بەری هێزێن عیراقی ژ ترسێن هژمارەکا کێم یێن چەکدارێن داعشدا چەکێن خوە د جهدا بهێلن و بڕەڤن، باژێرێ کەرکووکێ وەکی نوکە یێ پڕی (کێماسی،تەقین،رەڤاندن و ئالۆزی )بوو.
لێ پشتی چەکدارێن داعش بەرێ هێرشا خوە یا هووڤانە دایە رەخێ کەرکووکێ، لەشکەرێن سوپایێ عیراقێ مەزنترین چەپەرێ شکاندی. ئەو بوو کو جلێن خوە یێن سەربازی ئێخستن وجلێن مەدەنی ل بەر خوەکرن و رەڤین.
پێشمەرگەیێن کوردستانێ ب مێرانی و جانڤیداییا خوە و بۆ پاراستنا کوردان و هەمی ئول و نەتەوەوەیێن ل کەرکووکێ دژین،جانێ خوە دانا سەر دەست، و بوون قەلغان بۆ پاراستنا کەرکووکێ و ب هەمی رامانێن خۆ گوریکرنێڤە کەرکووک پاراست.
بەرهەمێ قوربانیدانا خوە ژی ئالایێ کوردستانێ د ناڤ دلێ کوردستانێدا بلند هەلدا و دووبارە کوردبوونا کەرکوکێ بۆ دۆست و دوژمنان دووپاتکر.
هەر ژ وی دەمی کو (نەجمەدین کەریم) پارێزگەرێ شەرعی یێ کەرکووکێ بوو،ناڤهاتی و پڕانییا ئەندامێن ئەنجوومەنی فەرمانێن خوە راستە راست ژ سەرۆکێ حکوومەتا هەرێما کوردستانێ بەرێز "نێچیرڤان بارزانی" وەردگرتن. لەوما ژبلی بلندکرنا ئالایێ کوردستانێ و سەرباری هەبوونا هندەک کێماسیێن بچویک لێ خزمەتەک مەزن و بەرچاڤ بۆ کەرکووکێ هاتەکرن.نموونەیێن وێ خزمەتێ ژی د وی ماوێ کورتێ دەستهەڵاتدارییا کوردی یا وی باژێڕی دا، سەرۆکێ حکوومەتا هەرێما کوردستانێ کۆژمێ 10ملیۆن دۆلارێن پترۆدۆلاری ژ داهاتێ کەرکووکێ بۆ وی باژێری ب خوە تەرخانکرن و دەرئەنجام ژی مینا پارێزگەهێن دی یێن کوردستانێ بەرگەکێ نوی ژ پێشکەفتن و جوانی و ئارامیێ کرە بەر کەرکووکێ،خواندن و زمانێ کوردی د بلندترین ئاستێ گەشەکرنێدابوو،ب درێژیا دیرۆکا ڤی باژێری چ جاران تەمەت وان ساڵێن کێم یێن حکوومڕانیا کوردی لژێر چاڤدێریا سەرۆکێ حکوومەتا هەرێمێ ئارامی،خۆشگۆزەرانی،بەرەف پێشچوون ب خوەڤە نەدیت بوو.باژێڕ ببوو نموونەیا پێکڤەژیانێ ل سەرانسەری عیراقێ. و پارێزگەری و پڕانییا کار بدەستێن کەرکووکێ هەمی فەرمان و داخازیێن دەستهەڵاتا کوردی جێ بەجێدکرن و فەرمانێن سەردەستێن شیعەیان پشتگوهـ دهاڤێتن. چونکی کاربدەستێن عیراقێ ب هەمی شیانێن خوە ل دژی هەر خێرو پێشڤەچوون و کوردبوونەکا کەرکووکێ بوون.
لەوما تشتێ هەردەم چاڤەرێ کری ژ هندەک دوورییێن د ناڤ پاڕتەکا کوردیدا ئەڤێن وان ب خوە ناسناڤێ (کالفام و هەرزەکارێن سیاسی...هتد)ل سەر دانایی، ئەو بوو، کەڤتنە دژایەتیکرنا پارێزگەری و تەڤایا دلسۆزێن کوردان ل کەرکووکێ و ل شوونا پشتەڤانیێ لێ بکەن،جار ب کرێگرتییێن بارزانی بناڤ دکرن، جار ب نەفت دز!
