ژ ھوکارێن ھەری سەرەکی بو بەرەف چونا گەل و وەلاتی ئەوە کو دان پێدان ھەبیت ب وێ رەوشا راست و دروست ئەوا ل سەر ئەردی ھەی ب سینگەک بەرفرەە و ئەلتەرناتیف بێتە قەبولکرن بو ھندێ کاروانێ گەھشتن ب سەرکەفتن و خەونا گەلی ب سەلامەتی بگەھیتە وێ ئارمانجێ کو خەبات بو ھاتیە کرن.
دان پێدان کرن ب ھەبونا کێم و کورتیان ل بیاڤێن جودا دا ھزرا چاکسازیێ و بەرەف چونێ و پێنگاڤێن بھێزکرنێ دئینیتە گورەپانێ دا ئەگەر ھیڤیا گەھشتن ب وەلاتێن پێشکەفتی ھەبیت. پشتی بیست و ھەشت سالێن حوکمرانیا کوردی ل ھەرێما کوردستانێ ھەتا نھا دەھان کێم و کورتی ھەنە و بەردەوام خەلک داخازا باشتریێ دکەت, ھەر چەندە ل چاڤ دەڤەرێن ناڤین و باشورێ ئیراقێ کوردستان ل دەڤەرێن باشە و پێشکەفتیی یە , لێ داخازیا باشتریێ و دان پێدان ب ھەبونا کێم و کورتی و گەندەلی و ب ھەدردانا مالێ گشتی و نەبونا شەفافیەتێ ل بیاڤێن جودا و دەستێ حزبێ ل کارێن حکومەتێ و واستە و واستەکاری و ...ھتد. بیتە فاکتەرەک سەرەکی بو گەھشتن ب کوردستانەک بھێز . تشێ دلخوشکەر نھا ئەوە کو دان پێدان کرن ب ھەبونا کێم و کورتیان ل کوردستانێ گەھشتیە ئاستێن بلند و ل سەرجادە و کولان و روژنامە و سایت و تورێن جڤاکی و پارتێن ئوپوزسیونێ نەمایە , ئەڤ چەندە ژی دبیتە ئەگەرەک بو پتر بەرەف پێشچونێ . سەروک وەزیرێن کوردستانێ نێچیرڤان بارزانی ل گوتارا سەرسالا نوی دا باس ل بەرەف پێش چونێ کر و روژێن گران و نەخوش ھاتنە دەربازکرن , بەلێ ئیماژێ ب ھەبونا کێم و کورتیان ژی ددەت . ئەگەر نھا ب سالا ٢٠١٧ ھەڤبەربکەرین تایبەت پشتی ریفراندوما سەربەخویێ و ریدانێن شازدێ ئوکتوبەرا ھەمان سال و گڤاشتن و دورپێچا بەغدا و تورکیا و ئیرانێ و ئالوزیێن نافخویی و ژ دەست دانا نیڤا ئاخا ھەریمێ ب رەنگەک دەمکی ھەمی وێ چەند رادگەھینن کو ئەو تونێلا رەش و روژێن سەخت و گران و دورپێچ و ئالوزی چ نەمایە ب داوی بێن. بەلێ کێم و کورتی ژی ھەنە و فەرە پلانەک ستراتیجی ھەبیت بو نەھێلانا ڤان کێم و کورتیان و دووبارە نەکرنەڤا دیروکەک بێ مفا. ژ وان کێم و کورتیان ب دیتنا من کو فەرە پەرلەمانێ کوردستانێ و حکومەتا ھەرێما کوردستانێ و سەروکێ ھەرێمێ یێ داھاتی وھەمی ئالی کار ل سەر بکەن .
