سەربوورا ھەرێما کوردستانێ نموونەکا ھەری جوانا پێکڤە ژیانێ یە ل سەرانسەری جیھانێ، دیارە ژی کوردستان وەلاتەکێ فرەرەنگە ژ روویێ ئایین و نەتەوە و پێکھاتەیان ڤە ھەروەھا فەرھەنگا لێبۆرینا ئایینی و نەتەوی و پێکڤە ژیانا ئاشتیانە ژ سیمایێن گەش و دێرینێن جڤاکێ کوردستانێ نە ، وەکو دبینین ژڤی ئالی ب ھەمی شێوەیان مافێن پێکھاتێن ئولی و نەتەوەیی دپاراستی نە.
دگەل دا ژی ھەموو پێکھاتێن ڤی کومەلگەھی ھەست ب ھەبوونا خۆ دکەن و ڤێ چەندێ ژی وەکرییە کو ھەموو و ئۆل و نەتەوە خۆ ب خودانێ کوردستانێ بزانن، ئەڤ گاڤ ژی ژبۆ موکمیا فەرھەنگا پێکەڤەژیانێ و لێبورینێ یە ھەڤدەم سەدەمەکێ دیترێ سەرەکی یێ ڤێ پێکڤەژیانێ پیتە و گرنگیدانا حکومەتا ھەرێما کوردستانێ یە کو داکۆکی کارەکا سەرسەختە ل مافێن سیاسی و ئیداری و کولتۆری یێن کلدان و سریان و ئاشووری و تورکمان و ئەرمەنان، ھەروەھا مافێن کوردێن ئێزدی و فەیلی.
دیارە رولێ کاریگەر و بەرچاڤێ بەرێز نێچیرڤان بارزانی کو گاڤێن ھەری باش دڤێ دەربارێ دا ھەلاندینە و کارییە ھەڤالینەکا توکمە دورست بکەت دناڤبەرا ڤان ھەمی ئۆل و نەتەوەیان و ڤێ چەندێ ژی بکەتە کەلتۆر کو ھەمی ھەلکەفت و بونێن نەتەوەیی و ئایینی د سەقایەکێ ئارام و تەنادا برێڤەدچن، و بەردەوام د کاری دایە ژبۆ دابینکرنا مافێن ڤان پێکھاتان بێ جوداھی .
وەرار و پێشکەڤتنا ھەر وەلاتەکی ژی یا گرێدایە ب تەناھی و ئاسایشێ ڤە، دیارە ژی ھەرێما کوردستانێ گاڤێن بھێز و کاریگەر دڤێ پرسێ دا ھەلاندینە و کارییە ب رێکا دەزگەھێن ئەولەھیێ ستراتیژیەکا موکم یا ئەمنی دابرێژیت و تا رادەیەکێ ھەری باش یا سەرکەفتی بوویە، یا جھێ ئاماژێ ئەوە کو چ دەمان ئارامی و سەقامگیری سەرکەفتی نەبوویە ئەگەر ھێز و ئالیێن سیاسی و دگەلدا ژی ھەڤوەلاتی نەبنە ستوین ژبۆ وێ ستراتیژیەتا ژبۆ ئەولەھیێ دھێتە دانان.
ئاشکرایە ژی لڤێ داویێ لدیڤ مالپەرێ دەیلی مێل ( ھەولێر ) دبیتە باژێرێ (٥ ) ل سەرانسەری جیھانێ بۆ سلامەتیێ و ئێمناھیێ، ڤێ چەندێ ژی وەکرییە کو سالانە ب ملیونان گەشتیار قەستا ھەرێما کوردستانێ بکەن دیسان ژی ھەرێم بوویە پەناگەھەکا ھەری ئارام ژبۆ ئاوارێن ناڤەراست و باشورێ عیراقێ و وەلاتێ سوریا .
پاراستنا ڤێ پێکڤە ژیانێ ب پلا ئێکێ دکەڤیتە ستویێ ھێزێن کوردستانێ دا و ئارامی ب ئێکرێزیێ دھێتە پاراستن دیارە ژی پارتی دیموکراتی کوردستان پێشەنگ بوویە لڤێ ئێکێ و تەنانەت ھەر ل گرێدانا کونگرا سێ یێ یا پارتی کو ل سالا ١٩٥٣ برێڤەچوویە ، ناڤێ پارتی دیموکراتی کورد ھاتییە گوھارتن ژبۆ پارتی دیموکراتی کوردستان پێخەمەت وێ چەندێ کو ھەمی کوردستانیان ماف ھەبیت بھێنە دناڤ رێزێن ڤێ پارتێ و دگەل دا ژی دیربینیا پارتی ل وی دەمی و ھەیاکو نھا ئارمانجێن وێ ئەو بووینە کو ژبۆ کوردستانێ خەبات و بەرخودانێ و قوربانیێ بدەت کو نھا ئەڤ پارتە ل پارتایەتیێ گەلەک بەرفرەترو مەزنتر بوویە و وەک ئەرکەکێ پیروزێ خۆ زانییە ھەردەم پالپشت و پشتەڤانێ ھەمی ئول و ئایین و پێکھاتەیان بیت پێخەمەت پتر خورتکرنا کلتوورێ پێکڤە ژیانێ و تەبایێ ل کوردستانێ و ھەردەم پارتی ھەلگرێ ڤی پەیامەی بوویە ، د نھادا ژی پتر ل ھەردەمەکی سەقامگیریا سیاسی و پەیوەندیێن سیاسی دناف حزبێن کوردستانێ دا زێدەتر دفێت بێتە پێشخستن و ھەڤدەنگی دپرسێن چارەنڤیسسازدا بنیاتێ پێکڤە ژیانێ بیت، تاکو ب ھەمی ئاوایان تیرورست زێدەتر بێ ھیڤی ببن دلێدانا ئارمانجێن خوە دا نەشێن پێنگاڤەکێ پێشڤە بھێنە کو دیارە ل سایەیی خوینا پیروز و گەشا پێشمەرگێن قارەمانێن کوردستانێ جیھان ھاتە پاراستن ل توندرە و تیرورستێن داعش .
لداویێ دبێژین ھاندانا بەردەوام یا دیالۆگێ دناڤبەرا ئایین و ئایینزانان دا و ب ھێزکرنا گیانێ لێبورینا ئایینی و لێکتێگەھشتنێ و قەبولکرنا ئێکدو و لێکنێزیکبوونێ، پویتەدان و بھادایینە ب تێکەلیا فەرھەنگا د ناڤبەرا نەتەوە و پێکھاتەیان دا ژبو بھێزکرنا گیانێ ڤیانێ و چارەنڤیسێ ھەڤپشک.