و ل دەف وان ئاسایی بوو و هەردەم ئاساییە کو کرێگرتییێن عەرەبەکێ شوفینی بن، و نەفتا کەرکووکێ د دەست حەشدێ و پاسدارێن ئیرانێ دا بیت،ل شوونا جەمەدانیێن کوردی عەگال ل سەر سەرێن کوردا بن،ل شوونا زمانێ کوردی زمانێ عەرەبی بهێت فەرزکرن، بتنێ ئالۆزی و رێگرییان بۆ وان ئارمانجان دروست بکەن یێن سەرکردایەتییا کوردی بۆ کەرکووکێ و تەڤایا کوردستانێ هەین .
هەر ژبەر ڤێ کینا مێژوویی یا دناخێ واندا ل دووماهیێ ژەهرا خوە رێژت و ژبلی کو بزاڤێن نەهێلانا پارێزگەری کرن پارێزگەهـ ب هەمووڤە کرە دیاری بۆ "حەسەن پلایس"ی و هەڤالێن وی.
هەر ئەڤ کەرب و خیانەتا وان بۆ ئەگەر نە ریفراندوما کوردستانێ خەونا تەڤایا دایکێن شەهیدان، خەباتکەر، خێر ل خۆ نەدیتی و دلسۆزێن کوردستانێ بجهبینیت. و نە ژی ئالایێ پیرۆزێ کوردستانێ ل کەرکووکا دل بلند بمینیت. و ل شوونا کورد ل سەر ئاخا خوە ب سەربەرزی و ئازادی بژین، هاتن تەعریب کرن،ئیهانەکرن،کێمکرن... ل شوونا ئالایێ کوردستانێ ئالایێ عیراقێ ل سەر پەیکەرێ پێشمەرگێ شەهید کو سیمبۆلا هەمی شەهیدێن وێ دەڤەرێ یە هاتە بلندکرن.گەلەک ژ وان کوردێن ژلایێ حکوومەتا هەرێمێ هاتینە دامەزڕاندن، ب بوهانەیێن جودا جودا ژ لایێ خوەسەپێن و هەڤالێن خیانەتکارانڤە هاتنە لادان.مالێن کوردان هاتنە تالانکرن،سووتن، کورد ل سەر ئاخا باب و باپیرێن خوە بوون ئاوارە، چ سڤکاتی نەمان ل هەمبەر ڤی باژێڕێ هەردەم ل سەردەستێن عەرەبێن شوفینی خێر ل خوە نەدیتی نەهاتییە کرن، و تا نوکە ژی بەردەوامە و مینا بەهەشت و دۆزەخان کەرکووکا نهو دگەل کەرکووکا د وی ماوەیێ کێمێ حکمڕانییا کوردیدا ژێک جودایە.
پارێزگەرێ دۆستێ کالفامانژی هند دزی و گەندەڵی و بێ ویژدانی د ماوەکێ کێم یێ پارێزگەریا خوە یا نەشەرعی و سەپاندیدا کرن. کو هەتا دادگەهێن وان ب خوە فەرمانا گرتنا وی بدەرێخن.تشتێ جهێ سەرسورمانیێ ئەوە کو ئەو هژمارا کالفام و هەرزەکارێن سیاسی یێن کو ل دژی ناڤێ پارتا خوە و هەموو پیرۆزیێن کوردستانێ کارکری. ل شوونا بهێنە سزادان، پەسنا وان دهێتە کرن و جار ب پارێزەرێن رۆژئاڤا دهێنەدانان،جار ژی ب دوژمن بەزێنێن باشوور. لێ ڤێ پاڕتێ روویێ خوە یێ دروست نیشا خەلکێ نیشتیمان پەروەرێ کوردستانێ دا، کو هەر کەسێ ل دژی ئارمانجێن پیرۆز یێن کورد و کوردستانێ بیت، ئەو ب مادێلا و چیڤارا ل قەلەم ددەن، لەوما رۆژ ب رۆژ هێزا خوە یا جەماوەری ژ دەست دا و نەبتنێ نەما هەڤڕکا پاڕتی د مەیدانا سیاسیدا بەلکو بۆ پاڕتەک بچویک و پڕی پەڕو باڵ، و هەر ما د رکەهێدا و خەونان ب فڕینێ دبینیت.