گرنگی دان ب پەیوەندیێن نافخوی و رێکخستنەڤا ناڤ مالا کوردی و دووبارە نەکرنا لێک ترازان و ئاریشێن کو ببنە ھوکارەک کو دوژمن ببیتە بەرەڤان . ئەڤ چەندە ژی ب رێزگرتن ل پیروزیێن نەتەوەی و نیشتیمانی و کارێ حزبی و یاسا و رێسایێن ھەرێمی و پاراستنا بەرژەوەندیێن بلندێن ھەرێما کوردستانێ دروست دبیت . ژ بەرکو نەتفاقی و درزێن ناڤ مالا کوردی ژ ھوکارێن ھەری سەرەکی بوینە بو ناڤچونا ھەمی دەستکەفتێن گەلێ کورد ب درێژاھیا دیروکێ و ب وان دەستکەفتیێن نوکە ژی ل روژئاڤا و باشور ژی کەفتیە مەترسیێ دا پشکەک بو نەبونا ئێکرێزیێ دزڤریت . ھەروەسا فەرە کارەک جدی بێتەکرن ب نیشتیمانی کرنا ھەمی ھێزێن چەکدار ل بن سێبەرا وەزارەتا پێشەرگە و نافخوی یا کوردستانێ و فەرمانداریا فەرماندێ ھێزێن چەکدار و دەستێ حزب و کەسان ل ھێزێن چەکدار بێتە برین و ئیدی بیروباوەرێن پێشمەرگەێ(کوردستان ئێکەم) بیت و دەست ب ئاڤاکرنا کارگەھێن تایبەت ب بیاڤی سەربازی بێتەکرن و ھەمی ھێز دووبارە بێنەف رێکخستن و راھێنان پێ بێتەکرن و ژیانا وان بێتە خوشکرن و ئیدی جارەک دن نەبیت شەرێ نافخوی و شازدێ ئوکتوبەرێ ژی دووبارە ببیت.ھەروەسا ل کێم و کورتیێن ھەی فەرە ھەتا نھا کوردان مفا پتر ل پەیوەندیێن دبلوماسی وەربگریت و فەرە کارەک جدی بێتەکرن بو رێکخستنەڤا نونەراتیێن ھەرێما کوردستانێ ل دەرڤە و کار بکەن بو لوبیکرنا کێشا کوردی و ھاندانا بازرگان و کومپانیایێن بیانی بو ھندێ بێنە بازارێ کوردستانێ و ئەڤ چەندە دێ ھاریکار بیت بو خوشکرنا پەیوەندیێن سیاسی ژی و بھێزکەفتنا پێگەھێ ھەرێما کوردستانێ ژی . ھەبونا کێم و کورتیان ل بیاڤێن پەروەردەی و ساخلەمیێ و خاندنا بلند زورکاریگەریەک مەزن ل سەر جڤاکی و رەوشا ھەرێما کوردستانێ ھەیە ل نافخوی و دەرڤە ژی دا , ئەڤێ چەندێ ژی پێتڤی ب کارەک دەستە جەمعی و شیانێن ھەمی ئالیەکێ یە و نھا ئەڤ کێم کورتیە ب ئاڤاھی و ئامیر و بودجە و کادران ڤە گرێدایە کو فەرە حکومەتا ھەرێما کوردستانێ کار بکەت بو بەرەف پێش برنا ھەمی سێکتەران بەلێ پەروەردە و فێرکرن و ساخەلمی ستینا پێشکەفتنا ھەمی وەلاتەکێنە و ھەروەسا ل کێشێن کو کوردستان دێ ریبریی بیت ئابورێ تاک ئالیە ئەو ژی پشت گرێدانە ب پترولێ ڤە .
د ژیانا خو دا من باوەری ب ھەبونا چاکی و خرابی ل مروڤی و کار و خەبات و پروژە و خزمەتگوزاری و نەشەفافیەت و گەندەلی ودزی و واستە و واستەکاری د حوکمەت و وەلاتی دا ھەیە ب رەنگەک رێژەیی , سەرەرایێ ھەبونا دەھان کارێن چاک و پروژێن باش کو جھێ دلخوشیێ نە , بەلێ ئەڤ چەندە وێ ناگەھینیت کو کێم و کورتی نینە کو گازندەکرن ژ کێم و کورتیان گەھشتیە ئاستەکێ بلند کو ھیڤی دئێتە خاستن ئەڤ دان پێدانە ببیتە ھڤێنێ پێشکەفتنێ و ھاڤێتنا پێنگاڤێن بھێزکرنا کوردستانێ کو دشیان دا ھەیە و مە باوەری ژی ب ڤێ چەندێ ھەیە .