكا جه‌مسه‌ره‌كێ مه‌زنه، هه‌ردیسا ل دووڤدا یا ژ هه‌میێ خۆشتر و دلره‌حتتر ئه‌وه دێ وه‌زیرێ فره‌نسا ژی گه‌هیته سرایا خوه بۆ قیبله‌گه‌ها هه‌ولێر یا كوردستانێ، كه ب هیڤیی مه خال د وێ سه‌ره‌دانێ دا هێنه دانان ل سه‌ر په‌یڤان! چونكو فره‌نسا وه‌كو ئێكه‌مین قورتالكه‌ر و دۆستێ هه‌رێما كوردستانێ بوویه د گه‌له‌ك جاران دا و ب تایبه‌ت پشتی وێ قه‌یرانا هشك و كۆژه‌ك كو ده‌رگه‌هه‌كێ ب هیڤی ڤه‌كر بوو ل پێشوازیكرنا ماكرۆنی بۆ سه‌رۆكێ وه‌زیرێن هه‌رێما كوردستانێ. ئه‌ڤجا ته‌دڤێت ئه‌ڤرۆ وه‌زاره‌تا ده‌رڤه یا ئه‌مریكی ب فه‌رمی و ب ده‌نگه‌كێ بلند پیرۆزباهیێ ل پۆستێ نوو یێ دێ هێته به‌خشین بۆ نێچیرڤان بارزانی، نه‌مازه پشتی وێ سه‌ره‌دانا ترامپ بۆ عیراقێ و بچووكرنا حوكمه‌تا به‌غدا، ئاماژه‌كا ب هێزه كو پێگه‌هێ هه‌رێمێ گرنگتر دبینن ژ عیراقێ چونكو بهایێ وه‌زاره‌تا ده‌رڤه یا ئه‌مریكی ل ئه‌مریكا و ل جیهانێ نه‌كێمتره ژ یا خوه‌دی سه‌رۆكاتیا ویلایه‌تێن ئێكگرتی یێن ئه‌مریكی!. ب ڤێ سه‌ره‌دانێ ئێدی گه‌شبینی یا سه‌رێ خوه دخۆت و ئه‌ڤه ئه‌و سۆز یا سه‌رۆك مسعود بارزانی دایی كو چو جاران خوه شه‌رمزاری ملله‌تێ خوه نه‌بینم، ئها ئه‌وی ئه‌ڤ رۆژه ددیت كو راسته ئه‌و پرۆسه وه‌كو ریسكه‌ك بوو به‌لێ هه‌بوونا زۆرا فه‌ربوو و گرانی و بهایێ ئیراده‌تا گه‌لان نیشا هه‌موو جیهانێ دا، ئه‌ڤجا دمیننه ل وێری پێكئینانا حوكمه‌تا هه‌رێمێ و به‌خشكرنا چاكسازیان و خۆشكرنا ژیارا هه‌ڤوه‌لاتیان دێ بیته به‌هرا كاك مسرۆر بارزانی بۆ سه‌رۆكاتیا ئه‌نجوومه‌نا وه‌زیرێن هه‌رێما كوردستانێ و هیڤیێن مله‌تی و ب تایبه‌ت ژی ته‌خا گه‌نجانه پێ هه‌نه، ئه‌ڤجا ئه‌ڤه هه‌موو ژ چو دهێت ژ رۆلێ په‌یوه‌ندیان و زانینا مفاوه‌رگرتنێ ژی، كا چاوا وان په‌یوه‌ندیان ئه‌م ژ مه‌ترسیا تیرۆرێ پاراستین و قورتالكرین ب ئینانا فرۆكه‌یێن بیانی و هاریكاریا هێزێن مه یێن پێشمه‌رگه‌ی هه‌ر ئه‌و په‌یوه‌ندینه ئه‌م ژ قه‌یرانێن سیاسی و ئابووری ژی قورتالكرین!
شێرزاد نایف
