پاراستنا رەوشا نھا یا کوردستانێ و بەرەف پێش برنا وێ ئەرکێ سەرەکی یێ حکومەتا ھەرێما کوردستانێ و ھێزێن سیاسی یە ل کوردستانێ تایبەتی ژی پارتی دیموکراتی کوردستانی و ئێکەتی نیشتیمانی کوردستان وەک دوو ھێزێن خوەدی دیروکەک درێژ و قوربانی دان و رولێ سەرەکی ھەبویە ل دروستبونا کیانێ سیاسی یێ کوردستانێ.بەلێ وەک ب درێژاھیا دیروکێ دیار ل سەرانسەرێ جیھانێ ئەوێن کو شورەشێ دکەن ئێکەم جار بەردبنە سەر و گوھێن ئێک و دوو!. شەرێ نافخویێ کوردستانێ کاریگەریەک خراب ل سەر رەوشا کوردستانێ کر و ھەتا نھا ژی سیماێن دوو ئیداریێ ب کوردستانێ ڤە دیارن , کو ئەڤ چەندە ھەردەم جھێ مەترسیێ یە بو پاشەروژا کوردستانێ .
دەمێ بەحس ژ دەستگیرکرنا کادرێن پارتی و ئێکەتی دئێـتەکرن ژ ئالیێ ئاسایشێ ڤە , نە بتنێ ریدانەکە و چەند روژان دبیتە بابەتێ راگەھاندنێ و ب سولحەکا عەشائیری ھەردوو ئالیی پێک دئێن و (گرتی ب گرتی ) کێشێ ب داوی دئینن !! ئەڤ ریدانە مەزنترین مەترسیە ل سەر پاشەروژا کوردستانێ و مانەڤا کیانێ سیاسی یێ کوردستانێ کو ب خوینا دەھان ھزار شەھیدان بەرھەم ھاتی. تێکچونا رەوشا روژھەلاتا ناڤین و گەفێن تورکیا و دورپێچا ل سەر وەلاتێ ئیرانێ و بریارێن ترامپی یێن سەیر و سەمەر و خوە ڤەکێشانا ئەمریکا ل سوریێ و پێکولێن ئەرەبی بو ڤەگەراندنا رولێ خوە یێ مەزن و زێدەبونا رولێ روسیا ل دەڤەرێ و ئەو رەوشا ئالوزا ئیراق کەفتیە تێدا ھەمی وێ چەندێ دگەھینن کو ئەوا نھا ل کوردستانێ ریددەت دووبارەکرنا دیروکەکا بێ بەرھەمە ئەگەر ل خو زڤرین نەبیت! ژ بەرکو ھەبونا ڤێ رەوشا ئالوز ل ئیراق و دەڤەرێ دا ئەگەر ھێزێن کوردی نەکەتە ئێک کەنگی ھزرا ئێکگرتنێ دێ ھەبیت؟
کوردستانیان ژ بلی ھیڤیا وان بو باش بونا رەوشا دارایی , ھەمی ھیڤیێن وان ئەون کوردستانەک ئارام ھەبیت و ھەمی ئالی وەک برا بن و ئەوا پشتی شازدێ ئوکتوبەرێ ل دەست دای کو ھەمی ژی بو ھەڤرکیا سیاسی یا ناڤبەرا پارتێن سیاسی دزڤریت جارەک دن ژ خو زڤرین و راست ڤەکرنا گاڤێن شاش ڤەگەرینن. ئەڤێ ریدانێ گرنگیا بھێزکرنا حکومەتێ و ب نشتیمانی کرنا ھێزێن چەکدار پتر روون کر و ئیدی چ دەرفەتەک نینە کو بەردەوامی بێتەدان ژ ئالیێ پارتی و ئێکەتی ڤە ب سیستەمێ دوو ئیدارییێ . بریارا سەروکێ حکومەتێ نێچیرڤان بارزانێ بو ئازادکرنا ھەردوو کادرێن پارتی و ئێکەتیێ جھێ دلخوشیێ و کو زێدەتر دەرفەت ب وان کەسان نەھاتە دان ئەوێن ئەجیندایێن سیاسی و ھەوالگیریێن بیانی بجە دئینن یاریێ بکەن ب چارەنڤیسێ کوردستانیان . ل ھەمان دەم ژی دا فەرە ل سەر سەروکێ حکومەتێ کو د ڤی دەمی دا و ل پاشەروژێ دا کو بەربژێرێ پارتیە بو پوستێ سەروکێ ھەرێمێ وەک بلندترین پوستێ بجە ئینانێ ل کوردستانێ کارەک جدی بکەت کو ئیدی ئاسایش و پێشمەرگە , ل دەستێ پارتی و ئێکەتی دا نەمینن و ببنە دوو ھێزێن نیشتیمانی و ئینتیمایا وان تنێ بو کوردستانێ بیت و بێنە رێکخستن ل بن سێبەرا یاسا و دەستورەکێ ئێکگرتی , کو ب دیتنا من ئەگەر کارەک ب ڤی ئاوای نەھێتە کرن ھەر دەم کوردستان ل بن گەفا شەرێ نافخوی و دووئیدارەیێ دایە . ئەرکێ کاک نێچرڤانی ل پاشەروژێ دا زور گرنگ وگرانە بەلێ ئەگەر بریار و نیەت و دیتنەک باش و ستراتیجی بو کێشا کوردی و کوردستانەک سەربەخو ھەبیت دێ ئەڤ ئەرکە ب ساناھی بەرھەم ئێت ب ھاریکاریا ھەمی ئالیەکێ .
ل داویێ دا فەرە ئەو چەندە ل پێشیا مە بیت کو ئەرکێ ھێزێن چەکدار و ئێمناھیێ پاراستنا کوردستانێ و سەر و مالێ خەلکی یە , ژبەرکو کوردستان نھا ل قوناغەک نازکدایە و رەوشا دەڤەرێ ژی ھەمی ل ئالوزییێ دایە . ل ئەرکێن ھەری سەرەکی یێن کابینا داھاتی و سەروکێ ھەرێمێ ئەوە کار بکەت بو ب نیشتیمانی کرنا ھێزێن پێشمەرگە و ئاسایش و دەستێ حزبێ ل ڤان ھێزان دیر بکەت بو پاراستن و مانەڤا کیانێ کوردستانێ .